1 Korintios 15 - Northern Tepehuan Bible

Pabora aagai Suxi duakaradï

¹ Gin susukurhi, ipïrhidi aanï ix gïn tïgitokagi aapimï go bhai ïrhiaragai aatagi ix makïdï gïn aagidi aanï dai ix makïdï buaboitu aapimï. Xibi kia apia kïïga kabakan dukai buaboitudai aapimï

² dai kïïgakïrï bubuakïi aapimï buaboidaitai. Kïïgakïrï bubuaka aapimï tudu dai mosïkaxi ix buaboitudamudai ïmai aatagi ix makïdï maiti gïn aagidi aanï, aidï gia maiti ïr soiñikamudai gïn buaboidaraga dai mai kïïgakïrï bubuakimudai aapimï.

³ Daiñi, gïn aagidi aanï go bamioma namïakïdï ñoki ix makïdï gin maatïturhi Suxi Kristo. Gïn aagidi aanï tudu sai Suxi Kristo muu ix dukai ojixi Diuxi ñokidïrï. Dai sai podukai bhai dui ïgai sai oigïrhikan biïna aatïmï gïr soimaaxkamigakïdï.

⁴ Gïn aagidi aanï ïpï sai gï yaasatu ïgai dai bhodïrï baika tasaikïdï gï duakatu ïpamu. Gobai ka ïkiaxdïrï ojixikatadai Diuxi ñokidïrï ïpï.

⁵ Dai gïn aagidi aanï ïpï sai ka duakatukai gï maaxitu ïgai go Cefas buidïrï dai gokiïrï gï maaxitu bïïxi go gaa bhaibuxtama dan goka mamaatïrdamigadï ïpï.

⁶ Gokiïrï bhaibitukami taama ciento buaboitudadami nïidi ïpï go Suxi. Dai bhaiton bïïxkatai ïgai kia óídaga xibi dïï mos ïïmoko ka koi.

⁷ Gokiïrï gï maaxitu ïgai go Jakobo buidïrï dai gokiïrï bïïxi go gaa ojotosadï buidïrï ïpï.

⁸ Dai kugatïrï aanï gin buidïrï gï maaxitu Suxi Kristo dai todian dukai otosadï gin dáí. Todian dukai otosadï bii aanï tudu mai nïnïrakatai aanï ix pobïduñagi. Ïpïandukai gobai xi todian dukai busiagi ïmo arhi xïïñi mai kia aïkai ixtuigako.

⁹ Bhaitoma podukai pogïdui gin ïmadï aidïxi todian dukai otosadï gin dáí Suxi. Aidïpïrï tomarhi ïmadutai poïrhiditadai ix aanï otosadïka iñagaitadai Suxi. Kabami soi buididitadai aanï go buaboitudadami aidï di. Dai kaxkïdï bïïxi go gaa ojotosadï Suxi bamioma bia sïïrhikami ix tïanïdagi ix aanï dai aanï mai bia sïïrhikami tomarhi ix ïmo otosadï Suxi gin aagagi odami. Kabami soi buididiña aanï go buaboitudadami ïkioma kaxkïdï.

¹⁰ Sïïrhikïdï kïï tuiga Diuxi gin bïïtarï tudu ix kaxkïdï otosadï gin dáí ïgai. Dai kïïga ibuayi soiñi xi otosadï gin dáí Diuxi kaxkïdï tudu gin maakai ïgai gubukarhigai sai ibuadana aanï naana maaxi aaduindagai. Dai asta kabamioma gin aaga aanï ix bhai go gaa ojotosadï Suxi. Dïï mai xu ix ïïgi gin gubukarhigakïdï ibuayi aanï go aaduindagai. Diuxi ïgai dai aatabuayi aanïkïdï bhaiyoma kïï tuigakatai ïgai gin bïïtarï.

¹¹ Kaxkïdï tudu Diuxi ïgai dai ibuayi go aaduindagai ix kaxkïdï buaboitu aapimï. Dai mai xudu tomax xorai gïn aagidi Diuxi ñokidï tomaxi aanï gïn aagidi xiïpï go gaa ojotoxikami gïn aagidi ïpï. Tomax dukai ka buaboitu aapimï.

