1 Korintios 3 - Northern Tepehuan Bible

Baasïkioma go buaboitudadami ïïgi gïn tïanïda ïrhidiña ix kaxkïdï ïr arhi gïn dukamikana dai mai bhaigakana ix maatïkajiagi bamioma xijiakami aatagi

¹ Gin aaduñi, baasïkioma aidïxi gïn ïmadï dakana aanï gïn tïtïgidiña aanï ñoki mai xijiakami. Mai bhaigakana aanï ix gïn tïïgidagi xijiakamioma aatagi mai kia kabakan imïitai gïn buaboidaraga. Kaxkïdï tudu kia ïïgiditadai aapimï go gaa óídakami tïgibudadï dai mai kïïga ïïgiditadai aapimï Diuxi Ibhïadï. Mai bhaigakatadai aanï ix gïn tïïgidagi ñoki bamioma xijiakami ix makïdï ïr bïïtarï odami ix makïdï kïïga ïïgidi Diuxi Ibhïadï tudu.

² Gïn aagidamu aanï ix maaxkatadai gobai. Daiñi, kïï maatï aapimï sai mai bhaiga oki ix ïmo kuadagai kabakami bhidagi ïmo arhi xïïñi dai bhaiyoma xiitudai ïgai arhidukatai ïgai kia. Dai pomaaxkatadai aapimï ïpï. Kia ïr xixïñi gïn dukamikana aapimï gïn buaboidaragakïdï. Mai bhaigakatadai aapimï ix maatï kaïkagi gubuakami aatagi kia. Kaxkïdï gï agaitadai ix gïn xiitudan dukai buadagi aanï dai gïn tïïgidagi mosïkaxi ñoki ix makïdï mai xijaiga. Dai apia kia xixïñi dukai maaxi aapimï xibi. Mai kia kabaka gïn buaboidaraga tudu.

³ Apia kia ïïgidimi aapimï go odami tïgibudadï gïn tïanïda ïrhiditai aapimï ïïgi. Kia gïn ïjïgakorïi aapimï dai gïn bupui ñokai aapimï ïpï. Kaxkïdï maatiga maaxi sai kia adaimïi aapimï go oidigi daama óídakami tïgibudadï.

Go Pabora ïmadï go Apolos bïï gokatai mos ïr pipioñigadï Diuxi

⁴ Ïïmoko aapimï pokaitiña sai gin urabaka dai jaa aapimï pokaitiña sai urabaka go Apolos. Dai mos adaimïi aapimï go óídakami tïgibudadï pokaititai aapimï.

⁵ ¿Tumaxiïrï ïr gïdukami go Apolos tudu ix urabakagi aapimï ïgai? ¿Dai tumaxiïrï ïr gïdukami aanï ix gin urabakagi aapimï ïpï? Daiñi, aatïmï mos ïr pipioñigadï Diuxi. Dai mos ibuadatadai aatïmï go aaduindagai ix makïdï gïr maa Diuxi dai gïn aagidi Diuxi ñokidï bai aapimï buaboitu.

⁶ Aatïmï maiti ïr gïgïrdukami tudu. Daiñi, go ñoki ix makïdï gïn aagidi aanï ïr ïmo ïxtokai dukai. Dai aanï mos ïr ïmo gaïsadami dukai gïn aagiditai Diuxi ñokidï dai go Apolos ïpï daamioma gïn aagidi Diuxi ñokidï xi kaxkïdï ïgai ïr ïmo gabaagadami ïxikami dukai. Dïï gia Diuxi ïgai dai gïïrhidi go ïxikami gïn buaboiturhitai.

⁷ Kaxkïdï maiti gï agai tudu ix gïgïrdukïdï dukai gïr aagagi aapimï tomarhi aagaitai go ïsadami xiïpï ix makïdï ïr gabaagadami dukai. Mos aagaiña aatïmï Diuxi ñokidï kaxkïdï. Diuxi ïgai daidi ïr gïdukïdï. Ïgai tudu gïïrhidi gïn buaboidaraga ïxikami dukai.

⁸ Aanï ix makïdï ïr gaïsadami dukai dai ïgai ix makïdï ïr gabaagadami dukai ïpï aagaitai Diuxi ñokidï mos ïr pipioñigadï Diuxi dai ïmapi gaatabuayi aatïmï. Dai kïïga gï maatï sai Diuxi maakimu bïïxi pipioñigadï maitïkidï xïïxi ajïga ïïmoko aaduindadï bïïtarï.

