1 Korintios 7 - Northern Tepehuan Bible

Go Pabora aagai go odami ix makïdï ka kukuna

¹ Xibi gïn aa noraidamu aanï gobai ix makïdï gin tïkakai aapimï baasïkioma gin ojidakai. Gin tïkakai aapimï sa bhai kïïgadu ix mai ontagi kïkïïrhi. Dai gokïdï aanï aagai sai kïïgaduaba ix mai ontadagi ïgai.

² Dïï gia mui odami xibi óídakami aipako bopoiña jaa ïmadï ix kaxkïdï gï agai bhaiyoma ix oñiakagi kïkïïrhi dai oki ïpï gï agai ix kukunakagi sai mai soimaaxi ibuadagi ïgai aipakoga bopoitai jaa ïmadï.

³ Xibi aagamu aanï gobai ix makïdï ibuayi kïkïïrhi ïmadï oki gïn kukuntakai. Gokïdï go kïïrhi gï agai ix ibuadagi ix tumaxi ïr sïïrhi oñigadï bïïtarï dai mai daidagi ix abhana boiya ïgai. Dai podukai ïpï go oki gï agai xi ibuadagi ixtumaxi ïr sïïrhi kunadï bïïtarï dai mai daidagi ix abhana boiyagi ïpï.

⁴ Gokïdï go oki mai bia sïïrhikami ix tïanïdagi ïïgi tukugadï dai podukai ïpï go kïïrhi mai bia sïïrhikami ix tïanïdagi ïïgi tukugadï ïpï. Gokïdï bïï goka bia sïïrhikami ix ïïgiada aduñdï tudu.

⁵ Odami ix makïdï ïr gïn kukunakami maiti gï aagai ix daidagi aduñdï ix abhana boiyagi tudu. Mosïkaxi ix maiti ipïrhiada ïgai ix ïmapi bopodagi chïki tasai sai kïïgioma gadaanïna ïgai Diuxi, aidï gia bhaiga ïgai xi aatagadagi dai bhaiduñagi ñoki ix mai ïmapi bopobagi dïï mosïkaxi chïki tasai bïïtarï. Dai gokiïrï ka nato daanïkai ïgai Diuxi chïki tasai aidï gia gï agai ix ïmapi bopodagi ïgai. Tadu báí go diabora sai soimaaxi ibuadana ïmai ïmadï.

⁶ Gïn aagidi aanï go ñoki gobai aagaitai odami ix makïdï ka kukuna sai maatïkana aapimï sai bia oigaragai odami ix kukuntagi. Dïï gia ipïrhidi aanï sai maatïkana aapimï sai maiti ïr gubuakïdï ix gïn kukuntagi. Bia oigaragai ix ïjïgi óídakagi ïpï.

⁷ Daiñi, aanï ïïgi daja gin maakaitai gubukarhigai Diuxi xi ïïgi biyagi aanï dai po in ïrhidi aanï sai kïïgadukatadai ix ïjïgi bimudai bïïxi buaboitudadami. Dïï mai ïmadugan dukai maa Diuxi gubukarhigai bïïxi óídakami. Ïïmoko maa ïgai gubukarhigai ix gïn kukuntagi dai jaa maa ïgai gubukarhigai ix ïjïgi oidakagi.

⁸ Xibi idi ñoki ïr bïïtarï aapimï ix makïdï mai kia gaïmadï bii dai ïmadï ix makïdï kukunatadai dai ka muu aduñdï. Aapimï ïr kïïga ix ïjïgi biiyagi ïpïan dukai aanï.

⁹ Dïï gia ix maiti ixtutuidikïdagi ïmoko ix ïïgi oidakagi aidï gia gï agai ix gï kukuntagi dai mai xu ix kabami gï bapainxadagi tïgibudagai ix abhana boiyagi ïmai.

¹⁰ Xibi bia aanï ïmo ñoki bïïtarï ix makïdï ka kukuna. Aapimï oki, gïn tïanïi aanï gubukadadïkïdï gïr Bhaitï Kïakamiga sai mai dagitona aapimï gïn kukuna.

