1 Korintios 2 - Northern Tepehuan Bible

Go Pabora kïïga aagidiña aatagi sai odami maatï kaïkana

¹ Gin aaduñi, gïn tïgitobïrai ix tumaxi gïn aatagidiña aanï baasïkioma aidïxi tukamïrï gïn dibiji aanï dai gïn aagidi ix kaiti Diuxi ñokidï. Mai xu xi ïmo odami saitudakami dukai gïn aatagidiña aanï aidï dai maiti gïn aatagidiña aanï tami idi oidigi daama óídakami tïgibudadïkïdï ïpï.

² Bhaiyoma podukai gin tïgito aanï ix gïn aagidagi mosïkaxi aatagidï Suxi ix makïdï ïr Diuxi Otosadï dai ix makïdï kuruxiana gï xixatu. Ïgai tudu ïr gïr Bhaitï Kïakamiga dai mosïkaxi ïgaikïdï gïn aatagidiña aanï.

³ Dai mai gubuakan taadakana aanï aidï gïn dibidakai dai asta gigibukïiña aanï duadikuitai gïn maakaitai ñoki.

^4-5 Kaxkïdï gï maatï sai Diuxi Ibhïadï gubukadadï ïgai ix makïdï kabami aatadui gin ïmadï amïka gïn saagida dakatai aanï aidï dai mai xu xi ïïgi aanï idui go aaduindagai. Ipïrhiditadai aanï xi buaboitudaiña aapimï Diuxi, kïï gubuakatai ïgai tudu dai mai xu xi buaboitudaiña aapimï oidigi daama óídakami tïgibudadï. Kaxkïdï maiti gïn aagidiña aanï aatagi ix makïdï óídakami saitudakami dukai kaïkagi.

Go gaa óídakami buirudagai dukai kaïkana go Diuxi aatagidï dïï gia Diuxi Ibhïadï soikïi buaboitudadami sai maatï kaïkana

⁶ Daiñi, xïïxkadï gamamaakadagi aanï aatagi buaboitudadami ix makïdï kaxi kabakami imïi buaboidaradï aidï gia aagidiña aanï tïgibudagai bamioma saitudakami ix makïdï Diuxiañdïrï imïi. Dïï gia tami oidigi daama óídakami xadïrï saitudakami ïrhidiña go tïgibudagai ix makïdï Diuxiañdïrï imïi. Ïma maaxi tïgibudagai gobai kaxkïdï. Dai go gupudagai bipiakami ïpï pobïnïrhidi ix mai saitudaga go tïgibudagai ixtukïdï gamaakaiña aanï aatagi. Dïï go gupudagai bipiakami mai tïbïpi kapaka agai dai gubukadadï ugiti agai ïpï.

⁷ Go tïgibudagai ix makïdï aagai aanï ïr Diuxi tïgibudadï ix makïdï odami mai maatïkana ïïki abhiadïrï. Gïn aagidamu aanï ix dukatai kaatï go Diuxi tïgibudadï. Daiñi, ïïki mai kia kïkibakai oidigi Diuxi ka podukai gï tïgito dai podukai dáí saidi Suxi Kristo bhai buadana ixdukatai gïr aïna gïïpi xadutudaragai. Gobai tudu ïr Diuxi tïgibudadï ix makïdï odami mai maatïkana ïïkioma.

⁸ Dai go gupudagai bipiakami tami idi oidigi daama bïïxi mai maatïkatadai ix tumaxi gï tïgitokatadai Diuxi ïpï. Ix maatïkamudai ïgai aidï gia maatïkamudai ïpï sai Gïr Nukadakami bïïxi adaama ïr namïakïdï dai ka mai tañimudai ïgai kuruxiana xixaragai.

⁹ Dïï aatïmï buaboitudadami gïr bïïtarï gia ïr buaboi ix dukatai ojixi ïïki Diuxi ñokidïrï. Ami ikaiti sai, Ka bhai darasakami bia Diuxi naana maaxi ixtumaxi bïïtarï odami ix makïdï oigïdai Diuxi. Bhai darasakami bia ïgai naana maaxi ix makïdï tomarhi ïmo odami mai nïidiña dai mai kajioma dai mai tïgitokana ïpï, po tudu kaiti Diuxi ñokidï.

^10-12 Diuxi gïr maa ïmo gïdukami oidaragai tudu ïïgi bhai ïrhiaradïkïdï. Dai ipïrhidi ïgai ix maatïkagi aatïmï ix tumaxi gïr maa ïgai kaxkïdï gïr otoxi ïgai Ibhïadï sai gïr maatïtuldana. Daiñi, ïïki abhiadïrï ïxtokikana Diuxi tïgibudadï saitudagakami dïï gia Diuxi Ibhïadï bïïxi maatï ix tumaxi gï tïtïitoi Diuxi dai ïgai gïr maatïturhi tïgibudadï ipïrhiditai ix maatïkagi aatïmï ïpï. Gïn aagidamu aanï ix maaxi gobai. Daiñi, mai tipu ïmo odami ix maatïkagi tïgibudadï ïmai, mosïkaxi ïïgi ïgai maatï. Dai pomaaxi Diuxi ïpï, mosïkaxi Diuxi Ibhïadï ïgai dai maatï Diuxi tïgibudadï. Dai Diuxi maiti gïr maa mosïkaxi tïgibudagai ix makïdï biakana go gaa óídakami. Gïr maa ïgai Diuxi Ibhïadï bhaiyoma sai ïgai gïr tïïgidana Diuxi tïgibudadï sai podukai maatïkana aatïmï ix tumaxi gïr maa Diuxi.

¹³ Daiñi, xudu gamaakada aatïmï ñoki mai aagaiña aatïmï go oidigi daama óídakami tïgibudadïkïdï. Ñokaiña aatïmï ñokikïdï ix makïdï gïr mamaakaiña Diuxi Ibhïadï bhaiyoma dai podukai aagaiña aatïmï Diuxi Ibhïadï maatïtuldaradï.

¹⁴ Dïï go gaa odami ix makïdï mai bia Diuxi Ibhïadï mai maatï kaïkana gïr aatagi. Buirudagai dukai kaïkana ïgai bhaiyoma. Mosïkaxi go odami ix makïdï biakagi Diuxi Ibhïadï bhaiga ix maatï kaïkagi maatïtuldaradï Diuxi Ibhïadï.

¹⁵ Aatïmï tudu ix makïdï bia Diuxi Ibhïadï gia kïïga maatï kaï go maatïtuldaradï. Dïï tomarhi ïmadutai go gaa ix makïdï mai bia Diuxi Ibhïadï mai maatï kaï gïr aatagi.

¹⁶ ¿Maiti ix podukai ojixi Diuxi ñokidïrï? Ami ikaiti sai, Tomarhi ïmo oidakami mai maatï ix tumaxi gï tïtïitoi Diuxi Dai mai tipu ïpï xorai maakiagi ñoki Diuxi, ikaiti ojai. Dïï aatïmï gia maatï kaï Diuxi Ibhïadï maatïtuldaradï. Aatïmï bia Suxi Kristo tïgibudadï tudu kaxkïdï.