1 Korintios 14 - Northern Tepehuan Bible

Gï agai ix biaka ïrhiada aatïmï go gubukarhigai ixtukïdï bamioma soikïdagi go gaa

¹ Kïïga abïr gaaga ixdukatai oigïdada jaa dai soikïdagi. Dai biaka abïr ïrhiada naana maaxi gubukarhigai ix makïdï gïn maakai Diuxi Ibhïadï. Dïï gia bamioma abïr biaka ïrhiada gubukarhigai sai aagaiña aapimï ñoki ix makïdï Diuxiañdïrï imïi.

² Gobai ïr go gubukarhigai ixtukïdï bamioma soiña antaada aapimï jaa. Daiñi, ïïmo imidagai ïmo buaboitudadami todian dukai ñokaiña Diuxi Ibhïadï gubukarhigadïkïdï ïma maaxi ñokikïdï ix makïdï tomarhi ïmadutai mai maatï kaï. Xïïxkadï podukai ñokadagi ïgai mosïkaxi Diuxi maatï kaï. Mosïkaxi ïgai bïïtarï ñokai ïgai tudu dai mai soikïi ïgai jaa. Go gaa mai maatï kaïkana ñokidï kaxkïdï. Kïïga ñokai ïgai Diuxi Ibhïadï gubukarhigadïkïdï dïï go gaa mai maatï ix kaiti.

³ Dïï gia ix makïdï aagagi ñoki ix makïdï Diuxiañdïrï imïi ix makïdï jaa maatï kaïkagi aidï gia soikïi ïgai go gaa buaboitudadami. Kïïga gupurtudai ïgai buaboidaradï dai kïïga abïnakidi dai kïïga bhai ïrhiatudai ïpï.

⁴ Dïï gia ix makïdï todian dukai ñokadagi ïma maaxi ñokikïdï mai soikïi jaa. Ïgai mosïkaxi ïïgi gï bïïtarï buyiña go bhai ïrhiaragai ñokaitai podukai. Dïï gia ix makïdï aagagi ñoki ix makïdï Diuxiañdïrï imïi dai ix makïdï bïïxkatai maatï kaïkagi ïgai gia maakai ïmo bhai ïrhiaragai bïïxi go buaboitudadami.

⁵ Xïïxi ïr kïïgaikamudai ix maakimudai Diuxi gubukarhigai bïïxkatai aapimï buaboitudadami ix todian dukai ñokadagi ïma maaxi ñokadami ñokidïkïdï ix makïdï tomarhi ïmadutai mai maatï kaï. Sïïrhikïdï ïr kïïgaikamudai gobai dïï gia gï aagai ix oidakagi xorai biakagi gubukarhigai Diuxiañdïrï xi maaxi aagagi go ñoki ïpï. Ïma dukai ¿Tumaxi ïr soiñikana go ñoki bïïxi go gaa buaboitudadami bïïtarï mai maatï kaïkatai tomarhi ïmadutai? Kaxkïdï bamioma gï agai ix bhaiyoma aagiadagi aapimï ñoki Diuxiañdïrï dai ix makïdï maatï kaïkagi go gaa. Gobai gia ïr soiñi bïïxkatai bïïtarï maatï kaïkatai ïgai.

⁶ Daiñi, ¿Tumaxi ïr soiñikana ix gïn dibidagi aanï dai gïn aagidagi aatagi ïma maaxi ñokikïdï ix makïdï mai maatï kaïkagi aapimï? Maiti ïr soiñi gobai ¿aba? Gï agai ix gïn aagidagi aanï ixtumaxi ïr soiñi bhaiyoma. Dukami gï agai ix gïn aagidagi aanï bhaiyoma ixtumaxi gin maatïturhi Diuxi xiïpï ïma maaxi ix makïdï máí aanï xiïpï ïmo ñoki Diuxiañdïrï xiïpï ïmo maatïtuldaragai maaxi. Gobai gia ïr soiñi gïn bïïtarï. Kaxkïdï tudu gï agai ix maatï kaïkagi aapimï go ñoki. Ïma dukai maiti ïr soiñi gobai.

⁷ Gï agai ix maatigian kaitiadagi ñokidï ïmoko tudu. Ïma dukai dukatai ïr soiñikana gobai. Daiñi, xïïxkadï ïmo odami gaiibagi ux gitarui xiïpï ïma maaxi ibakarui gï agai ix kïïga ibadagi ïgai. Ïma dukai mai maatigian kaiti ibaradï.

⁸ Dai sandadaru aaduindadï pomaaxi ïpï. Daiñi, go sandadaru trompetakïdï ibaiña dai podukai aagidiña aaduñdï sai bhai gïn buadana kokodi bïïtarï. Dïï ix mai maatigian kaitiadagi go ibaradï ¿Dukatai ïïgidiña go gaa mai maatï kaïkatai?