Pabora aagai sai oidaka agai go duakarhigai koidadï bïïtarï

¹² Dai aatïmï ojotosadï Suxi kïïga gïn aagidi sai duakatu go Suxi. ¿Kaxkïdï tudu ix tuixi pokaiti ïïmadutai aapimï sai mai duduakarïi koidadï?

¹³ Daiñi, ix maiti ïr buaboikamudai sai duduakarïi koidadï aidï gia mai duakatumudai go Suxi.

¹⁴ Dai ix mai duakatumudai go Suxi aidï gia ka maiti ïr soiñikamudai go aatagi ix makïdï gïn aagidi aatïmï. Dai tomarhi maitï ïr soiñikamudai ïpï buaboidada aapimï. Dïï gia kïïga duakatu go Suxi.

¹⁵ Ix ïr buaboikamudai ix mai duakatu go Suxi aidï gia mos ïr ïï yaatagikamudai gïr aatagi aagaitai aatïmï Diuxi. Kaxkïdï tudu gïn aagidi aatïmï sai duakaturhi Diuxi go Suxi.

¹⁶ Kïïga ïr buaboi gobai ix gïn aagidi aanï xibiki tudu. Daiñi, ix ïr buaboikamudai sai mai tipu duakaragai aidï gia mai duakamudai Suxi.

¹⁷ Dai ix maiti gï duakatumudai go Suxi ¿Dukatai ïr soiñikamudai ix buaboitudada aapimï? Ix ïr podukaikamudai aidï gia ka mai biakamudai aapimï oigïldaragai gïn soimaaxkamiga bïïtarï

¹⁸ dai mai tipukamudai soiñi koidadï bïïtarï ïpï tomaxi ïr buaboitudadamikatadai ïgai.

¹⁹ Ix ïr buaboikamudai sai mosïkaxi tami idi oidigi daama gïr soikïi Suxi dai amaxi ka kokai aatïmï ka maiti gïr soiña agai aidï gia sogigi aatïmï ix makïdï buaboitudai. Xi ïr buaboikamudai gobai aidï gia ka maiti ïr buaboikamudai gïr nïnïraraga. Ix ïr buaboikamudai gobai aidï gia bamioma soi dukai óídakamudai aatïmï ix bhai bïïxi go gaa óídakami tudu.

²⁰ Dïï gia kïïga ïr buaboi sai duakatu go Suxi. Dai kaxkïdï kïïga gï maatï sai Diuxi gïr duakatulda agai bïïxkatai aatïmï ix makïdï bïïna daraka Suxi Kristo.

²¹ Daiñi, mos arhi ïmaduga go Adán ix makïdï bua go mukigami soimaaxi dunakai tukamïrï ix kaxkïdï xibi mumukui bïïxi óídakami. Dai podukai ïpï mos arhi ïmaduga Suxi Kristo ix makïdï gïr buapi go duakaragai ïpï.

²² Kaxkïdï tudu bïïxi odami mumukui aaduñdïkatai ïgai go Adán. Dïï gia bïïxkatai ix makïdï ïr aaduñdï Suxi Kristo duduakatuda agai.

²³ Suxi Kristo ïgai dai ïpïgioma duakatu tudu dai gokiïrï ïpamu dibiakai duduakaturhi agai ïgai bïïxi aaduñdï.

^24-25 Dai xïïxkadï ka ugiti agadagi idi oidigi aidï dibiamu Suxi Kristo ïpamu gatïanïda agaitai tami idi oidigi daama. Dai aidï maitïmu ïgai bïïxi ix makïdï ïr gatïtïanïdami dai ïr buidïrï bïtïkamigadï. Dai ka maitïkai ïgai buidïrï bïïtïkamigadï bhïimu Suxi sïïrhikami dai Tïanïdami bimu. Dai bhodïrï tïïgidamu ïgai go sïïrhikami Diuxi gïr Oga sai Diuxi gïr Oga adaama tïanïdagi.

²⁶ Dai bhodïrï kugatïrï Suxi ugitituda agai go mukigami sai ka mai kona odami.

