1 Pedro 1 - Northern Tepehuan Bible

Biaturhi Piduru go buaboitudadami

¹ Aanï ïr Piduru dai gïn ojidi idi ojai ïmo otosadïkatai aanï Suxi Kristo. Idi ojai ïr go óídakami bïïtarï ix makïdï ïr ïko bubaidadï Diuxi. Aapimï gïn bïïtarï ix makïdï mïkaxi óídaga gïn kiiyañdïrï, aapimï ix makïdï aipakoga Pontïrï dai Galasiïrï dai Kapidosiïrï dai Asiïrï dai Bitiniïrï óídaga xibi tudu.

² Diuxi gïr oga ka ïkiaxdïrï maatï bïïxi aïkatai ixtumaxi daibuña agai dai kaxkïdï podukai gï tïgito ïgai dai ïïki abhiadïrï ka ïkobai gïn bubaitutadai ïgai saidi ïr aaduñdïkana aapimï. Ka ïkobai gïn buaboitu Diuxi Ibhïadï tudu saidi Suxi Kristo ïradï ix makïdï aaxi ïgai namïakana gïn bïïtarï saidi oigïldana Diuxi gïn soimaaxkamiga dai sai kïïga ïïgidiña aapimï ïgai. Gin aaduñi, ipïrhidi aanï ix Diuxi bamioma gïn tïïgidana xïï kïï tuiga ïgai gïn bïïtarï dai sai gïn maakana ibhïxtaragai gïn ibhïdagïrï.

Aatïmï buaboitudadami bia ïmo bhai ïrhiaragai nïnïraragai

³ Gin aaduñi, gï agai sai kïïga ñokada aatïmï Diuxi bïïtarï. Gï agai sai kïïga ñokada aatïmï bïïtarï ïgai ix makïdï ïr Diuxigadï Gïr Nukadakami Suxi Kristo tudu. Soi ïlda gïr tïï ïgai kaxkïdï daidi gïr maa ïmo utudui oidakaragai. Gï duakatu Suxi Kristo ïpamu tudu gokiïrï xi mutadai ïgai dai kaxkïdï bia aatïmï ïmo kïïgadukami nïnïraragai xibi. Dai kïïga gupuka antaadakana aatïmï gïr utudui oidakaragai bïïtarï maatïkatai sai bia aatïmï go kïïgadukami nïnïraragai gobai.

⁴ Xibi nïnïraka aatïmï go naana maaxi bhai ïrhiaragai ix makïdï bia Diuxi gïr bïïtarï tudu. Diuxi ka bhai tua naana maaxi bhai ïrhiaragai gïn bïïtarï tïbagiana kaxkïdï. Dai ix makïdï bhai tuajidi ïgai gïn bïïtarï kïïga buañixi dai mai ugiti agai tomarhi ïmo imidagai.

⁵ Dai Diuxi gïn nukadai bïïxi gubukarhigadïkïdï kïïga buaboitudai aapimï kaxkïdï. Gïn nukadai ïgai asta xïïxkadï ka kïïgakïrï bubuakiagi aapimï tudu. Dai xïïxkadï karhioga ugiti agadagi oidigi aidï maaxitulda agai Diuxi ix maaxika agai go bhai ïrhiaragai ix makïdï gïn aji agai ka kïïgakïrï bubuakïkai aapimï.

⁶ Kïïga ïr buaboi tudu sai aatïmï buaboitudadami bhïiya ragai ïmo gïdukami bhai ïrhiaragai. Dai kaxkïdï aanï agai sai gï agai ix bhai gïn ïrhiadagi aapimï tomaxi gï agai xi naana maaxi soimaaxi taatamadagi aapimï xibi chïki umigi kia.

⁷ Daiñi, gïn aagidamu aanï ïmo maaxidaragai ñoki gokïdï. Kïïga maatï aapimï sai odami taiyïrï dadasai oro dai mïmïidiña sai podukai kïïga maaxkana gobai ix makïdï buaboikïdï ïr go ïïgi oro. Dai podukai ïpï xïïxkadï soimaaxi taatamadagi aapimï buaboitudadami podukai kïïga maaxkana ix bhai buaboikïdï buaboitudai aapimï. Dai xïïxkadï apia kïïga buaboitudagi aapimï gobai bamioma namïga xi bhai go oro. Go oro mai bïïxkïrï bïïtarï kabaka tudu tomaxi kïïga gï mïidagi dai kïïga buañixikagi gobai. Dïï gia xïïxkadï ïpamu dibiagi Suxi dai gï maaxitudagi xorai ïgai aidï Diuxi kïïga ñokadamu gïn bïïtarï kïïga buaboitudaitai aapimï. Dai oidakamu gïdukami xadutudaragai gïn bïïtarï aidï ïpï.