⁹ Aanï ïmadï go Apolos ïr pipioñigadï Diuxi tudu dai ïmadï aatabuayi aatïmï Diuxi dai aapimï ïr ïpïan dukami ïïxidï Diuxi. Gin aaduñi, kaxi aagai aanï sai aapimï ïr ïpïan dukami ïïxidï Diuxi dai xibi aanï aagai sai aapimï dai ïr ïpïan dukami Diuxi bakidï ïpï ix makïdï bañidimi ïgai.

Go tïtïgiadami ñoki gï aagai ix kïï gïn tïgito nïidagi ix tumaxi gatïtïïgiada agai

¹⁰ Daiñi, sïïrhikïdï kïï tuiga Diuxi dai gin maa gubukarhigai ix kaxkïdï kïï maatïtai gaatadui aanï gïn tïtïgiditai aatagi. Gïn aagidamu aanï ïmo maaxidaragai aatagi ix dukatai gaatadui aanï. Daiñi, aapimï ïr Diuxi bakidï dukai ix makïdï bañidimi ïgai dai aanï dáí go simientogadï gïn tïtïgiditai go aatagi. Dai xibi jaa gïn soikimi ïpï gïn buaboidaragïrï dai podukai bañidimi ïgai Diuxi kiupaigadï ïpï. Dïï gia daiñi, ix dukai ïmo kïsadami baki bia ix kïï gï tïgito nïidagi ix tuma dasa agadagi ami simiento daama podukai ïpï xorai gatïtïïgiada agadagi ñoki gï agai ix kïïga gï tïgito nïidagi ix tuma ñoki gatïïgida agai.

¹¹ Ïmo odami xudu bañida aagadagi ïmo baaki mos arhi ïmo simiento dadasai tudu dai mai xu mui. Dai pomaaxi gïr ñoki ix makïdï gatïtïïgidi aatïmï ïpï. Gïr ñoki mos arhi ïmo simiento bia dai ka dasaka gobai. Go simiento ix makïdï ka daja ïr Suxi Kristo dai ka mai bhaiga odami ix dasagi ïmai.

¹² Daiñi, xudu ïmo odami kïïsa aagadagi ïmo baaki gï aagai ix kïï nïidagi ïgai ixtuma dasa agadagi. Kïï bhaiga ïgai ix dasagi kabakami maaxi dukami oro xiïpï plata xiïpï ojodai maaxi kïï namïakami. Gobai gia kapaka dai mai xïbuayi tomarhi taikïdï. Dïï gia kïï bhaiga ïgai ïpï ix dasagi uxi maaxi ix bougïadï maaxi xiïpï basoi ix makïdï mai kabaka.

¹³ Dïï gokiïrï gï maatïka agai ix bhai kabakami bii aaduindadï ix cho ïpï. Dai pomaaxi ïmo gatïtïïgiadami ñoki ïpï. Kïsadami baki dukami ïgai gatïtïïgiditai ñoki. Dai kïï bhaiga ïgai ix gatïïgidagi ñoki ix makïdï ïr oro dai plata dai ojodai namïakami gï dukami. Gobai kïïga kabaka dai mai mïmïjïi tudu. Dïï kïï bhaiga odami ix gatïïgidagi ñoki ix makïdï ïr uxi dai bougïadï dai basoi dukami ïpï. Dai gobai gia mai kapaka dai kïï mïmïjïi. Dai gokiïrï dibiagai Suxi Kristo dai aagada agai xorai kïïga aatadui dai xorai mai kïïga aatadui. Aidï go táíkïdï nïijada agai ïgai sa bhai kïï aatadui go tïtïgiadami ñoki tudu.

¹⁴ Dai ix makïdï kabakami bii aaduindadï dai mai mïi ïgai gia kïïga buimu maitïkidï.

¹⁵ Dïï gia go gaa tïtïgiadami ñoki ix makïdï mïi aaduindadï, ïgai gia mai buimu toma lïïchi maitïki. Ïbogian dukai kïïgakïrï bubuakimu ïgai taiyañdïrï tudu ïpïan dukami ïmo odami ix makïdï mïiyagi bakidï dai ïbogian dukai busiagi ïgai dïï ka bïïxi mïïkai buxtuidadï.