⁹ Dai pomaaxi aapimï gïn aatagikïdï ïpï. Gï agai ix aagadagi aapimï ñoki ix makïdï maatï kaïkagi go gaa. ¿Ïma dukai dukatai maatï kaïkana ïgai ix kaitiadagi aapimï? Ix aagagi aapimï ñoki ix makïdï mai maatï kaï go gaa aidï gia mos ïïgikïdï ñokadan buayi aapimï.

¹⁰ Daiñi, naana maaxi ñokadami oidaga no xibhïkai ix makïdï aanï mai maatï kaï. Mosïkaxi ix makïdï ïr ïpïamaaxi ñokadami gia maatï kaï.

¹¹ Kaxkïdï tudu ix gin aatagida ïrhiadagi ïmadutai aapimï go ñokikïdï ix makïdï aanï mai maatï kaï po ïrhidi aanï sai xibhïadïrï óídakami dukai gïr nïijada antaada aatïmï. ¿Dukatai gïr soikïiña aatïmï aipakoga podukai?

¹² Kïïga maatï aanï tudu sai biaka ïrhidi aapimï go naana maaxi gubukarhigai ix makïdï gïr maakai Diuxi Ibhïadï. Dïï gia gï agai ix bamioma biaka ïrhiadagi aapimï gubukarhigai saidi ibuadana ixtumaxi bamioma soikïdagi buaboidaradï go gaa buaboitudadami.

Gï agai ix jaa maatï kaïkagi gïr ñoki xïïxkadï daanïdagi aatïmï Diuxi

¹³ Daiñi, xorai biakagi gubukarhigai ix todian dukai ñokadagi ïma maaxi ñokikïdï gï agai ix daanïdagi Diuxi sai maakana gubukarhigai ïpï ix maaxi aagagi ix tïiya ïrhidi.

¹⁴ Kaxkïdï tudu ix daanïdagi aanï Diuxi ïma maaxi ñokikïdï gin ñokiturhitai Diuxi Ibhïadï aidï gia mosïkaxi gin ibhïdagakïdï gadaanïi aanï dai tomarhi ïïgi aanï mai maatï kaï ix kaiti aanï. Kaxkïdï tudu gin tïgibudaga mai bapakïi ami gadaanïitai aanï mosïkaxi gin ibhïdagakïdï.

¹⁵ ¿Dukatai gï agai ix daanïdagi aatïmï tudu? Gïn aagidamu aanï ix dukatai gï agai ix ibuadagi. Gï agai ix daanïdagi dai ganïyagi gïr ibhïdagakïdï dai gïr tïgibudagakïdï ïpï bïï goka dai mai xu xi mosïkaxi gïr ibhïdagakïdï. Gï agai tudu xi kïïga maatï kaïkagi aatïmï ix tuma daanïdagi dai ganïdagi.

¹⁶ Gïn aagidamu aanï ïmo maaxidaragai ix maaxi gobai. Daiñi, xi ñokadagi aapimï go ïï gïn ibhïdagakïdï aagaitai ñoki ix makïdï tomarhi ïïgi aapimï mai maatï kaï aidï gia xadïrï gïn maatï kaïkana jaa ïpï. Tomaxi kïïga potïdagi aapimï Diuxi sai bhai gïn ïrhidi aapimï ïgaikïdï, ¿Dukatai maatï kaïkana jaa ix makïdï gïn ïmadï darakagi? Dai ix mai maatï kaïkagi ïgai gïn ñoki ¿Dukatai bhai aagana ïgai sai ïr buaboi gïn ñoki dai bhai ïldana Diuxikïdï ïpï?

¹⁷ Dai tomaxi aapimï gia kïïga aagidagi Diuxi ix bhai gïn ïrhidi ïgaikïdï dïï maiti ïr ïmo soiñikamu gobai go gaa bïïtarï mai maatï kaïkatai ïgai gïn ñoki.

¹⁸ Gï agai tudu xi maatigian kaitiadagi gïr aatagi. ¿Ïma dukai dukatai ïr soiñikana gobai jaa bïïtarï? Daiñi, kïïga bhai gin ïrhidi aanï sai gin maa Diuxi gubukarhigai ix ñokada aanï ïma maaxi ñokadami ñokidïkïdï ix makïdï mai tipu xorai maatï kaïkagi. Dudatioma podukai ñokai aanï xi bhai bïïxkatai aapimï tudu.