²⁷ Podukai buaboi busaimu Diuxi ojadï xakoga ikaiti sai, Diuxi maakimu gubukarhigai Maradï sai gatïanïna bïïxi aïkatïrï, ikaiti go ojai. Dïï gia gobai mai itïiya ïrhidi sai tïanïda agai ïgai Diuxi gïr Oga ïpï. Maatiga maaxi gobai tudu. Kaxkïdï tudu Diuxi ïgai dai maakai gubukarhigai Maradï sai ïgai gatïanïna.

²⁸ Diuxi gamaakai gubukarhigai Maradï sai tïanïna ïgai. Daidi xïïxkadï ka maitiagi Diuxi Maradï bïïxi ix makïdï buidïrï bïïtï sai bhodïrï ïpamu maakimu ïgai go gubukarhigai Diuxi gïr Oga ipïrhiditai sai Diuxi gïr Oga ïgaikagi dai adaama gatïanïna. Ïïgiadamu ïgai Diuxi gïr Oga bai bïïxi adaama gatïanïdamu Diuxi aidï.

²⁹ Xibi ïpamu aagamu aanï go duakaragai. Daiñi, ïïmadutai aapimï pokaiti sai mai duduakarïi koidadï dïï bïïxkïrï pokaitiña ïgai saidi ibuayi soiñi ix gïr bapakonakagi aatïmï ix makïdï kia duduaka soiña ïrhiditai ix makïdï ka koi. ¿Dukatai ïr soiñikana gobai tudu ix mai duduakarïi koidadï?

³⁰ Daiñi, dudatai dai naana dukai bhaitoma gïr aïjïiña mukigami aatïmï ojotosadï Suxi aagaitai aatïmï Diuxi ñokidï aipakoga. ¿Dai tumaxi ïr soiñikamudai gobai ix mai tipukamudai duakaragai? Kaxkïdï xadïrï oijadamudai aatïmï gïr aaduindaga ix tipukamudai duduakaragai koidadï bïïtarï.

³¹ Katoma gin aïjïiña mukigami bïïx tasai ibuadatai aanï gin aaduindaga, gobai kïïga ïr buaboi. Gïn aagidamu aanï xïï kïïga ïr buaboi gobai. Daiñi, ix xïïxi ïr buaboi sai bhai gin ïrhidi aanï aapimïkïdï bïïna darakatai aapimï Suxi Kristo pokaxi ïr buaboi ïpï sai bïïx tasai bhaitoma gin ajïi mukigami.

³² ¿Mai ix bui kïkiba aanï mui omarhigami baasïkioma amïï Efesoana? ¿Dai tumaxi gamaitïkïi aanï mukukai ix mai duduakarïdamudai koidadï? Ix mai duduakarïdamudai odami aidï gia ïpïan tïimudai aatïmï ixdukai aagaiña odami ïkioma. Ïgai ikaitiña sai, Gï agai sai bhaiyoma gïïgïpi gaugiagi aatïmï dai gïr nabaakoagi gayïkai. Tomax dukai ka parï xoroko koi aragai bïïxkatai dai amaxi ukami ugitimu aatïmï, ikaitiña odami. Dïï maiti ïr buaboi gobai.

³³ Maiti abïr gïn dagito tudu ix gïn bupuirumadagi ix makïdï pomaaxi ñokai. Kïïga maatï aapimï sai xorai urabagi pupuirugami gï sarabidamu ïgai go soimaaxi tïgibudagai tomax xïï kïïgadukatadai ïgai tïgibudadï mai kia gaurabakai.

³⁴ Kïïga abïr gïn tïgito tudu daidi maigobai dasa go soimaaxi tïgibudagai. Daiñi, aanï aagai sai ïïmadutai ix makïdï gïn urapïkïi gïn ïmpaiñdaragïrï mai maatï Diuxi. Gï agaitadai ix soiñamudai aapimï sai maatïkana dïï mai kia soi aapimï dai gokïdï gï agaitadai ix xaïradagi aapimï.

Pabora aagai ix maaxkamu odami tukugadï xïïxkadï duduakagi ïpamu

³⁵ Po in ïrhidi aanï sai ïïmadutai aapimï ix makïdï mai buaboitudai go duakaragai gin tïkaka antaada ix dukatai bhaiga odami ix duduakagi. Dai gin tïkaka antaada ix maaxkamu tukugadï ïpï gokiïrï ka duduakakai.

