1 Korintios 6 - Northern Tepehuan Bible

Maiti gï agai buaboitudadami xi baan tutusadagi jaa buaboitudadami dudunukamiïrï

¹ Gin susukurhi, xïïxkadï mai kïïga iduñagi ïmo buaboitudadami ïmai buaboitudadami bui ¿Ix tuixi dudunukamiïrï baan kïkïsai aapimï sai bhai buadana? ¡Gobai ïr ïmo buirudagai! ¡Go dudunukami maiti ïr buaboitudadami di! Bhaiyoma go buaboitudadami gï aagai xi ïïgi bhai duñagi.

^2-3 Kïïga abïr gïn tïtïgitoda tudu ix aatïmï buaboitudadami dudunukami dukai darakamu gokiïrioma dai aagamu ix tumaxi ïr sïïrhi ix gïn buadagi óídakami ix makïdï mai buaboitudai. Dai asta aagadamu aatïmï ix tumaxi ïr sïïrhi Diuxi tïtïañikarudï bïïtarï ïpï. Dai gobai sïïrhikïdï ïr ïmo gïdukami aaduindagai ka agai. Kaxkïdï tudu xibi ¿Dukatai maiti ixtutuidikïi aapimï ix bhai buadagi ñoki go buaboitudadami bïïtarï? ¡Gobai mos ïr arhidukami aaduindagai di! ¡Mos ïr tami idi oidigi daama aaduindagai gobai tudu!

⁴ Kaxkïdï xïïxkadï biakagi aapimï xi bhaibuadagi ïmo ñoki ¿Tuixi baan gugukaiña aapimï go dudunukami bui ix makïdï maiti ïr buaboitudadami? Ïgai mai bia sïïrhikami ix ïr bhaitï gukakamikagi go buaboitudadami bïïtarï tudu.

⁵ ¡Xaïraraga ix pomaaxi ibuadagi aapimï! ¿Mai ix oidaga ïmo buaboitudadami ix makïdï kïï maatï gï tïgito dai bhaiga ix bhai buadagi ñoki gïn bïïtarï xïïxkadï gïn bupui ñokada aapimï? ¡Xadïrï mai oidakana gobai!

⁶ Dïï aapimï bhaiyoma bui surhigïiña ïïgi gïn aaduñi Diuxi amadïrï dai baan tutusaiña dudunukamiïrï sai ïgai bhai buadana gïn bïïtarï tomaxi maiti ïr buaboitudadami go dudunukami di.

Ix makïdï ïr soimaaxi buadami mai biaka agai oigaragai ix Diuxi tïanïdagi

⁷ Gin susukurhi, maiti gï agai xi dudunukamiïrï tutusagi gïn susukurhi Diuxi amadïrï. Daiñi, xïïxkadï podukai gïn bupui surhigiagi aapimï dai dudunukamiïrï baan tutusagi gïn susukurhi gobai itïiya ïrhidi sai kaxi gïn maitimi go soimaaxkami. Maiti gï agai tudu xi dudunukamiïrï tutusagi aapimï gïn susukurhi xïïxkadï soi gïn buidadagi xiïpï ix gïn bupuirumadagi.

⁸ Dïï aapimï bhaiyoma dudunukamiïrï tutusai ïïgi gïn susukurhi Diuxi amadïrï dai podukai ïïgi aapimï soi buididiña dai bupuirumadaiña gïn susukurhi. ¡Gïïpi soimaaxi ibuayi aapimï pobuadatai di!

⁹ Gï aagai ix kïï sïïrhi gïn tïgitokagi aapimï maatïkatai sai soimaaxi buadami mai biaka agai oigaragai ix Diuxi tïanïdagi. Daiñi, odami ix makïdï aipakoga boopoiña jaa ïmadï mai biaka agai oigaragai ix Diuxi tïanïdagi. Dai podukai ïpï ix makïdï buaboitudai uubixi, dai ix makïdï abhana boyiña oñigadï ïmai, dai ix makïdï ïïgi gïn ïmadï boopoiña kïkïïrhi dai oki ïpï,

¹⁰ dai ix makïdï ïïxiboga, dai ix makïdï koimudadï tutuiga, dai ix makïdï nabaakoitïrïga, dai ix makïdï gïpiïrï bupai jaa yaatagikïdï, dai ix makïdï bupuirumadai jaa. Tomarhi ïmadutai ïgai mai biaka agai oigaragai ix Diuxi tïanïdagi.

¹¹ Dai ïïmadutai aapimï pomaaxkana ïkioma ïpï. Dïï gia xibi ka buaboitu aapimï Suxi Kristo Gïr Nukadakami dai xibi Diuxi Ibhïadï ka gïn abhana ayi ix kaxkïdï ka buañixi aapimï dai kïïgakïrï gïn nïidi Diuxi dai xibi ka ïkobai darasadï aapimï Diuxi.