¹⁹ Dïï gia bïïxkïrï xïïxkadï gïr ïmpaiñdadagi aatïmï buaboitudadami xioma ipïrhidi aanï ix aagagi mosïkaxi lïïchi aatagi ix makïdï kïïga maatï kaïkagi jaa dai mai xu ix gïïpi aagagi aanï ïma maaxi ñokikïdï ix makïdï mai maatï kajiagi ïgai. Kaxkïdï tudu ñoki ix makïdï maatigian kaiti ïgai dai soiñamu jaa.

²⁰ Gin susukurhi, gï agai ix gïgïr odami tïgibudagai biakagi aapimï kïïga gïn tïgitokatai. Dïï gia go soimaaxkamikïdï gia gï agai xi xixïñi dukai ibuadagi maiti ibuadatai soimaaxi.

²¹ Gïn tïgitobïrai ix kaiti Diuxi ñokidïrï tudu. Ami ojixi sai Diuxi aagidi ix dukatai gïgïbitulda agai go Israelitas daidi itïtïdai sai, Kaïkamu aapimï xibhïadïrï óídakami xi gïn ñokididamu ïmai ñokikïdï ix makïdï mai maatï kaï aapimï dai ïgaikïdï gïn aituldamu aanï ïmo ñoki. Dïï tomax dukai maiti ipïldamu aapimï ix gin buaboitudagi, itïtïdai.

²² Dai maatiga maaxi sai xïïxkadï buaboitudadami todian dukai ñokadagi ïma maaxi ñokikïdï gobai ïr ïmo maaxidaragai ïpï dïï ïma maaxi bïïtarï. Ïmo maaxidaragai gobai bïïtarï ix makïdï mai buaboitudai sai maatïkana ïgai sai Diuxi gubukarhigadïkïdï ñokai go buaboitudadami. Maiti ïr buaboitudadami bïïtarï go maaxidaragai tudu. Dïï gia xïïxkadï aagagi ïmoko ïmo ñoki Diuxiañdïrï ix makïdï bïïxkatai maatï kaïkagi gobai gia ïr buaboitudadami bïïtarï. Kïïga soikïi gobai go buaboitudadami tudu.

²³ Daiñi, xïïxkadï ïmo ïmpaiñdaragïrï todian dukai ñokadagi aapimï buaboitudadami ïma maaxi ñokikïdï ix makïdï mai maatï kaï aapimï dai ami aiyagi jaa ix makïdï mai buaboitudai xiïpï ix makïdï mai maatï ixdukatai aatabuayi Diuxi Ibhïadï, ïgai kïïga potïiya antaada sai pupuiruga aapimï podukai ñokaitai.

²⁴ Dïï gia ix aagagi aapimï ñoki Diuxiañdïrï ix makïdï bïïxkatai maatï kaïkagi aidï gia ix makïdï dadiagi maatï kaïkamu dai maatï nïijadamu saidi ïr soimaaxi ibuadami ïgai dai sai ajiagai gïgïbidaragai.

²⁵ Kïïga maaxi buajamu aapimï ïgai tïgibudadï ix makïdï ïxtoki biakana ïgai dai maatï nïidamu ïgai sai gïn ïmadï daja Diuxi aagaitai aapimï ïmo ñoki Diuxiañdïrï. Aidï gia totonakïdï gugukadamu ïgai xadutudaitai Diuxi.

Gï agai ix kïïga bhai dukai xadutuadagi Diuxi ïmpaiñdaragïrï

²⁶ Ipïrhidi aanï tudu ix maatïkagi aapimï sai gï agai ix ïr soiñikagi jaa bïïtarï bïïxi ixtumaxi ibuadagi aapimï ïmpaiñdaragïrï. Gï agai ix ïr soiñikagi gobai bïïxkatai bïïtarï sai bamioma gïrana buaboidaradï. Daiñi, xïïxkadï gïn ïmpaidadagi aapimï ïïmoko ganïyi ïrhidiña ïmo nïidagai dai ïïmoko biakana ïmo maatïtuldaragai bïïxkatai bïïtarï dai jaa aaga ïrhidiña ixtumaxi maatïturhi Diuxi dai jaa todian dukai ñokaiña ïma maaxi ñokikïdï. Dai jaa maaxi aagaiña ix tïiya ïrhidi. Dai bïïxi gobai gï agai ix ibuadagi aapimï sai podukai bamioma gïrana buaboidaradï bïïxkatai.

²⁷ Kïïgadu tudu ix oidakagi parï goka ix makïdï todian dukai ñokadagi ïma maaxi ñokikïdï dïï gia gï agai ix mos arhi ïmoko ñokada ïpïga dai mai xu ix bïï goka ïmo buidakïdï ñokadagi. Dai maiti gï agai ix bhaibitukagi baika pomaaxi ñokadami ïpï. Dai gï agai xi oidakagi xorai maaxi aagagi ix tïiya ïrhidi go ñoki ïpï.