⁸ Gin aaduñi, kïïga oigïdai aapimï go Suxi Kristo, tomaxi mai nïidi aapimï. Apia buaboitudai aapimï tomaxi mai nïidi aapimï kia tudu. Dai mai tipu ñoki ixdukatai aagagi xïï kabami bhai gïn ïrhidi aapimï buaboitudatai aapimï Suxi.

⁹ Ka kïïgakïrï bubuaka aapimï tudu ka kïïga buaboitudatai dai kaxkïdï bhai gïn ïrhidi aapimï.

¹⁰ Gin aaduñi, kïïga xigiamaaxi go kïïgakïrï bubaidaragai ixtukïdï kïïgakïrï bubuaka aapimï. Ïmo oidaragai gobai ix makïdï gïn maa Diuxi kïï tuigakatai ïgai gïn bïïtarï tudu. Daiñi, go ñiñokituldiadamigadï Diuxi ïïki kaxi maatïkatadai saidi kïï tuigaka agai Diuxi óídakami bïïtarï dai sai bhai duñagai ïgai ïmo kïïgakïrï bubaidaragai óídakami bïïtarï. Dai go ñiñokituldiadami ka ïïki abhiadïrï kabami gïn aajagïiña bamioma maatia ïrhiditai ix maaxika agai go kïïgakïrï bubaidaragai.

¹¹ Suxi Kristo Ibhïadï ka ïkiaxdïrï maatïturhitadai go ñiñokituldiadamigadï saidi Suxi Kristo soimaaxi taata agai dai sai gokiïrï oidaka agai naana maaxi bhai ïrhiaragai. Dai go ñiñokituldiadamigadï Diuxi maatïka ïrhiditadai ix tuigako daibuña agai bïïxi gobai dai xorai bïïtarïka agai gobai ïpï.

¹² Go ñiñokituldiadamigadï Diuxi kïïga máí sai mai kia bhai duña agaitadai Diuxi go kïïgakïrï bubaidaragai aidïxi kia oidakatadai ïgai. Diuxi podukai maatïturhi ïgai kaxkïdï. Dai kaxkïdï maatïkatadai ïgai saidi go ñoki ix makïdï gatïtïïgitadai ïgai ïïki ïr aapimï gïn bïïtarï ix makïdï gokiïrioma dada. Dai xibi Diuxi ka otoi Ibhïadï tïbagiañdïrï. Dai gïn otoxdi Diuxi tïtïïgiadami ñoki xorai gïn aiturhiadagi go bhai ïrhiaragai aatagi ïpï. Diuxi Ibhïadï gubukarhigadïkïdï gïn aiturhi ïgai go aatagi aagaitai go kïïgakïrï bubaidaragai tudu. Agia xigiamaaxi aatabuayi Diuxi. Asta go tïtïañikarudï Diuxi kïïga gïn tïgito nïnïidi ka daibuskïitai bïïxi ixtumaxi aagaiña go ñiñokituldiadamigadï Diuxi ïïki abhiadïrï tudu.

Go buaboitudadami gï agai ix go ïïgi Diuxi bïïtarï oidakagi sai kïïga buañixikami dukai oidakagi

¹³ Aapimï gïn bïïtarï tudu go kïïgakïrï bubaidaragai ix makïdï aagaiña go ñiñokituldiadamigadï Diuxi ïïki. Dai kaxkïdï abïr bhai gïn duka dai kïï sïïrhi tïtïgitoda. Kïïga buaboitudaitai abïr nïnïraka go bhai ïrhiaragai ix makïdï gïn maakimu Diuxi xïïxkadï dibiagi Suxi Kristo ïpamu tudu. Aidï bïïxi óídakami nïijadamu go Suxi dibiakai ïgai dai bïïxi óídakami maatïkamu xorai ïgai.

¹⁴ Daiñi, ïkioma aidïxi mai kia maatïkatadai aapimï ixtumaxi ïr buaboi dai ïïgidiña aapimï ïïgi gïn tïgibudaga, aidï biaka ïrhiditadai aapimï naana maaxi ix makïdï mai kïkïïgadu. Ka maiti abïr podukai óídaka xibi tudu. Ïïgiadabïrai Diuxi gïr Oga bhaiyoma aarhi maamaradïkatai aapimï.

