1 Korintios 16 - Northern Tepehuan Bible

Pabora aagidi go buaboitudadami sai ïmpaidiña soiñi go Jerusalenïrï óídakïdï buaboitudadami bïïtarï

¹ Xibi gïn aagidamu aanï ix dukatai ïmpaidadagi aapimï go soiñi go buaboitudadami bïïtarï ix makïdï Jerusalenana óídaga. Ka aagidi aanï go buaboitudadami Galasiana ixdukatai ïmpaidadagi ïgai soiñi ïpï dai ipïrhidi aanï ix ïpïandukai ibuadagi aapimï.

² Bïïxi tumiñoko abïr ïmpaidadagi ïpï lïïchi bamioma tudu. Gï agai bïïxkatai ix dasadagi lïïlïchi dai ix makïdï bamioma gamaitïkïdagi gï agai sai bamioma daasadagi. Ïkiaxdïrï abïr ïmpaida go soiñi tudu sai podukai maiti gï agadagi ix ïmpaidagi xïïxkadï aiyagi aanï.

³ Dai gï agai ïpï ix darasagi aapimï kïkïïrhi ix makïdï kïï tutiakami dukai ïrhiadagi aapimï. Dai aanï iduiñdamu ïmo ojai dai maakimu sai biakana ïgai sïïrhikami ix bhïidakagi go soiñi go buaboitudadami Jerusalenana.

⁴ Dai ix gï agadagi ix aanï imiagi ïpï aidï gia gin oidamu go kïkïïrhi ix makïdï darasagi aapimï.

⁵ Gïn dibida in ïrhidi dïï mos bia aanï ix imiagi ïpïgioma Masedoniamu. Dai gokiïrï amïï Korintoïrï gïn dibidamu aanï.

⁶ Dai maatï xi mïï biyagi aanï chïki tasai xiïpï asta daibunukai go toomoko. Dai bhodïrï ipïrhidi aanï sai gin maakiagi aapimï ixtumaxi gï aagadagi gin imidagai bïïtarï xïxkadï ka imïda agadagi aanï.

⁷ Mai xu ix mosïkaxi chïki tasai daka in ïrhidi gïn ïmadï tudu. Ix ipïrhiadagi Diuxi bhai tïbïpi gïn ïmadï dakamu aanï.

⁸ Dïï xibi mai imimu aanï gamoko kia. Tanaxi bimu aanï Efesoïrï asta xïïxkadï daibuñagi go Pentekostes tasïrï.

⁹ Kïïga imïi gin aaduindagai tanai aagaitai aanï Diuxi ñokidï tudu tomaxi muidu ix makïdï gin bui susurhigïi tanai. Mui óídakami tanai buaboitudaimi tudu. Kaxkïdï mai otoma imia in ïrhidi tabhiadïrï kia.

¹⁰ Gin susukurhi, go Timoteo imi agai gamoko dai kïïga gïn ïbhiada antaada ïgai mïï dibiakai. Kïï po ïrhiada antaada ïgai sai aapimï soi dukai nïidi. Kaxkïdï abïr kïïga miadïgida kïïga xadutudaitai sai mai duadimukagi ïgai. Gin ïpïan dukai ibuayi ïgai Diuxi aaduindadï tudu.

¹¹ Maiti gï agai xi soi dukai nïijada aapimï tudu daidi abïr maaka ixtumaxi tïgitokagi ïgai imidagai bïïtarï xïxkadï imiagi ïgai daidi itïda sai Diuxi kïïgakïrï baidakana asta tami ukami xako daja aanï. Kaxkïdï tudu bhaigobai imi agai ïgai ïpamu. Tami tudu nïnïraka aanï xi aiyagi ïgai ïmadï go gaa gïr susukurhi ix makïdï oidi.

¹² Gin susukurhi, tomaxi aagidi aanï go Apolos sai oidana go gaa buaboitudadami xïïxkadï gïn dibidagi ïgai dïï maiti ipïrhi go Apolos kia. Gokiïrioma imimu ïgai xïïxkadï ixtutiadagi.

¹³ Kïïga abïr nïnïasïrhigan dukai óídaka kïïga buaboidaitai. Maiti abïr ïbhiada tomarhi ïmo ixtumaxi tudu daidi abïr gupurtuda gïn buaboidaraga.

¹⁴ Dai tomax tumaxi ibuayi aapimï gï agai ix ibuadagi aapimï oigïdaitai jaa.

¹⁵ Gin susukurhi, kïïga maatï aapimï sai ami Akayïrï go Tibañi dai aaduñdï ix makïdï kiidïrï óídaga ïpïgioma buaboitu. Dai kïï maatï aapimï ïpï sai kïïga soikïiña ïgai go gaa ix makïdï buaboitudaimi.

¹⁶ Sïïrhikïdï gï agai aapimï tudu xi ïïgiadagi ïgai dai podukai ïpï bïïxkatai ix makïdï kabami gïn aagaitai ibuayi Diuxi aaduindadï ix dukai ibuayi ïgai.

¹⁷ Kïïga bhai gin ïrhidi aanï dadakai go Tibañi ïmadï Fortunato dai go Akaiko ix makïdï bhaigobai otoi aapimï. Sïïrhikïdï gïn tïgitokana aanï aapimï dai dadakai ïgai ïpïan taadatu ix bïïxkatai aapimï gin dibiji.

¹⁸ Kïïga gin abïnakiadan taadatu ïgai tudu dai kïï maatï aanï sai aapimï gïn abïnakidan taadatudamu ïpï xïïxkadï amïï aiyagi ïgai ïpamu. Gï agai ix kïïgakïrï xadutuada aapimï bïïxkatai ix makïdï podukai aatabuayi.

¹⁹ Gin susukurhi, bïïxkatai go buaboitudadami ix makïdï aipakoga gïn ïmpaidiña tami Asiïrï gïn otoxdi ïmo biatuldaragai. Dai go Aquila dai Prisila dai bïïxi go gaa buaboitudadami ix makïdï gïn ïmpaidiña ami Aquila kiidïrï Diuxikïdï gïn biaturhi ïpï. Kïïga maatï ïgai sai aapimï bïïna daraka gïr Bhaitï Kïakamiga ïpïandukai ïgai kaxkïdï gïn oigïdai ïgai.

²⁰ Diuxkïdï gïn biaturhi bïïxi go buaboitudadami tanaidïrï. Dai ipïrhidi aanï xi kïïgakïrï gïn biaturhiada aapimï aipakoga ïpï.

²¹ Gin susukurhi, aagidiña aanï ïmai ix tuma dasana dai idui idi ojai dïï xibi gia tami lïïchi ïïgi gin ïkakïdï ojai aanï dai gïn otoxdi ïmo biatuldaragai.

²² Dai aanï aagai sai xorai mai oigïdadagi Suxi Kristo sai ïkobai biïna ïgai Diuxiañdïrï. Gin susukurhi, nïnïraka aanï sai otoma dibiagi Suxi Kristo ïpamu.

²³ Gin susukurhi, ipïrhidi aanï ix maatï taatagi aapimï xïï kïï tuiga Suxi Kristo gïn bïïtarï.

²⁴ Gïn oigïdai aanï tudu bïïxkatai aapimï ix makïdï bïïna daraja ïgai. Dai mosïkaxi.