¹¹ Dai xïduñada dagitoagi ïmoko kunadï aidï gia gï agai ïgai ix ïïgi biiyagi dai mai gaagagi ïmai. Dai ix ïmadï biiya ïrhiada gï aagai ix ïïgi kunadï ïmadï biyagi ïpamu. Dai pomaaxi kïkïïrhi ïpï. Ïgai maiti gï agai ïpï ix dagitoagi aduñdï.

^12-13 Xibi bia aanï ïmo ñoki ix makïdï mai aagaiña Gïr Nukadakami ïkioma. Dai idi ñoki ïr go gaa buaboitudadami bïïtarï ix makïdï gaïmadï daraka dai aduñdï mai kia buaboitudai. Daiñi, aanï ïr otosadï Suxi Kristo dai aanï aagai sai ix bhai aagagi gï aduñi ix makïdï mai buaboitudai ix gï ïmadï dakagi aidï gia aapi maiti gï agai ix dagitoagi. Dai mai xudu xi ïr okikagi aapi xi ïr kïïrhikagi ïpï. Gï agai ix ïmadï dakagi aapi gï aduñi ix bhai aagagi ïgai.

¹⁴ Kaxkïdï tudu ïmo kïïrhi ix makïdï mai buaboitudai kaxi ïr ïkobai dasadï Diuxi ïmadï dakatai ïgai ïmo oki buaboitudadami. Dai podukai ïpï ïmo oki ix makïdï mai buaboitudai kaxi ïr ïko dasadï Diuxi ïmadï dakatai ïmo kïïrhi buaboitudadami ïpï. Ix maiti ïr buaboikamudai podukai aidï gia Diuxi mai kïïgakïrï nïijadamudai maamaradï. Dai kïïga maatï aatïmï sai maamaradï ïmo buaboitudadami ïr ïko bubaidadï Diuxi ïpï dai Diuxi kïïgakïrï nïidi.

¹⁵ Dïï tomax dukai ix ïmoko ix makïdï mai buaboitudai dagito ïrhiada aduñdï ix makïdï gia buaboitudai maiti gï agai xi sobhidagi. Gï agai xi dagitoagi sai ïko imiagi ïgai. Go buaboitudadami maiti gï agai ix gubukadakïdï aagiadagi sai ïmadï dakana. Ix gubukadakïdï aagidagi ïgai sai ïmadï dakana kïïga kokoada antaada ïgai tudu dai Diuxi ipïrhidi sai kïïgakïrï xioma óídakagi buaboitudadami maiti gïn kokodatai.

¹⁶ Dïï gia xi ixtutiadagi ïmo buaboitudadami gï agai xi ïmadï biyagi aduñdï. Maiti gï maatï tudu ïmo kïïrhi xiïpï ïmo oki ix bhai mai buaboituda antaada ïmadï dakatai ïmo buaboitudadami ïpï.

¹⁷ Gin aaduñi, ix maaxkatadai aapimï aidïxi tukamïrï gïn báí Diuxi mai kia buaboitudakai podukai gï agai ix biyagi aapimï.

¹⁸ Dukami ix kaxi ïr circuncidadugatadai aapi dai buaboitu maiti gï agai ix ipïrhiadagi aapi ix jaa mai circuncidadugami dukai gï nïijadagi. Dai ix mai circuncidadugatadai aapi dai buaboitu maiti gï agai aapi ix gï circuncidandoagi ïpï.

¹⁹ Diuxi bïïtarï maiti ïr ixtumaxi ix circuncidadugakagi ïmoko ix cho ïpï. Mosïkaxi ipïrhidi Diuxi ix ïïgiadagi aatïmï. Gobai gia namïga ïgai bïïtarï.

²⁰ Gin aaduñi, ix maaxkatadai aapimï ïkioma dai buaboitu gï agai ix mo maaxkagi aapimï.

²¹ Dukami ix ïr ïmo pioñikatadai aapi soigaxikami dukai maiti gï agai ix buamï ïrhiada gokïdï. Dïï gia ix oidakagi ix dukatai busiagi abhiadïrï sai ka maiti ïr pioñikagi podukai kïïgadu gobai.