^15-16 Daiñi, ikaiti Diuxi ojadïrï sai, Aanï ïr Diuxi dai ïkobai daja aanï bïïxi go soimaaxkamiañdïrï. Kaxkïdï gï agai sai ïkobai óídaka aapimï bïïxi soimaaxkamiañdïrï ïpï, ikaiti Diuxi. Diuxi ïgai dai ïkobai gïn bubaitu tudu. Dai kaxkïdï gï agai sai kïïga buañixikami óídakagi aapimï ïkobai darakatai bïïxi go soimaaxkamiañdïrï. Gï agai sai podukai óídakagi aapimï bïïxi aïkatïrï ix makïdï ibuadagi aapimï tudu.

¹⁷ Gïn tïgitobïrai sai Diuxi ix makïdï gïn Oga aagai aapimï ïr ïgai ix makïdï aagada agai xorai kïïga idui dai xorai mai kïïga idui. Gïgïbitulda agai ïgai bïïxi soimaaxi ibuadami tudu toma xoraikagi ïgai. Ïmadugan dukai nïidi ïgai bïïxi óídakami tudu. Kaxkïdï gï agai sai kïïga xadutudaitai óídakagi aapimï asta xïxkadï ukami óídakagi aapimï tami oidigi daama.

^18-19 Daiñi, Diuxi kïïgakïrï gïn bubaitu gïn ïïkidadï oidakaragaiñdïrï ix makïdï gïn biturhi gïn aaduñi ïïkidadï. Maiti ïr soiñikatadai gïn ïïkidadï oidakaraga tudu. Dai kïïga maatï aapimï sai kabami namï gïn kïïgakïrï bubaidaraga dai Diuxi ïgai dai dáí namïgadï. Ixtumaxi dáí ïgai gïïpi bamioma namïga xi oro xi ïpï plata. Dáí ïgai Suxi Kristo tudu sai mukuna ïgai dai aaxtana ïradï ïmo arhi kañiru dukai mai biakatai ïgai toma lïïchi soimaaxkami abhana.

²⁰ Ka ïki abhiadïrï ka podukai gï tïgitokatadai Diuxi sai Suxi Kristo ïgaika agai dai kïïgakïrï gïn bubaida agai. Ka podukai dáítadai ïgai mai kia idunakai oidigi tudu. Dïï gia asta utudami xibiapioma dibia go Suxi karhioga ugiti agaitai oidigi. Dibia ïgai kïïgakïrï gïn bubaida agaitai tudu.

²¹ Dai kïïga maatï aapimï Suxi dai kïïga maatï aapimï ix tuma idui ïgai ïpï dai kaxkïdï buaboitudai aapimï Diuxi. Buaboitudai aapimï ïgai ix makïdï duakatu go Suxi dai maa go adaama namïakami sïïrhikami tudu. Dai xibi bia aapimï ïmo kïïgadukami nïnïraragai ka buaboitudakai aapimï Diuxi.

²² Daiñi gin aaduñi, aapimï ka ïïgidi go buaboi aatagi dai ka buañixikami bii gïn ibhïdaga. Kaxkïdï gï agai sai kïïgakïrï gïn oigïdada aapimï aipakoga bïïxi gïn ibhïdagakïdï.

²³ Ka uutudui aapimï tudu, uutudui bubuaka aapimï ïmo utudui oidakaragai bïïtarï ix makïdï mai ugiti agai tomarhi ïmo imidagai. Diuxi ñokidïañdïrï imïi gïn utudui oidakaraga tudu dai Diuxi ñokidï mai ugiti agai tomarhi ïmo imidagai. Bïïxkïrï bïïtarï gobai.

²⁴ Kaxkïdï Diuxi ñokidïrï ikaiti sai, Odami mai xii tïbïpi kapaka. Ïpïan buayi ïgai basoi. Toma xïï kïï titiodikagi ïgai dïï laachkïdï ka mai kïï titiodikana. Ïpïan buayi ïgai go basoi yooxigadï. Mai xii tïbïpi kabaka go basoi tudu. Otoma gakïrïi gobai dai surhigïi yooxigadï. Pomaaxi odami ïpï, mai xii tïbïpi kapaka ïpï.

²⁵ Dïï gia ñokidï Gïr Nukadakami gia bïïxkïrï bïïtarïka agai. Dai go bhai ïrhiaragai ñoki ix makïdï kaï aapimï ïr ñokidï Gïr Nukadakami.