1 Korintios 8 - Northern Tepehuan Bible

Pabora aagai ix bhai kïïgadu ix ugia ïmoko kuadagai ix makïdï gï dadaxdi go uubixi

¹ Gin aaduñi, gin tïkakai aapimï go ojiïrï ix makïdï gin otoxi aapimï sa bhai kïïgadu ix aatïmï buaboitudadami ugiagi kuadagai ix makïdï gï dadaxdi go uubixi. Daiñi, kïïga maatï aatïmï sai go kuadagai ix makïdï gï dadaxdi uubixi maiti ïr ixtumaxi. Dïï maiti gï agai ix gïgïrdukïdï gïr ïrhiada aatïmï maatïkatai gobai. Maiti gï agai ix po gïr ïrhiada sai bamioma maatï aatïmï xi jaa tudu. ¿Tumaxi ïr soiñi gobai di? Gï agai bhaiyoma sai gïr oigïdada aipakoga. Ix gïr oigïdada aatïmï aidï gia gïr soikïdamu aipakoga ïpï sai bamioma gïrhiagi gïr buaboidaraga. Dai gobai gia ïr soiñi.

² Daiñi, pupuiruga odami ix makïdï ka kïï maatï ïrhidi bïïxi aïkatai.

³ Dïï gia Diuxi kïïga ïïmadai odami ix makïdï oigïdai Diuxi. Dai gobai gïïpi ïr soiñi ïpï.

⁴ Xibi aagamu aanï go kuadagai ix makïdï gï dadaxdi uubixi. Daiñi, kïïga maatï aatïmï sai go uubixi mai gupuka. Dai kïï maatï aatïmï ïpï sai mos arhi ïmaduga Diuxi. Mai tipu ïmai.

⁵ Mui óídaga tudu tïbagiana dai tami oidigi daama ïpï ix makïdï didiuxi dai tïtïanïdami aagaiña odami.

⁶ Dïï aatïmï kïï maatï sai mos arhi ïmaduga Diuxi gïr Oga ix makïdï idui bïïxi aïkatai. Ïgai bïïtarï tudu óídaga aatïmï. Dai mos arhi ïmaduga Gïr Nukadakami ïpï dai ïgai ïr Suxi Kristo. Ïgaikïdï idui Diuxi go oidigi dai ïgai gubukarhigadïkïdï óídaga aatïmï.

⁷ Dïï mai bïïxi buaboitudadami maatï sai maiti ïr ixtumaxi go uubixi. Ïïmoko buaboitudaiña go uubixi ïkioma dai xibi ix ugiagi ïgai go kuadagai ix makïdï gï dadaxdi uubixi po taadaga ix kia xadutudai ïgai. Mai kia kabaka buaboidaradï tudu ix kaxkïdï poïrhidiña ix soimaaxi ibuayi ïgai ugakai go kuadagai.

⁸ Daiñi, ïmo kuadagai maiti gïr sobhikïi ix kïï biyagi aatïmï Diuxi ïmadï. Ix ugiagi aatïmï mai soimaaxi bipiïyi aatïmï dai ix mai ugiagi mai kïïgioma bipiïyi ïpï. Mos ïr ï galbaaxi ix ugiagi ïmoko ix mai ugiagi ïpï.

^9-11 Kïï maatï aapi tudu sai go uubixi mai bia gubukarhigai dïï ïïmoko gï susukurhi poïrhidi sai gia gupuka. Ïgai poïrhidi saidi ïr soimaaxkami ix ugiagi ïmoko kuadagai ix makïdï gï daxditadai ïmo ubixi tudu. Kaxkïdï maiti gï agai xi ugiagi ïgai. ¿Dïï gia ix gï ïlda antaada gï sukurhi ix gï nïijadagi ïgai no xibhïkai kiupaigadïrï ïmo ubixi dai gakuadatai aapi daxdaradï? Kïïga ipïlda antaada ïgai ix ugiagi ïpï tomaxi ïgai soimaaxkami ïrhidi gobai. Podukai gïpiïrï daituda antaada aapi gï sukurhi di. Dai kaxkïdï maiti gï agai ix ugiagi aapi daxdaradï ïmo ubixi tomaxi kïïga maatï aapi sai maiti ïr soimaaxi ix gobai. Maiti gï agai xi ugiagi aapi tadu sobhi aapi gï sukurhi buaboidaradï ix makïdï mai kia gubukan iimïi. Maiti gï agai ix pobuadagi aapi. Suxi muu ïgai bïïtarï tudu dai maiti gï agai aapi ix soimaaxi buadagi ïgai bui podukai. Kïïga bia aatïmï oigaragai tudu ix naana maaxi ugiagi dïï gia gï agai ix kïïga gïr tïgito nïijada aatïmï. Tadu idui aatïmï ixtumaxi ix makïdï poïrhidi ïmai sai soimaaxi ix makïdï mai kia kabaka buaboidaradï. Ix pobuadagi aatïmï kïïga poduña ïrhiada antaada ïmo gïr sukurhi gobai ix makïdï soimaaxi ïrhidi ïgai. Podukai gïpiïrï daituda antaada aatïmï gïr sukurhi. Gobai ïr ïmo sobhidaragai gïr sukurhi buaboidaradï dai maiti gï agai gobai.

¹² Daiñi, ix sobhidagi ïmoko sukurhidï buaboidaradï kaxi soimaaxi ibuayi buidïrï dai soimaaxi ibuayi Suxi Kristo buidïrï ïpï.

¹³ Kaxkïdï maiti ipïrhidi aanï ix sobhidagi gin susukurhi buaboidaradï. Dai ix oidakagi tomax tuma kuadagai ix makïdï soimaaxi ïrhidi go jaa bhaiyoma mai ugimu aanï tomarhi ïmo imidagai tomaxi aanï kïï maatï sai maiti ïr soimaaxi gobai. Maiti ipïrhidi aanï ix sobhidagi gin susukurhi buaboidaradï kaxkïdï.