1 Pedro 2 - Northern Tepehuan Bible

¹ Bia aapimï ïmo utudui oidakaragai xibi tudu. Dai kaxkïdï ka maiti abïr soimaaxi ibuada. Ka maiti abïr yaatagïda tudu. Daidi maiti abïr bupuirumadada jaa ixtumaxikïdï ibuadagi aapimï ïpï ipïrhiditai sai kïï tutiakami gïn aagagi ïgai tomaxi mai kïï tutuiga aapimï. Kaxi maiti abïr ïgakoñiaka ïpï dai maiti abïr buidïrï ñokiadagi go jaa. Dagitobïrai bïïxi gobai tudu.

^2-3 Ka máí aapimï xïï kïï tuiga Gïr Nukadakami gïn bïïtarï tudu. Dai kaxkïdï gï agai sai nakïdan dukai kaïkagi aapimï Diuxi ñokidï ïpïan dukai go aarhi xixïñi nanakïi bibhai. Podukai buimu aapimï gubukarhigai gïn ibhïdagïrï dai bïïx tasai bamioma kabakami dukai gukakamu aapimï oiditai gïn buaboidaraga.

^4-5 Gin aaduñi, gï agai sai maatïkagi aapimï sai Diuxi ibuayi ïmo aaduindagai namïakami ibhïadïrï odami. Ïkobai bubaidimi ïgai odami dai ibhïadïrï oidaga ïgai xibi. Diuxi kiupaigadï dukai odami iibhïadï tudu. Odami ibhïadï ïr ojodai dukai ixtukïdï kïsaimi Diuxi ïmo kiupai. Dai Suxi Kristo Gïr Nukadakami ïr go odai bamioma namïakïdï dukai ix makïdï Diuxi ïkobai busaitu dai bhai dui sai ïgaiñdïrï dagïkan dukai kïkibagi kiupaigadï. Diuxi kïïga oigïdai go Suxi tudu dai kïïga namïga ïgai Diuxi bïïtarï. Ïgai ïr ix makïdï aapimï buaboitudai dai urapïkïi tudu. Dïï gia go odami mai buaboitudadami gajiadïrï biayi go Suxi mai buaboitudaitai ïgai. Ojodai namïakami dukai aapimï ix makïdï Diuxi ïkobai bubaitu kïïsaragai bïïtarï kiidï tudu. Dai xibi ka ïkobai darasadï aapimï Diuxi dai dadaxdadami dukai aapimï. Suxi Kristo bhai dui gïn bïïtarï saidi ibuada aapimï ixtumaxi bhai ïrhidi Diuxi tudu. Ixtumaxi ibuayi aapimï xibi gubukadadïkïdï Diuxi Ibhïadï ïr dadaxdaragai dukai ix makïdï ibuayi aapimï Diuxi bïïtarï dai gobai kïïga bhai ïrhidi Diuxi.

⁶ Bïïxi gobai ïr ix makïdï aagai Diuxi ojadï ïkidadïrï aagaitai ïmo sïïrhikami biakami tudu. Ami ojadïrï ikaiti sai, Jerusalenïrï dáí Diuxi ïmo Tïanïdami ix makïdï ïr ïkobai busaidadï Diuxi. Ïgai ïr ïmo odai kïïga namïakami dukai xako daama dagïkan bii agai Diuxi aaduindadï ix makïdï ibuayi Diuxi. Gï agai sai odami kïïga xadutuada go Tïanïdami ïgai. Dai odami ix makïdï buaboitudagi ïgai mai biakamu ix tuixi xaïradagi buidïrï Diuxi, ikaiti Diuxi ojadï.

⁷ Kaxkïdï pokaiti Diuxi ñokidïrï sai Suxi Kristo kïïga gïn soikïdamu, aapimï ix makïdï buaboitudai. Dïï gia Diuxi ñokidï aagai go odami ix makïdï mai buaboitudai ïpï daidi ikaiti ami sai, Diuxi bïïtarï Suxi Kristo ïr go bamioma kïïgadukïdï odai dukai kïsaragai bïïtarï bakidï dïï gia go odami gajiadïrï bia ïgai mai buaboitudaitai, ikaiti go ojai.

⁸ Daidi ikaiti go ojai ïpï sai, Suxi Kristo ïr ïmo odai dukai xako utubai odami mai buaboitudaitai ïgai. Dai ix makïdï mai buaboitudai gïpiïrï surhigïi, ikaiti go ojai. Mui odami gïpiïrï surhigïï mai ïïgiditai ïgai Diuxi ñokidï ix makïdï aagai go Suxi Kristo tudu. Dai Diuxi ka podukai dáí sai taatana ïgai gïgïbidaragai.