^36-37 Dïï aanï aagai sai ix makïdï gatïkakadagi podukai ïr ïmo buirugami. Daiñi, tukugadï odami ïr ïpïan dukami ïxtokai. Dai tomax tuma ïxtokai xi ïr tïrhigi xi ïma maaxi xïïxkadï gï yaasatudagi ïgai mai mo maaxi iponïi. Gï agai xi ïmapïduñagi go ïxtokai tudu saidi ipuagi.

³⁸ Dai Diuxi ïgai dai aagai ix maaxika agai bïïxi ïxtokai ipuadï ïïgi ix maaxkami iduña ïrhiada ïgai. Dai naana maaxi idui ïgai tudu ix makïdï mai ïpïan mamaaxi.

³⁹ Dai pomaaxi oidigi daama ajiopadami ïpï. Naana maaxi idui Diuxi tukugadï. Oidaga odami dai ïgai bia ïma maaxkami tukugadï dai oidaga buxtaki dai kïkïixi dai ujurugi dai batopa dai ïjïkobai bia ïgai ïma maaxi tutukugadï ïpï.

⁴⁰ Dai go tïtïañikarudï Diuxi ix makïdï tïbagiana oidaga mai ïpïamaaxi ïgai tukugadï tami oidigi daama oidakami.

⁴¹ Dai go tasai ïmadï go masadai dai go xixabugai mai ïpïan mamaaxi ïpï. Asta ïïmoko go xixabugai bamioma kukudakïi dai bamioma kïï titiodi ix bhai jaa. Naana maaxkami idui Diuxi ixtumaxi tudu.

⁴² Dai pomaaxi ka agai gïr tukugakïdï ïpï ka duduakïkai aatïmï. Gïr tukuga ix makïdï bia aatïmï xibi muki agai dai xatuidimu dïï gia go utudui tukugai ix makïdï biakamu aatïmï ka duduakakai ka mai koi agai tomarhi ïmo imidagai.

⁴³ Soi dukai nïidiña aatïmï gïr tukuga xïïxkadï mukiagi gobai dai yaasapaiña dïï xïïxkadï duakagi gobai aidï gia kïï tiodikamu. Mai gubuka gobai gï yaasakai dïï gia ïpamu duakakai gia kïïga gubuakamu gobai.

⁴⁴ Idi tukuga ix makïdï bia aatïmï xibi ïr tami idi oidigi daama oidakaragai bïïtarï dai gï yaasamu gobai. Dïï gia gïr utudui tukuga ix makïdï biakamu aatïmï gia ïr tïbagiana oidakaragai bïïtarï ka agai. Kaxkïdï tudu oidaga tukugai ix makïdï ïr oidigi daama oidakaragai bïïtarï dai oidaga ïma maaxi tukuga ix makïdï ïr tïbagiana oidakaragai bïïtarï.

⁴⁵ Daiñi, Diuxi ñokidï pokaiti sai, Ibhïiba kïkiba go Adán, dai duakakami bii tukugadï sai oidakaiña ïgai tami oidigi daama. Dïï gia oidaga ïmai ix makïdï mai ïpïamaaxi go Adán. Ïgai ïr Suxi Kristo ix makïdï go kugatïrï Adán aagaiña odami. Ïgai mai mosïkaxi biatu gubukarhigai ix tami oidigi daama oidakagi. Ïgai bhaiyoma gamaakai gubukarhigai sai kïïgakïrï oidakana óídakami bïïxkïrï bïïtarï.

⁴⁶ Podukai biatu aatïmï gubukarhigai ix óídakagi bïïxkïrï bïïtarï. Tukamïrï biatu aatïmï gïr tukuga ixtukïdï óídakagi tami oidigi daama dai gokiïrï biakamu aatïmï gïr tukuga ixtukïdï kïïgakïrï oidakamu aatïmï bïïxkïrï bïïtarï.

^47-48 Dïbïraiñdïrï idui Diuxi go Adán tukugadï dai bïïxkatai aatïmï bia gïr tukuga ix maaxi biakatadai go Adán. Dïï gia Suxi Kristo ayi gokiïrï xi go Adán tïbagiañdïrï dibiakai ïgai dai gïïpi ïma maaxi aaduindagai idui. Xibi bïïxkatai aatïmï ix makïdï buaboitudai biakamu gïr tukuga ix maaxi bia ïgai.