Diuxi gïgïbitulda agai xorai soi buidadagi go buaboitudadami

¹⁶ Gin aaduñi, kïïga maatï aapimï sai aapimï ïr Diuxi bakidï dukai xako oidakami ïgai. Kaxkïdï tudu Diuxi Ibhïadï aapimïrï daja.

¹⁷ Diuxi ka ïkobai gïn darai aapimï ix makïdï ïr bakidï dukai. Ïkobai gïn darai ïgai saidi ïr ïïgi ïgai bïïtarïkana aapimï tudu. Kaxkïdï Diuxi gïgïbitulda agai xorai soi gïn buidadagi Diuxi tuidadïkatai aapimï.

Pabora aagidi go buaboitudadami sai gï aagai ix bhïiyagi ïgai Diuxi tïgibudadï

^18-19 Gin aaduñi, kïïga abïr gïn tïgito nïida dai bhïiyi go tïgibudagai ix makïdï ïr Diuxi tïgibudadï kaxkïdï tudu gobai kïïga ïr buaboi. Kaxi abïr mai oijada ïïgi gïn tïgibudaga tudu kaxkïdï tudu odami tïgibudadï gia yaatagïi. Ix saitudakami ïrhiada aapimï ïïgi gïn tïgibudaga ka bhïiyi aapimï ïmo yaatagi. Daiñi, mos ïr ïï buirudagai Diuxi bïïtarï go tïgibudagai ix makïdï óídakami saitudakami ïrhidi. Kaxkïdï gï aagai ix ïmadukai gïn tïtïgitoagi odami ix makïdï kïïga mamaatïkami gïn ïrhidi ïïgi oiditai tïgibudadï óídakami. Ïgai gï aagai ix ïma dukai gïn tïtïgitoagi dai buiyagi Diuxi tïgibudadï bhaiyoma tomaxi óídakami bupuirugami dukai nïijadamu gokiïrï. Ix bhïiyagi ïgai Diuxi tïgibudadï aidï gia sastudakami dukai biimu ïgai Diuxi bïïtarï. Daiñi, Diuxi ojadïrï ikaiti sai, Diuxi daadagitodai go odami sai bhaiyoma gïn bupuirumadaiña ïïgi go ix makïdï mamaatïkami gïn ïrhidi ïïgi.

²⁰ Dai ikaiti ïpï, Gïr Nukadakami kïï maatï sai tïgibudadï odami ix makïdï mamaatïkami gïn ïrhidi maiti ïr soiñi, ikaiti go ojai.

²¹ Gin aaduñi kïïga maatiga maaxi sai ka kïïga namïga aapimï Diuxi bïïtarï. Kaxkïdï maiti gï agai xi pobïnïrhiada aapimï ix urabakatai ïmo odami bamioma namïaka antaada aapimï. Ka darai ïgai bïïxi aïkatai ixtumaxi saidi ïr soiñikana aapimï buaboitudadami gïn bïitarï tudu.

²² Daiñi, asta aanï dai go Apolos dai go Piduru bïïxi gïr darai Diuxi sai gïn soiñana ïpï. Dai tomax tuma daibuñagi xibi xiïpï gokiïrioma, bïïxi gobai ïr soiñika agai gïn bïïtarï ïpï. Mai xudu tudu ix mui umigi kabakagi aapimï kia xiïpï ix otoma koiyagi aapimï. Bïïxi gobai ïr soiñika agai aapimï buaboitudadami gïn bïïtarï urabakatai aapimï Suxi Kristo.

²³ Daiñi, Suxi Kristo bïïna daja Diuxi dai aapimï bïïna daraka Suxi Kristo kaxkïdï mai xudu ix otoma ugitiagi aapimï ix tïbïpi kapakagi aapimï kia. Tomax dukai bïïxi ïr soiñikamu aapimï gïn bïïtarï. Ka kïïga bia aapimï bïïxi aïkatai ix makïdï ïr namïakami bïïna darakatai aapimï Suxi Kristo tudu. Kaxkïdï kïïga maatiga maaxi sai ka kïïga ïr namïakami aapimï Diuxi bïïtarï. Dai kaxkïdï ïpï ¿Dukatai bamioma namïakana aapimï mos urabakatai aapimï ïmo odami?