⁹ Dïï aapimï gia mai taata agai gïgïbidaragai podukai. Aapimï ïr ïko bubaidadï Diuxi tudu dai ïr ix makïdï maa ïgai sïïrhikami saidi ïr dadaxdadamigadïkana aapimï. Ïmo aadunumï aapimï xibi ïkobai darasadïkatai aapimï Diuxi dai ïgai tuidadï aapimï. Kaxkïdï xibi bhaiga aapimï xi maaxitudagi jaa bïïtarï xïï kïï tuiga Diuxi. Kaxi gïn busaitu ïgai abhiadïrï xako tukapi dukai óídakatadai aapimï mai maatïkatai ixtumaxi ïr buaboi tudu. Dai xibi gia kaxi gïn daibuñtu ïgai xako xigiamaaxi gïn oidakaraga kïïga tonoraka maaxkatai gobai.

¹⁰ Kïïga ïr buaboi ixtumaxi oja go ñokituldiadamigadï Diuxi ïïki tudu. Ïgai ikaiti sai, ïkiomai maiti ïr ïmo aadunumïkana aapimï. Dïï gia xibi kaxi ïr aaduñdï aapimï Diuxi. Ïkiomai mai tipukatadai xorai buamï ïrhiadagi gïn bïïtarï. Dai xibi gia Diuxi kïïga buamï ïrhidi gïn bïïtarï, ikaiti go ñokituldiadamigadï Diuxi ïïki gïn aagaitai ïgai aapimï.

Piduru aagidi go buaboitudadami ix dukatai gï agai sai óídakagi tami oidigi daama óídakatai kia

¹¹ Gin aaduñi, xibi gïn aagidamu aanï ïmo ñoki gïn oigïdatai aanï. Daiñi, aatïmï xibhïadïrï óídakami dukai óídaga tami oidigi daama. Idi oidigi mai kïïgakïrï ïr gïr kii tudu dai bhaiyoma go tïbagi ïr gïr kii. Kaxkïdï kïïga abïr gïn tïgitoka dai mai ïïgiada go soimaaxi ix makïdï gïn tanïdagi gïn tukuga xibi kia gïn tukugïrï óídakatai aapimï. Go soimaaxkami ix makïdï gïn tanïdagi gïn tukuga ïr buidïrï kaatïkami dukai gïn ibhïdaga tudu dai soi duada ïrhidi gobai gïn ibhïdaga.

¹² Gïn tïgitobïrai sai go óídakami ix makïdï mai buaboitudai gïn tïgito nïidiña ix dukatai óídaga aapimï. Kaxkïdï abïr kïïga ibuada bïïxi aïkatïrï. Podukai tomaxi gïpiïrï gïn bupada ïrhiadagi jaa mai tïïgimu ïgai ixtukïdï. Dai xïïxkadï aagagi Diuxi ix bhai kïï idui óídakami aidï gia go ix makïdï gïpiïrï gïn bupaitadai biakamu xi aagadagi sai kïï idui aapimï. Dai aidï gia kïïga ñokadamu ïgai Diuxi bïïtarï ïpï nïiditai xïï kïïga ibuadana aapimï gïn soikïitai Diuxi.

¹³ Daiñi, kïïga maatï aapimï saidi ïr ïmo xadutudaragai Diuxi bïïtarï xïxkadï ïïgiadagi aapimï go dudunukami ix makïdï oidaga tami oidigi daama. Kaxkïdï abïr ïïgiada bïïxi go tïtïanïdami ix makïdï darasai odami. Ïïgiadabïrai asta go gïï dunukami romano tudu

¹⁴ ïmadï sonoïrï gukakamigadï ïpï ix makïdï otosai ïgai aipakoga. Go sonoïrï gukakamigadï ibuadana aaduindadï go gïï dunukami bïïtarï tudu. Dai mamaakai ïgai gïgïbidaragai go soimaaxi ibuadami dïï gia kïïga ñokai ïgai bïïtarï óídakami ix makïdï kïïga ibuayi. Gobai ïr aaduindadï ïgai tudu.

¹⁵ Gin aaduñi, Diuxi ipïrhidi sai kïïga xadutudaitai óídakagi aapimï. Ipïrhidi ïgai sai go óídakami ix makïdï ïr buidïrï bïïtïkamigadï Diuxi ka mai biakagi ixtukïdï ñokadagi tudu. Podukai dodorhituda ïrhidi ïgai go ix makïdï gïn ñokidiña aagaitai naana maaxi buirudagai.

¹⁶ Ïkioma go soimaaxkami ïr gïn tïanïdamigakatadai dïï gia xibi ka kïïgakïrï gïn bubaitu Diuxi dai xibi Diuxi ïgai daidi ïr gïn tïanïdamiga. Pipioñigadï aapimï Diuxi tudu. Kaxkïdï bhaiga bïnïrhiada aapimï maatïkatai sai ka kïïgakïrï bubuaka aapimï. Dïï gia maiti abïr pokaitada sai mai xudu ix soimaaxi ibuadagi aapimï ka kïïgakïrï bubuakïkai aapimï. Diuxi pipioñigadï aapimï xibi di.

