1 Korintios 5 - Northern Tepehuan Bible

Pabora pokaiti sai go buaboitudadami maiti gï agai ix urabagi ïmo soimaaxi ibuadami

¹ Gin susukurhi, sïïrhikïdï gï aagai ix ïmadukai gïn tïtïgitoagi aapimï. Daiñi, kajioma aanï sai ïmadutai aapimï gïïpi soimaaxi ibuayi. Ïmadutai aapimï as ïïgi ïmadï daja ogadï oñigadï. ¡Sïïrhikïdï xigalnaxi gobai podukai! ¡Tomarhi go odami ix makïdï toma lïïchi mai maatï Diuxi mai taadaga ix pomaaxi ibuadagi di!

² Dai tomaxi gïn saagida daja go soimaaxi buadami bïïxkïrï aapimï ïïgi gïgïrdukïdï gïn ïrhidi. Gï agaitadai bhaiyoma ix soi gïn ïrhiadagi aapimï. Maiti gï agaitadai ix daadagitoagi aapimï ix gïn urapïkïdagi go soimaaxi buadami.

³ Aanï gia aagai sai ajïga ïgai gïgïbidaragai. Aanï ïr otosadï Suxi ix makïdï ïr Gïr Nukadakami dai gin sïïrhikamiga namïga amïka ukami xako daraka aapimï tomaxi aanï mïkaxi daja. Kaxkïdï aagai aanï sai ajïga gïgïbidaragai.

^4-5 Gin susukurhi, ipïrhidi aanï ix kïïgakïrï busiagi go kïïrhi ix makïdï soimaaxi buayi. Kaxkïdï aanï aagai sai gï aagai ix gïn ïmpaidagi aapimï ix makïdï ïr buaboitudadami maatïkatai sai bia aapimï gubukarhigadï Suxi Gïr Nukadakami dai maatïkatai ïpï sai gin sïïrhikamiga namïga asta mïïka xako daraka aapimï ïpï. Dai gïn ïmpaidakai aapimï abïr maigobai imituda go soimaaxi buadami sai ka mai biakagi urabaragai gïn ïmadï. Podukai ïkobako bimu ïgai xako gatïanïi go Diabora saagida go odami ix makïdï mai buaboitudai baidi go Diabora biakamu oigaragai ix soimaaxi taatamituldagi tukugadï asta moduu mukukai ïgai. Gï aagai tudu ix maigobai otosagi go kïïrhi podukai gubukarhigadïkïdï Suxi Gïr Nukadakami sa bhai ïmadukai gï tïgitona ïgai dai kïïgakïrï busaiña ibhïgadï dibiakai Suxi Gïr Nukadakami.

Go Pabora potïtïdai go buaboitudadami sai gï agai ix gïn tïgito nïijadana sai maiti gïn saagida darakagi soimaaxi buadami

⁶ Maiti gï agaitadai ix gïgïrdukïdï gïn ïrhiadagi dai pokaitadagi ix kïïga ibuayi aapimï tudu kia gïn urabakatai go soimaaxi buadami. Tadu daibusai aapimïkïdï ixdukai ibuayi go kopodakarui. Daiñi, ix dukai lïïchi kopodakaruikïdï ka bïï sudakami kopodarïi ïmo tui dai mai xu mosïkaxi laalachi kopodarïi gobai podukai ïpï ibuayi go soimaaxi saagida buaboitudadami. Ïmo soimaaxi buadami bïïxi sarabiadan buayi bïïxi go gaa buaboitudadami ix makïdï urabagi ïgai tudu.

⁷ Gin susukurhi, aanï ïr ïmo judiu dai aatïmï judidiu bia ïmo bituldaragai ix makïdï ïr ïmo maaxidaragai gïr bïïtarï aagaitai go kopodakarui ïmadï go soimaaxkami. Xïxkadï ibuadagi aatïmï go Kïïgakïrï Bubaidaragai Bagimi maigobai dadasaiña aatïmï go kopodakarui gïr kiikiañdïrï bai podukai go utudui pan ix makïdï ibuayi aatïmï go bagimi bïïtarï mai biakagi toma lïïchi kopodakarui. Dai podukai ïpï aatïmï ix makïdï ïr buaboitudadami gï aagai tïxi maigobai dasagi bïïxi go soimaaxkami gïr saagidañdïrï sai podukai nïidiña odami sai ïr ïko bubaidadï aatïmï Diuxi. Dai podukai ix dukai koi go judidiu kañiñiru Daibuñigïrï sai mai aïna gïgïbidaragai ami Ejipituana podukai ïpï Suxi muu gïr bïïtarï sai maiti gïr aïna gïgïbidaragai ïpï. Kaxkïdï xibi gï aagai ix bïïxi maigobai dasagi aatïmï ix tumaxi ïr soimaaxkami ïpïan dukai ix go judidiu maigobai dasaiña go kopodakarui gïn kiikiañdïrï go Kïïgakïrï Bubaidaragai Bagimi bïïtarï.