Ipïrhidi Diuxi sai gïr tukugakïdï ibuadagi aatïmï ixtumaxi bhai ïrhidi ïgai

¹² Mui odami pokaitiña sai bïïxi ixtumaxi ix makïdï mai daidarxi bhaiga ïgai ix ibuadagi. Dïï aanï aagai sai tomaxi mai daidarxikagi bïïxkïrï ïïmo ixtumaxi maiti ïr soiñi ix ibuadagi ïmoko. Daiñi, ïïmo ixtumaxi gïr maitïkïi xïxkadï ibuadagi aatïmï dai gokiïrï dudatai ibuada ïrhidiña aatïmï ïpamu. Dai aanï maiti gin dagitomu ix gin maitagi tomarhi ïmo ixtumaxi podukai. Kaxkïdï bhaiyoma maiti ibuayi aanï ïïmo ixtumaxi.

¹³ Dai jaa ikaiti ïpï sai bhaiga odami ix ibuadagi ixtumaxi ipïrhiadagi gïr tukugakïdï. Ikaitiña ïgai sai mai tïbïpi kabaka agai gïr tukuga ix kaxkïdï Diuxi mai buamï ïrhidi gïr tukugakïdï. Ïgai ikaitiña sai, —Ixtumaxi ugiagi ïmoko mos gïr bokïrï bapakïi. Pomaaxi bïïtarï gïr boka— ikaitiña. —Dai tomax dukai gokiïrï Diuxi xia duada agai go kuadagai ïmadï modukai gïr boka ix ka mai tipukamu gobai. Kaxkïdï mai xudu tomax tuma ugia ïrhiada aatïmï. Tomax dukai mai tïbïpi kabaka agai tomarhi gïr boka tomarhi go kuadagai di— ikaitiña. —Dai gïr tukuga pomaaxi ïpï— ikaitiña. —Tomax dukai xia gï duadamu gobai kaxkïdï mai buamï ïrhidi Diuxi tomaxi ïmadï boiyagi aatïmï xorai ipïrhiadagi aatïmï. Tomax dukai mai tïbïpi kabaka agai gïr tukuga di— ikaitiña ïïmoko. Dïï mai pomaaxi bïitarï idui Diuxi gïr tukuga sai soimaaxi ibuada aatïmï ïgaikïdï. Gïr idui saidi ibuadana aatïmï ixtumaxi bhai ïrhidi Gïr Nukadakami bhaiyoma. Dai Gïr Nukadakami ipïrhidi sai ibuada aatïmï ixtumaxi ïr soiñi gïr tukuga bïïtarï. Kïïga buamï ïrhidi Diuxi gïr tukugakïdï tudu.

¹⁴ Kïï maatï aatïmï tudu sai ïïgi gubukarhigadïkïdï duduakatulda agai ïgai gïr tukuga ïpïan dukai ix duakaturhi ïgai go Suxi. Kaxkïdï maatiga maaxi sai gia buamï ïrhidi Diuxi ix dukatai gï buadagi gïr tukuga.

¹⁵ Gï aagai tudu sai kïï sïïrhi gïn tïgitoka aapimï sai bïïna daraka gïr tukuga Suxi Kristo. Kaxkïdï ¿Dukatai ïr sïïrhi ix bïïnagi aatïmï ïmo oki kïkïïlmïrhiakami Suxi Kristo tukugadïkïdï? ¡Xadïrï ïr kïïgadukana podukai!

¹⁶ ¿Maiti mïx tudu maatï sai xïïxkadï ïmo kïïrhi bïïnagi ïmo oki kïkïïlmïrhiakami sai ka ïmo odami dukai bipiïyi ïgai? Daiñi, Diuxi agaitadai kïkïïrhi ïmadï oki xudu ïma bipiïdagi ïgai tudu daidi ikaiti ojadïrï sai, Ïmo odami dukai bipiïyi ïgai xudu gïn bïpïïnagi ïgai, ikaiti go ojai.

¹⁷ Dïï gia oidaga ïmai bïïnaragai ix makïdï gïïpi ïma maaxi. Daiñi, odami ix makïdï bïïna daraka Suxi Kristo ïmo odami dukai bipiïyi ïgai ïmadï ibhïgadïkïdï.

¹⁸ Gin susukurhi, gï aagai xi otoma mïkaxi biagi aapimï go soimaaxi tïgibudagai ix makïdï gïn bapaidimi ix abhana boiyagi ix makïdï maiti ïr sïïrhi. Daiñi, ïma maaxi soimaaxkami ix makïdï iduñagi ïmoko mai tukurhimadai tukugadï. Dïï gia odami ix makïdï abhana boiyagi ïmai ix makïdï maiti ïr sïïrhi, ïgai gia tukurhimadai tukugadï ïïgi.

¹⁹ Kïï sïïrhi abïr gïn tïgitoka tudu sai gïn tukuga ïr Diuxi Ibhïadï bakidï dukai gïn ïrana dakatai ïgai. Dai Diuxi ïgai dai gïn maa ïïgi Ibhïgadï sai gïn ïmadï dakana. Kaxkïdï ka mai bia aapimï sïïrhikami ix ïïgi gïn tïanïdagi aapimï.

²⁰ Dai bhaiyoma xibi Suxi aa namïki ixtumaxi gï agaitadai dai gïn sabïrhi ix kaxkïdï xibi ïgai tuidadï aapimï. Kaxkïdï gïn tukugakïdï abïr maaxitudagi xïïxi ïr gïdukami Diuxi xibi. Podukai abïr ibuada ïmo xadutudaragai dukai ïgai bïïtarï.