¹⁷ Kaxkïdï abïr xadutuada bïïxi óídakami daidi abïr oigïdada bïïxi go buaboitudadami. Gïn tïgitobïrai xïïxi ïr gïdukami Diuxi daidi abïr xadutuada ïgai. Dai xadutuadabïrai go gïï dunukami romano ïpï.

Piduru maa ñoki go odami ix makïdï ïr pipioñi

^18-19 Gin aaduñi, idi ñoki ïr aapimï gïn bïïtarï ix makïdï ïr pipioñi dai bia gïn amu. Daiñi, Diuxi bhai ïrhidi aapimïkïdï xïxkadï apia kïïga ïïgiadagi aapimï gïn amu tomaxi soi gïn buidadagi ïgai. Kaxkïdï gï agai sai kïïga xadutudaitai ïïgiadagi aapimï gïn amu. Mai xudu ix kïï tutiakagi ïgai ix mai kïi tutiakagi ïpï tomax dukai gï agai sai ïïgiadagi aapimï. Dai ïïgiadabïrai ïgai tomaxi oomarhigakagi ïgai gïn bïïtarï ïpï. Gobai ïr ïmo bhai ïrhiaragai Diuxi bïïtarï tudu ix apia kïïga ibuadagi aapimï tomaxi mai kïï tutiakagi ïgai gïn bïïtarï.

²⁰ ¿Dïï gia dukatai bhai gï ïrhidiña Diuxi aapimïkïdï ix soimaaxi iduñagi aapimï dai kaxkïdï gïn gïgïbiagi gïn amu? Kïïga ïr sïïrhi xi taatagi aapimï gïgïbidaragai mai kïï ibuadatai tudu. Dïï gia ïïmo imidagai soimaaxi gïn taataturhiada antaada gïn amu tomaxi kïï ibuadagi aapimï. Xïxkadï po gï duñagi gobai ix mai dagitoagi aapimï ix gïn maitiagi go soi ïrhiaragai dai apia kïïga ibuadagi aapimï gobai gia bhai ïrhidi Diuxi.

²¹ Kïïgakïrï gïn bubaitu Diuxi mïsai kïïga ibuada aapimï tudu. Dai ïgai ipïrhidi sai apia kïïga ibuada aapimï tomaxi soimaaxi gïn taataturhiadagi jaa kïïga ibuadatai aapimï. Suxi Kristo soimaaxi taata kïïga ibuadatai ïgai tudu dai gï agai sai kïïga gïn tïgito nïidagi ixdukatai ibuadana ïgai dai podukai ibuadagi aapimï ïpï.

²² Suxi Kristo mai soimaaxi idui tomarhi ïmo imidagai. Dai mai buirumagi ïgai óídakami ïpï.

²³ Xïïxkadï odami galnaaxi ñoki aagidi, Suxi apia bhai maaxi ñoki aa noraidiña. Tomaxi soi buididiña jaa bïïxkïrï Suxi mai pokaitiña sai aa noraida agai soimaaxi gï sïïrhiñda agaitai ïgai ïmadï. Dai bhaiyoma nïnïrakana Suxi sai aagana Diuxi xorai kïï idui dai xorai mai kïï idui dai sai Diuxi maakana gïgïbidaragai xorai ajïakagi.

²⁴ Aatïmï gïr ajïakatadai gïgïbidaragai soimaaxi ibuadamikatai aatïmï tudu dïï gia Suxi taata go gïgïbidaragai gïr bïïtarï mukukai kuruxiana. Po dui ïgai saidi ka maiti gïr tïanïdagi go soimaaxkami. Ïpïan dukami gïr bia ïgai ïmo mukiadï ix makïdï ka mai bhaiga xi ïïgiadagi go soimaaxkami tudu. Ka mai bia aatïmï xi ïïgiadagi go soimaaxkami tudu ka koidadï dukai biïkai aatïmï go soimaaxkami bïïtarï. Po dui ïgai sai ka ïma dukai óídakagi aatïmï ibuadatai ixtumaxi ipïrhidi Diuxi. Gï muragitu ïgai saidi kïïgakïrï bubuakïna aatïmï tudu.

²⁵ Kïïga ïr buaboi tudu sai ïpïan buadatadai aapimï kañiñiru ix makïdï kuga ajiopaiña. Dïï gia xibi ka ïpamu uraba aapimï gïn Paxturuga. Ka uraba aapimï Suxi Kristo tudu dai ïgai nukadai gïn ibhïdaga xibi.