1 Korintios 4 - Northern Tepehuan Bible

Maiti gï agai odami ix aagadagi ix bhai kïï aatabuayi pipioñigadï Diuxi

¹ Gin susukurhi, aanï ïmadï go Apolos ïr ojotosadï Suxi Kristo. Dai gï aagai ix pipioñigadï Suxi Kristo dukai gïr nïijada aapimï. Kaxkïdï tudu ïgai gïr maa ïmo sïïrhikami xi kïïga aagadagi aatïmï go maatïtuldaragai ix makïdï ïïgi Diuxi maatïkana ïkioma.

² Dai kïï maatï aapimï sai ix makïdï biakagi ïmo sïïrhikami bia ix kïïga ibuadagi aaduindadï.

³ Dïï gia aanï mai buamï in ïrhidi ix tomax xorai nïijadagi gin aaduindaga aaga ïrhiditai ix bhai kïïga ibuayi aanï ix cho ïpï. Mai buamï in ïrhidi aanï ix aapimï aaga ïrhiadagi xiïpï ix dudunukami aaga ïrhiadagi ïpï. Tomarhi ïïgi aanï mai aagaiña ix bhai kïïga aatabuayi aanï di.

⁴ Daiñi, aanï po in ïrhidi sai kïï buañixikami dukai aatabuayi aanï dïï tomaxi po in ïrhidi aanï ¿Tumaxi namïga gobai? Mosïkaxi Diuxi ïgai dai aagai ix bhai kïïga ibuayi aanï ix cho ïpï.

⁵ Kaxkïdï abïr mai ïïgi aagada aapimï ïmai ix bhai kïïga aatabuayi mai kia dibiakai Suxi Kristo. Dagitobïrai bhaiyoma Gïr Nukadakami sai ïgai aagana dibiakai ïgai. Ïgai tudu maaxi aagamu ixtumaxi ïxtotai ibuadana odami dai asta tïgibudadï bïïxi maaxi aagamu ïpï dibiakai. Aidï gia Diuxi ïgai dai aagidamu ñoki bïïxi pipioñigadï ïïgi ix makïdï ñoki ajïakagi ïgai. Aagidamu ïgai bïïxkatai sai kïï idui aidï.

⁶ Gin susukurhi, gïn aagidi aanï go aatagi gobai gin aagaitai aanï ïïgi ïmadï go Apolos ix makïdï ïr gïn bhaitï gukakamiga sai podukai maatïkana aapimï ix dukatai kïïga ïïgiadagi Diuxi ojadï. Daiñi, ïïmoko aapimï mai kïï ïïgidimi Diuxi ojadï dai bhaiyoma gïgïrdukïdï gïn ïrhidiña ïïgi. Pokaitiña aapimï sai gïn bhaitï gukakamiga ix makïdï urabaka aapimï bamioma ïr namïakïdï ix bhai jaa bhaitï gukakamigadï. Gïgïrdukïdï gïn ïrhidiña aapimï ïïgi aagaitai gïn bhaitï gukakamiga tudu. Maiti gï agai podukai. Gobai maiti ïr ïïgidaradï Diuxi ojadï.

⁷ Maiti gï aagai ix gïgïrdukïdï gïn ïrhiada aapimï tudu. Daiñi, bïïxi ix tumaxi ix makïdï ixtutuidikïi aapimï ix ibuadagi Diuxi ïgai dai gïn maa gubukarhigai ix ibuadagi. Kaxkïdï ¿Ix tuixi gïgïrdukïdï gïn ïrhidi aapimï? ¡Mai ïïgi bia aapimï gubukarhigai ix ibuadagi tomarhi ïmo ixtumaxi di!

Go buaboitudadami Korintoïrï gïgïrdukïdï gïn ïrhidiña ïïgi ïgai dai soi dukai nïidiña Suxi Kristo ojotosadï

⁸ Gin susukurhi, sïïrhikïdï mai kïïgadu ix dukatai gïn tïtïitoi aapimï. Pobïnïrhidi aapimï ix ka maiti gïr tïgito aatïmï ix makïdï ïr Suxi Kristo ojotosadï. Pobïnïrhidi aapimï sai ka bïïxi bia ixtumaxi gïn iibhïdaga bïïtarï. Gïn bipidakami dukai gïn ïrhidi aapimï tudu gïn iibhïdagïrï. Dai asta gatïanïdan buayi aapimï ïpïan dukai ix kaxi gïn tïïgiditadai Suxi go sïïrhikami ix gatïanïdagi aapimï ïgai ïmadï. Reyes dukai gatïanïdan buayi aapimï tudu. Dïï maiti gïn maa Suxi sïïrhikami ix gatïanïda aapimï ïgai ïmadï kia. ¡Xïïxi ïr kïïgaikamudai ix kaxi gatïanïdamudai aapimï xibi Suxi Kristo ïmadï! ¡Ix ïr buaboikamudai ix kaxi gïn tïïgidamudai Suxi sïïrhikami ix gatïanïdagi aapimï aidï gia aatïmï ix makïdï ïr Suxi ojotosadï ka buimudai sïïrhikami ix gatïanïdagi gïn ïmadï ïpï!

⁹ Ga tïanïdan buayi aapimï tudu dïï aatïmï ix makïdï ïr ojotosadï Suxi mai namïakami dukai gïr nïidi jaa. Po in ïrhidi aanï sai podukai gïr darai Diuxi sai jaa mos gïr nïidiña ïpïan dukai xi ïr maamaixapikïdï aatïmï ix makïdï gïn kodituda agai gïr nïiditai bïïxi óídakami. Dai mai xu ix mosïkaxi odami gïr nïidi ïpï. Diuxi tïtïañikarudï gïr nïnïidi ïpï sa gïr duna.