⁸ Gï agai tudu ix gabagimaitai dukai óídaka aatïmï ix dukai ibuayi go judidiu go Kïïgakïrï Bubaidaragai Bagimi. Maiti gï aagai ix soi buidadagi aatïmï jaa tomarhi ix ibuadagi ïma maaxi soimaaxkami. Gï aagai bhaiyoma xi kïï sïïrhi ibuada aatïmï ixtumaxi dai aagagi mosïkaxi ixtumaxi ïr buaboi.

⁹ Baasïkioma gïn otoxi aanï ïmai ojai gïn aagiditai mïsai mai urapïkïda go soimaaxi buadami ix makïdï aipako boopoiña jaa odami ïmadï.

¹⁰ Dïï mai maatï kaï aapimï go ojai. Maiti gïn aagiditadai aanï sai mai urapïkïda aapimï go odami ix makïdï mai buaboitudai. Daiñi, oidaga soimaaxi buadami ix makïdï maiti ïr buaboitudadami dai oidaga jaa ix makïdï buaboitudadami gïn aagai dai apia ibuayi naana maaxi soimaaxkami kia. Dai tomax dukai bia aapimï ix urapïkïdagi go odami ix makïdï mai buaboitudai. ¡Kia tami idi oidigi daama óídaga aapimï di! Bia aapimï ix urapïkïdagi ïgai tudu tomax muidutai aipakoga boopoiña jaa odami ïmadï dai jaa koimudadï tutuiga dai ïxibuga dai jaa buaboitudai ubixi maaxi ïpï. Dai tomax dukai gï aagai ix urapïkïda aapimï ix makïdï mai buaboitudai tudu. Ix mai urapïkïda agadamudai aapimï gï agaitadai ix iimia aapimï tabhiadïrï idi oidigi daamaiñdïrï. Ïbogiami podukai mai uraba antaada aapimï ïgai. Kaxkïdï maiti gïn aagidi aanï mïsai mai urapïkïda aapimï ïgai ix makïdï mai buaboitudai.

¹¹ Mai xii kïï maatï kaï aapimï go ojai tudu ix makïdï gïn otoxi aanï baasïkioma aagaitai go soimaaxi ibuadami. Kaxkïdï xibi gia kïï sïïrhi gïn aagidamu aanï sai maatïkagi aapimï ix tïiya ïrhidi gobai. Daiñi, itïiya ïrhidi gobai sai mai urapïkïda aapimï go odami ix makïdï buaboitudadami gïn aagai dai bïïxkïrï naana maaxi soimaaxi ibuayi. Maiti abïr urapïkïda tudu ix makïdï buaboitudadami gïn aagai dai apia aipako boopoiña jaa ïmadï, dai koimudadï tutuiga, dai ïïxiboga, dai kia buaboitudai ubixi, dai gïpiïrï bupai jaa odami yaatagikïdï, dai nabaakorïiña. Maiti gï aagai ix urapïkïda aapimï tomarhi kuadagiïrï ix makïdï buaboitudadami gïn aagai dai pomaaxi ibuayi.

^12-13 Gin susukurhi, aanï mai bia sïïrhikami ix aagadagi ix bhai ïr soimaaxi buadami go odami ix makïdï mai buaboitudai. Gobai ïr Diuxi aaduindadï. Dïï gia go odami ix makïdï gia ïr buaboitudadami dai gïn urapïkïi ïgaikïdï gia ïr ïma dukai. Ïgaikïdï gia gï aagai ix aapimï aagadagi ix bhai ïr soimaaxi ibuadami ix cho ïpï. Daiñi, go Moiseskaru oja adukai ïïki sai, Maigobai abïr busaida go soimaaxi buadami gïn saagidañdïrï, ikaiti ojadï. Kaxkïdï gï agai aapimï xibi ix podukai ibuadagi ixdukai oja ïgai. Gï aagai ix maigobai busaida aapimï go soimaaxi buadami gïn saagidañdïrï tudu.