²⁸ Ix oidakagi ïmoko ix makïdï todian dukai ñokada ïrhiadagi ïmpaiñdaragïrï ïma maaxi ñokikïdï dai ix mai tipukagi xorai maaxi aagagi ix tïiya ïrhidi go ñoki bhaiyoma gï agai ix dodorhi biyagi ïgai ix makïdï ñokada ïrhiditadai. Ix ñokada ïrhiada ïgai Diuxi bïïtarï podukai sai mosïkaxi ibhïgadïrï ñokada ïgai bhaiyoma dai mai xu ix kaïkagi go gaa.

²⁹ Gïn ïmpaiñdaragïrï bhaiga ix gokadukagi xiïpï baikadukagi ix makïdï gatïïgidagi ïmo ñoki Diuxiañdïrï. Dai go gaa gï aagai ix kïïga gïn tïgito kaïkagi sa bhai Diuxiañdïrï ñokai ïgai.

³⁰ Dïï gia ix kia ñokadagi ïmoko dai Diuxi tïïgidagi ñoki ïmai ix makïdï ami daraka aidï gia go ix makïdï ka ñokaitadai gï agai ix dodorhi biyagi bai ñokaiña go gïmai.

³¹ Kïï bhaiga aapimï bïïxkatai ix gamaakadagi ñoki ix makïdï ïr Diuxiañdïrï tudu. Dïï gia gï agai xi ïpïgioma ñokada ïmoko dai gokiïrï ïmai dai mai xu ix ïmo buidakïdï ïmapi ñokada ïgai. Podukai bïïxkatai bhaigakamu ix maatï kaïkagi ñokidï dai bamioma bhïiyagi abïnakidaragai kaïkatai.

³² Go ix makïdï aagagi ïmo ñoki Diuxiañdïrï kïïga bhaiga ix nïnïrakagi asta xïïxkadï kugaitu go gaa aatagidï. Kïïga tïanïi ïgai ïïgi ibhïgadï tudu.

³³ Diuxi mai oropigan dukai aatabuayi tudu dai bhaiyoma kïïga bhai maaxkami dukai aatabuayi ïgai. Kïïga abïr ibuada ixdukatai ibuayi go gaa buaboitudadami xibhïakoga óídakami gïn ïmpaiditai ïgai.

³⁴ Maiti gï agai tudu oki ix ñokadagi ami ïmpaiñdaragiana dai bhaiyoma gï agai ïgai xi kïïga ïïgiada ïgai kukunadï ix dukai ojixi Diuxi ñokidïrï.

³⁵ Ix ïmo oki biakagi ïmo tïkakaragai gï agai xi amïï kiiyïrï tïkakagi kunadï. Maiti ïr kïïga ix ñokadagi oki ami buaboitudadami ïmpaiñdaradïrï tudu.

³⁶ Gï agai tudu xi ibuadagi aapimï ixdukatai ibuayi go gaa buaboitudadami. Dai mai xu xi ïïgi ibuadagi aapimï ix tumaxi bhai ïrhidi aapimï. Mai xu xi aapimïañdïrï dibia Diuxi ñokidï tudu dai mai xu mosïkaxi aapimï gïn bïïtarï Diuxi ñokidï ïpï. Jaa mui bïïtarï dibia gobai ïpï di. Kaxkïdï maiti gï agai ix ïkobai dukai ibuadagi aapimï ixtumaxi ix makïdï ibuada ïrhiadagi aapimï.

³⁷ Maiti gï agai xi gïgïrdukïdï dukai gïn ïrhiadagi aapimï tudu. Daiñi, xorai po gï ïrhiadagi ix ïr Diuxi ñokituldiadamigadï dai podukai ïpï xorai po ïrhiadagi sai kïïga ïïgidi Diuxi Ibhïadï ïgai gï agai ix kïïga ïïgiada idi ñoki. Gï agai ix maatïkagi ïgai sai Diuxi ïgai dai podukai gïr tïjai tudu ix dukai aagai aanï.

³⁸ Dïï gia ix oidakagi xorai mai ïïgiadagi ixtumaxi gïn aagidi aanï ïgai maiti gï agai ix kaïkagi aapimï ixtumaxi gïn aagidagi ïgai.

³⁹ Gï agai tudu xi aaga ïrhiadagi aapimï Diuxiañdïrï ñoki gïn ïmpaiñdaragïrï ix makïdï bïïxkatai maatï kajiagi. Dïï bïïxkïrï maiti gï agai ix daidagi aapimï jaa ix aagadagi ñoki ïma maaxi ñokikïdï ïpï.

⁴⁰ Dïï gia abïr kïïga gïn tïgito nïida daidi kïï bhai maaxkami dukai dai kïï sïïrhi dukai ibuada gïn ïmpaiñdaragïrï ix dukatai gï agai.