¹⁰ Daiñi, aapimï pupuirugami dukai gïr nïidi aagaitai aatïmï Suxi Kristo dai sastudakami gïn ïrhidi ïïgi aapimï. Soi dukai gïr nïidiña aapimï. Dai pobïnïrhidi aapimï sai ïr gïgïrdukami aapimï jaa bïïtarï. Kïïga gïn xadutudai odami tudu dïï aatïmï gia maiti gïr xadutudai ïgai.

¹¹ Daiñi, aatïmï ix makïdï ïr ojotosadï Suxi Kristo dudatai bhiugikorïiña dai tonokorïiña. Potadakana aatïmï aidï abhiadïrï ix gïr aaga aatïmï gïr aaduindaga dai asta xibi ukami kia. Mui imidagai mai kïïga biakana aatïmï yukuxi ixtukïdï gïr ukadagi. Dai muiyoko gïr gïbaiña jaa dai mai biakana aatïmï ïïgi gïr kii ïpï aipakoga ajiopaitai.

¹² Kabami gaatabuadana aatïmï dai gamaitïkïiña ixtukïdï óídakagi. Xïïxkadï odami galnaaxi ñoki gïr aagadagi bhaiyoma mos daanïiña aatïmï Diuxi sai maakana ïmo bhai ïrhiaragai. Xïïxkadï odami soi gïr buidadagi aatïmï kïïga kabakatudaiña gïr ibhïdaga ix maiti gïr maitiagi soi ïrhiaragai.

¹³ Dai xïïxkadï odami gïpiïrï gïr bupadagi aatïmï bhaiyoma kïï bhai maaxkami dukai aa noraidiña. Xibi apia kia soi dukai gïr nïidi odami. Ïmo boixiki dukai gïr nïidi ïgai xiïpï ïmo daitubharu. Podukai gïr nïidi odami.

Go Pabora ipïrhidi xi go gaa buaboitudadami bïïnakami dukai oidakagi Suxi Kristo

¹⁴ Gïn ojidi aanï podukai aagaitai ix dukatai gïn tïtïitoi aapimï mai xu ix gïn xaïroiditai dai bhaiyoma gïn maakia iñïrhiditai ñoki. Gïn oigïdai aanï kaxkïdï gin maamara dukamikatai aapimï.

¹⁵ Daiñi, gïn oga gin dukami aanï Diuxiïrï. Aanï tudu ïgai dai gïn soi tukamïrï saidi buaboitudaiña aapimï Suxi Kristo gïn aagidakai aanï go bhai ïrhiaragai aatagi. Kaxkïdï tomaxi biakagi aapimï sïïrhikïdï mui odami xorai gïn tïïgidagi ñoki aagaitai Suxi Kristo, bïïxkïrï mos arhi ïmaduga ix makïdï ïr gïn oga dukai. Dai aanï ïr ïgai.

¹⁶ Kaxkïdï gïn maakai aanï ñoki xibi dai gïn daanïi sai gin ïpïandukai óídakagi aapimï.

¹⁷ Pomaaxi bïïtarï gïn otoxi aanï go Timoteo tudu. Ïgai gïn soiñamu ix gin ïpïan dukai óídakagi aapimï. Go Timoteo ïr gin maara Diuxiïrï ïpï dai kïïga oigïdai aanï. Ïgai kïïga aatabuayi ibuadatai aaduindadï Gïr Nukadakami. Dai gïn tïgitotuldamu ïgai ix dukatai oidaga aanï bïïna dakatai aanï Suxi Kristo. Dai mai xu ix ïma dukai aagai aanï ñoki dai ïma dukai ibuayi. Cho. Bhaiyoma ibuayi aanï ix dukai aagidiña aanï buaboitudadami ïmpaiñdaradïrï dai mai xu ix ïma dukai ibuayi aanï.

Pabora ipïrhidi xi ïma dukai gïn tïtïgitoagi go buaboitudadami Korintoana óídakami sai ïgai mai maakiagi ïmo gïgïbituldaragai

¹⁸ Gin susukurhi, kïïga maatï aanï sai ïïmadutai aapimï gïgïrdukïdï dukai ibuayi dai tomarhi mai duadikoi pobïnïrhiditai ix ka mai imimu aanï gamoko.

¹⁹ Dïï gia ix Diuxi ipïldagi otoma imimu aanï dai aidï gia nïidamu aanï ix dukatai aatabuayi ix makïdï gïgïrdukïdï gïn ïrhidi dai podukai maatïmu aanï sa bhai ïr buaboi sai bia ïgai Diuxi gubukarhigadï xi ïpï ix mos gïgïrdukïdï dukai ñokai ïgai.

²⁰ Tomax kaitiadagi ïmo odami maiti gï maatï sa bhai Diuxi ïgai dai tïanïi tudu. Dïï gia nïiditai aaduindadï podukai gia gï maatïkana ix bhai aatabuayi ïgai Diuxi gubukarhigadïkïdï gatïanïitai Diuxi.

²¹ Otoma mïï dibiamu aanï ix ipïrhiadagi Diuxi. Kaxkïdï ïma dukai abïr gïn tïtïgito aapimï sai maiti gïn bhagaidagi aanï imïkai gamoko. Daiñi, ix maiti gin ïïgiadagi aapimï dai mai ïma dukai gïn tïgito, aidï gia gïn maakimu aanï gïgïbituldaragai mïï dibiakai. Dïï gia ix ïma dukai gïn tïgitokagi aapimï dai gin ïïgiadagi, aidï gia kïïga oigïda ñokadamu aanï gïn bïïtarï mïï dibiakai. Ïïgi aapimï maatï ix maaxi imimu mïï dibiakai aanï tudu.