²² Pomaaxi buaboitudadami ibhïgadïkïdï ïpï. Daiñi, ix makïdï ïr pipioñikatadai dai buaboitu gïr Bhaitï Kïakamiga ka kïïgakïrï bubuakïi sai ka mai tïanïna go diabora. Dai podukai ïpï ix makïdï maiti ïr pipioñikatadai dai buaboitu gïr Bhaitï Kïakamiga ka pipioñigadï bii Suxi Kristo dai Suxi Kristo bia sïïrhikami ix tïanïdagi xibi.

²³ Sïïrhikïdï gïïpi aa namïki Diuxi dai gïn sabïrhi tudu dai kaxkïdï xibi ïr pipioñigadï aapimï Diuxi dai ka mai bia sïïrhikami ix ïïgiadagi tïgibudadï oidigi daama óídakami.

²⁴ Gin aaduñi, gïn tïgitobïrai ix tumaxi gïn aagidi aanï. Gïn aagidi aanï tudu sai ix maaxkatadai aapimï dai buaboitu gï agai ix mo maaxkagi aapimï kia urabaitai Diuxi. Dukami ix makïdï ïjïgi darakatadai gï agai ix ïjïgi biyagi dai ix makïdï ïmadï darakatadai ïmai gï agai ix apia ïmadï óídakagi. Dai podukai ïpï ix makïdï ïr ïmo gapioñikatadai gï agai ix apia ïr pioñikagi. Dai ix maiti ïr pioñikatadai maiti gï agai ix gaagagi ïmo amudï. Ïïgi ix maaxkatadai ïmoko dai buaboitu gï agai ix mo maaxkagi kia buaboitudakai.

²⁵ Xibi maakimu aanï ñoki ix makïdï mai kia kukuna. Dai tomaxi Gïr Nukadakami maiti gïr maa ñoki idikïdï dïï gia kïï tuiga ïgai gin bïïtarï dai gin maakaiña gubukarhigai ix kïï sïïrhi ñokada aanï kaxkïdï gï aagai ix buaboitudada aapimï gin ñoki.

^26-27 Daiñi, nïidiña aanï sai xibi tuigako kabami soi gïr buididiña jaa. Gïr kïïdai ïgai buaboitudadamikatai aatïmï tudu dai xijaiga gïr oidakaragai. Dai kaxkïdï aanï pokaiti sai maiti gï agai xi aatïmï buaboitudadami ibuadagi ixtumaxi ixtukïdï bamioma xijiakagi gïr oidakaragai. Kaxkïdï ix ka oñiakagi ïmo kïïrhi xioma ïr kïïga ix mai dagitoagi dai podukai ïpï ix mai oñiakagi kia xioma ïr kïïga ix mai oñtagi sai mai bamioma xijiakagi oidakaradï.

²⁸ Dïï gia bïïxkïrï ix oñtagi ïmo kïïrhi maiti ïr soimaaxi gobai dai podukai oki ïpï. Ix kunatagi oki maiti ïr soimaaxi ïpï. Dïï gia odami ix makïdï kukuna gïïpi bamioma xijaiga oidakaradï. Naana maaxi bia ïgai xijaigakami tudu. Kaxkïdï pokaiti aanï sai xioma ïr kïïga ix ïïgi biyagi ïmoko sai mai kabami xijaigakagi oidakaradï.

²⁹ Gin aaduñi, gïn aagidamu aanï ix tïiya ïrhidi go ñoki ix makïdï gïn maa aanï. Daiñi, ka mai xii mui tasai gïr bii tami idi oidigi daama ix kaxkïdï gï agai ix kïïga gïr urabakatai óídakagi Diuxi Gïr Nukadakami ïmadï. Ix makïdï ïmadï daja aduñdï maiti gï agai ix otïrhioma urabagi Diuxi kabami tïgito aimïraitai aduñdï tudu.

³⁰ Dai ix soi gï ïrhiadagi ïmoko xiïpï ix kïïga bhai gï ïrhiadagi maiti gï agai ïgai ix kabami tïgito aimïradagi soi ïrhiaradï xiïpï bhai ïrhiaradï ïpï. Maiti gï agai ïgai ix dagitoagi soi ïrhiaradï xiïpï bhai ïrhiaradï ix sobhidagi sai urabagi ïgai Diuxi.