⁴⁹ Daiñi, maa Diuxi tukugadï bïïxi oidakami ix maaxi maa ïgai go tukamïrï kïïrhi oidigi daama oidakami, go Adán tudu. Dai podukai ïpï aatïmï ix makïdï buaboitudai Suxi Kristo gïr maakimu ïgai tukuga ix maaxi bia Suxi Kristo ix makïdï tïbagiana daja.

⁵⁰ Gin susukurhi, ipïrhidi aanï ix maatïkagi aapimï sai mai bhaiga aatïmï ix bapakïdagi tïbagiana xako gatïanïi Diuxi biakatai kia idi tukuga ix makïdï bia aatïmï xibi. Mai tïbïpi kabaka gïr tukuga kaxkïdï. Xadïrï bhaigakana idi gïr tukuga ix oidakagi bïïxkïrï bïïtarï tudu.

⁵¹ Dïï gia gïn aagidamu aanï ïmo ixtumaxi ix makïdï mai maatïkana odami ïkioma. Daiñi, ïïmadutai aatïmï buaboitudadami mai koiyagi ragai. Dïï gia bïïxkatai aatïmï ïmapïduñimu todian dukai.

⁵² Gï kaidatudamu go kugatïrï trompeta bai ix xïï otoma gï kupiokïi ïmoko pokaxi otoma ïmapïduñimu aatïmï. Amaxi gï kaidatumu go trompeta baidi go buaboitudadami ix makïdï ka koi duduakamu ïpamu dai ka biakamu gïn tukuga ix makïdï mai ugiatïi. Dai buaboitudadami ix makïdï kia óídakagi aidïpïrï todian dukai ïmapïduñimu ïpï dai bhïimu tukuga ix makïdï mai ugiatïi ïpï.

⁵³ Mai bhaiga aatïmï ix oidakagi bïïxkïrï bïïtarï idi tukugakïdï ix makïdï bia aatïmï xibi di. Kaxkïdï ix dukai ïmo odami maigobai dadasai yukuxi kïrhiñdadï dai gï aadai yukuxi utudukami podukai Diuxi maigobai dasamu gïr tukuga ix makïdï ugiatïi dai gïr maakimu ix makïdï gia mai ugiatïi.

⁵⁴ Xïïxkadï ka biakagi aatïmï gïr tukuga utudui aidï ka buaboi busaimu go ojai xakoga ikaiti sai, Diuxi ka maitï go mukigami bui.

⁵⁵ ¿Kaxkïdï dukatai gïr maitïna go mukigami xibi? ¡Diuxi ka maitï gobai di! Kaxkïdï ka mai bia gubukarhigai go mukigami gïr bui, ikaiti go ojai.

⁵⁶ Daiñi, oidaga soimaaxkami oidigi daama dai abhiadïrï buiyi gubukarhigai go mukigami óídakami bui. Dai xïïxkadï oidakagi sïïrhikami bamioma gubuakan buayi go soimaaxkami. Kaxkïdï tudu go sïïrhikami ïr ïgai dai gïpiïrï bupai óídakami xïïxkadï soimaaxi ibuadagi.

⁵⁷ Dïï gia Suxi Kristo ïgai daidi ïr Gïr Nukadakami dai kaxi gamaitï ïgai go mukigami. Dai aatïmï kaxi gamaitïkami bii ïpï go soimaaxi ïmadï go mukigami bui ka bïïna darakatai aatïmï Suxi Kristo. Gï agai tudu ix aagidagi aatïmï Diuxi xïï bhai gïr ïrhidi aatïmï ïgai bui kïïgakïrï gïr bubaidakai ïgai.

⁵⁸ Kaxkïdï gin susukurhi abïr mai dagitokai buaboitudada. Daidi abïr kabami gïn aaga iduñi aaduindadï Gïr Nukadakami bïïxi gïn bhai ïrhiarakïdï. Kïïga maatï aapimï tudu sai duduakamu aapimï ïpamu bïïna darakatai aapimï Gïr Nukadakami dai kaxkïdï ïpï kïï maatï aapimï sai mai mos ïïgikïdï ibuayi aapimï gïn aaduindaga.