1 Korintios 13 - Northern Tepehuan Bible

Gï agai xi go buaboitudadami kïïga oigïdadagi jaa

¹ Gin susukurhi, sïïrhikïdï gï aagai ix gïr oigïdada aatïmï aipakoga. Daiñi, tomaxi ñokadagi ïmoko ïmai ñokidï ix makïdï tomarhi ïmadutai mai maatï kaï dai asta Diuxi tïtïañikarudï ñokidï ïpï, dïï gia ¿Tumaxi ïr soiñikana gobai ix mai oigïdadagi ïgai jaa? Ix ïmoko mai oigïdadagi jaa aidï gia mos xixiokïdan dukai ñokidï dai maiti ibuayi soiñi jaa bïïtarï.

² Tomaxi bhaigakagi ïmoko ix naana maaxi ibuadagi dïï ix mai oigïdadagi ïmoko jaa gobai ix makïdï ibuadagi ïmoko maiti ïr soiñi. Daiñi, tomaxi ïr ïmo Diuxi ñokituldiadamigadïkagi ïmoko dai maatïkagi bïïxi Diuxi tïgibudadï ix makïdï maiti gïr aagidi kia dai tomaxi maatïkagi ïmoko bïïxi aïkatai dai tomaxi kïï gubuakagi buaboidaradï dai asta bhaigakagi aagidagi ïmo tubidaki sai maigobai imïna dai go tubidaki kïïga ïïgidagi ¿Tumaxi ïr soiñi gobai ix mai oigïdadagi ïmoko jaa?

³ Dai ix gaoidi ïmoko buxtuidadï soikïitai soititigami dai ix gï kïïdadagi jaa gaatabuadatai aapi Diuxi bïïtarï dai asta dagito aapi xi ïgai mïidagi gï tukuga tomax dukai gobai ix makïdï ibuayi aapi mai soiñamu jaa ix mai oigïdadagi aapi tudu.

⁴ Odami ix makïdï kïïga oigïdaiña jaa mai ojodatai kïï tutiakana tomaxi soi buidadagi jaa. Ix makïdï kïïga oigïdaiña jaa mai ïgakoñikana ïpï dai mai pokaitiña ïgai ix ïr namïakami ïïgi ïgai dai mai gïgïrdukïdï gïn ïrhidiña.

⁵ Ïgai kïïga xadutudai jaa dai maiti ibuayi buirudagai maaxi. Mai tïgito ajiopaiña ïgai mosïkaxi ixtumaxi ïr kïïga ïïgi ïgai bïïtarï. Ïgai mai otoma bhakoikana dai bhaiyoma otoma oigïrhiña jaa xïïxkadï soi buidadagi.

⁶ Ix makïdï kïïga oigïdai jaa mai bhai gïn ïrhidiña xïïxkadï soimaaxi ibuadagi ïmai dai bhaiyoma bhai gïn ïrhidiña adaimïitai ixtumaxi ïr buaboi.

⁷ Ïgai apia oigïdai jaa tomax buidadagi dai apia buaboituda ïrhidi jaa ïpï nïnïrakatai ix kïï buadagi. Odami ix makïdï kïïga oigïdai jaa mos apia kapatudaiña ïïgi iibhïadï dai mai daadagitoiña ix maitiagi soi ïrhiaragai tomax daibuñagi.

⁸ Bhaitoma bïïxi ixtumaxi bia ix tuigako ugitiagi dïï gia bïïxkïrï bïïtarï oidaka agai go oigïldaragai. Gobai gia mai ugiti agai. Daiñi, ayimu ix tuigako ka maiti gï agadamu go gubukarhigai ixtukïdï aagagi ñoki ix makïdï Diuxiañdïrï imïi dai ka ugitimu go gubukarhigai gobai. Dai ka mai tipukamu ïpï go gubukarhigai ixtukïdï todian dukai ñokadagi ïmoko ïma maaxi ñokadami ñokidïkïdï. Gobai ugitimu ïpï. Dai xibi kia oidaga xorai biakagi go gubukarhigai Diuxiañdïrï sai maatïkaïkana ixtumaxi xijiakami ïpï dïï gia xïxkadï ïmadï darakagi aatïmï Diuxi ka maiti gï aagadamu go gubukarhigai gobai. Bïïxi go gubukarhigai gobai ugitimu tudu. Dïï gia go oigïldaragai apia kïïkiada agai bïïxkïrï bïïtarï.

⁹ Daiñi, xibi gïr maakai Diuxi gubukarhigai sai maatïkana aatïmï naana maaxi dïï bïïxkïrï gïr biïga kia ix maatïkagi aatïmï bamioma ixtumaxi. Dai gïr maakai Diuxi gubukarhigai sai aagaiña aatïmï ñoki ix makïdï Diuxiañdïrï imïi ïpï dïï gïr biïga kia ix aagiadagi aatïmï bamioma ixtumaxi gïr tïtïgiadagi ïgai kia.

¹⁰ Kaxkïdï tudu tomaxi bia aatïmï naana maaxi gubukarhigai Diuxiañdïrï bïïxkïrï gïr biïga naana maaxi. Dïï gia gï kugaidakai Diuxi aaduindadï aidï gia ka maiti gïr biïgakamu tomarhi ïmo ixtumaxi dai aidïpïrï ka maiti gï agadamu go gubukarhigai ix makïdï bia aatïmï xibi. Ugitimu gobai amaxi.

¹¹ Gïn aagidamu aanï ix maaxi gobai. Daiñi, ïkioma ïmo arhi odamikana aanï dai ïmo arhi odami dukai ñokaiña dai biakana aanï ïmo arhi odami tïgibudadï. Aidï mai kïïga maatïkatadai aanï naana maaxi kia. Dïï xibi ka kïrhitukai aanï ka mai pomaaxi ibuayi. Gïïpi ïma maaxi gin tïgibudaga xibi.

¹² Dai pomaaxi aatïmï buaboitudadami ïpï. Xibi kia komaikami maaxi Diuxi gïr bïïtarï ïpïan dukami xi ïmo nïidakaru komaikamiïrï nïijadamudai aatïmï ïgai. Mai maatï aatïmï naana maaxi kia kaxkïdï. Dïï gia kugaidakai Diuxi aaduindadï aidï gia kïïga buijako nïijadamu aatïmï Diuxi. Xibi palïpi maatï aatïmï Diuxi dïï ka kugaidakai ïgai aaduindadï kïïga maatïkamu aatïmï. Aidï gia ix xïï kïïga gïr maatï ïgai po kaxi kïïga maatïkamu aatïmï ïpï ïgai.

¹³ Dïï gia xibi mai kia kugaidakai Diuxi aaduindadï oidakamu kia baika ixtumaxi ix makïdï mai ugitimu kia. Oidakamu gïr buaboidaraga buaboidaitai aatïmï Diuxi. Gobai ïr ïmoko ix makïdï mai ugitimu kia. Dai biakamu aatïmï kia gïr nïnïraraga ïpï maatïkatai aatïmï sai Diuxi iduñimu ixtumaxi gïr aagidi. Gobai gïr nïnïraraga mai ugitimu ïpï. Dai oidakamu kia oigïldaragai gïr oigïdatai aatïmï aipakoga. Gobai mai ugitimu ïpï. Baika ixtumaxi oidakamu tudu ix makïdï mai ugitimu dïï gia gaoigïldadagi ïr ïgai ix makïdï bamioma ïr namïakïdï.