³¹ Maiti gï agai ix tïgito ajiopada aatïmï ix tumaxi bia aatïmï tami idi oidigi daama tudu. Kaxkïdï tudu idi oidigi otoma ugiti agai.

³² Ipïrhidi aanï ix aapimï buaboitudadami mai buamï gïn ïrhiadagi tomarhi ïmo ixtumaxikïdï ix makïdï oidaga tami idi oidigi daama. Kaxkïdï gïn aagidi ix bamioma ïr kïïga ix ïjïgi biyagi aapimï ix makïdï mai kia gaïmadï bii. Kaxkïdï tudu kïïrhi ix makïdï mai oñiga bhaiga ix tïgito aimïradagi Diuxi dai ibuadagi ixtumaxi bhai ïrhidi ïgai.

³³ Dïï gia kïïrhi ix makïdï oñiga mai podukai ibuayi. Ïgai tïgito aimïraiña oñigadï ibuadatai ixtumaxi bhai ïrhidi ïgai bhaiyoma.

³⁴ Go kïïrhi oñiakami gokapadïrï bia ix tïgito aimïradagi, Diuxi apadïrï dai oñigadï apadïrï ïpï. Dai pomaaxi go oki ïpï. Oki ix makïdï ka mai kukuna ïmadï oki ix makïdï mai abhana boi kïïrhi kia bïï goka kïïga tïgito aimïraiña Diuxi ïpï ibuadatai ixtumaxi bhai ïrhidi ïgai. Mosïkaxi Diuxi bïïtarïkana ïgai tukugadï ïmadï tïgibudadï ïpï. Dïï gia kunatakai go oki ibuada ïrhidiña ixtumaxi bhai ïrhidi kunadï dai kaxkïdï tïgito aimïraiña ixtumaxi oidaga tami idi oidigi daama.

³⁵ Gïn aagidi aanï go ñoki aagaitai go kukuntaragai mai xu ix gïn daidadagi aanï ix gïn kukuntagi dai bhaiyoma gïn aagidi aanï gïn soiña in ïrhiditai. Ipïrhidi aanï sai kïï bhai maaxkami dukai óídakagi aapimï tudu dai sai mai tipukagi tomarhi ïmo sobhidaragai ix ibuadagi aapimï ixtumaxi bhai ïrhidi Diuxi.

³⁶ Xibi gïn maakimu aanï ïmo ñoki aagaitai oki ix makïdï mai kia kuna. Kïï maatï aanï sai ïïmadutai aapimï kïkïïrhi mai tïtïgai ix dukatai ibuadagi gïn maamara oki. Daiñi, ix po gï ïrhiada ïmo kïïrhi sai mai kïïga ibuayi mai dagitokatai maradï ix kunatagi ka okimuimikatai ïgai aidï gia gï agai ix dagitoagi ix kunatagi. Maiti ïr soimaaxi gobai.

³⁷ Dïï gia ix kïïga buaboitudai ïmo kïïrhi sai bamioma ïr kïïga ix mai kunatagi maradï aidï gia kïï ibuayi ïgai mai dagitokai ix kunatagi. Ix mai tipukagi tudu xorai pokaitadagi sai gubuakïdï bia ix kunatagi ïgai.

³⁸ Ïmo kïïrhi marakami oki ix gamaakiagi ïgai maradï kïïga ibuayi tudu dai ix mai maakiagi bamioma kïïga ibuayi. Tomax dukai kïïga ibuayi ïgai di. Kïïga ibuayi ïgai ix dukatai ïgai buaboitudai saidi ïr sïïrhi tudu.

³⁹ Ïmo oki kunakami bia ix ïmadï oidakagi asta xïxkadï ukami oidakagi kunadï. Dïï gia ix mukiagi kunadï aidï gia bia ïgai oigaragai ix ïmadï biyagi tomax makïdï kïïrhi ix ïr buaboitudadami go kïïrhi tudu.

⁴⁰ Dïï gia bïïxkïrï po in ïrhidi aanï sai bamioma bhai gï ïldamu go oki ix ïïgi biyagi bhaiyoma. Dai kïïga buaboitudai aanï sai Diuxi Ibhïadï ïgai dai gin maa tïgibudagai ix podukai gïn aagidagi aanï.