1 Korintios 12 - Northern Tepehuan Bible

Diuxi Ibhïadï maakai naana maaxi gubukarhigai go buaboitudadami

¹ Gin susukurhi, Diuxi Ibhïadï gïr maakai naana maaxi gubukarhigai. Dai xibi ipïrhidi aanï ix kïïga maatïkagi aapimï ix tumaxi ïr buaboi gokïdï dai gïn aagida iñagai ïmo ñoki.

² Daiñi, kïïga maatï aapimï sai ïkioma aidïxi mai kia buaboitu aapimï naana dukai gïn bapaidiña ixtumaxi sai buaboitudaiña aapimï uubixi tomaxi go uubixi tomarhi mai ñokai. Ix makïdï gïn bapaidiña mai ïïgiditadai Diuxi Ibhïadï tudu gïn bapaiditai.

³ Kaxkïdï xibi ipïrhidi aanï xi kïïga maatï nïijada aapimï xorai ïgai dai ïïgidimi Diuxi Ibhïadï dai xorai mai ïïgidimi ïpï bai podukai maiti gïn bupuirumadagi ïgai. Daiñi, ïmo odami ix makïdï ïïgidimi Diuxi Ibhïadï xadïrï potïna sai ajïga Suxi xi taatagi go gïdukïdï gïgïbidaragai ïko dakatai Diuxiañdïrï. Dai mosïkaxi odami ix makïdï gia kïïga ïïgidi Diuxi Ibhïadï bhaiga ix bhai aagagi ix Suxi bïïxi adaama ïr Tïanïdami. Podukai gï maatï xorai ïïgidimi Diuxi Ibhïadï dai xorai mai ïïgidimi.

⁴ Daiñi, Diuxi Ibhïadï ïjïkobai gïr maakai gubukarhigai aatïmï buaboitudadami saidi ibuadana aatïmï Diuxi aaduindadï. Dïï tomaxi naana maaxi gubukarhigai bia aatïmï bïïxkïrï mos ïmo ïmapïkïañdïrï daibïi gobai, Diuxi Ibhïadïañdïrï.

⁵ Aatïmï buaboitudadami naana dukai ibuayi aaduindadï Diuxi dïï mos arhi ïmo Gïr Nukadakami bïïtarï aatabuayi aatïmï.

⁶ Naana maaxi gubukarhigai bia aatïmï ïjïkobai tudu Diuxi aaduindadï bïïtarï dïï gia go gubukarhigai mai aipadïrï dibia. Mosïkaxi Diuxi ïgai dai gïr maakai gobai.

⁷ Ïjïkobai gïr maakai Diuxi naana maaxi gubukarhigai saidi gïr soikïiña aatïmï aipakoga dai sai podukai gï maatïkana ix gïr ïmadï daja Diuxi Ibhïadï.

⁸ Daiñi, Diuxi Ibhïadï mamaakai gubukarhigai ïïmoko sai gatïtïïgiada ñoki aagaitai tïgibudagai ix makïdï kïïga ïr soiñi. Dai jaa mamaakai ïgai gubukarhigai ix kïïga maatïkana dai aagaiña ixtumaxi Diuxi gïn tïtïgiadagi.

⁹ Dai jaa mamaakai ïgai gubukarhigai saidi kïïga buaboitudaiña ïgai Diuxi bïïxi aïkatïrï. Dai jaa mamaakai ïgai gubukarhigai sai duduadaiña kokokoñiadï. Naana maaxi gubukarhigai bia buaboitudadami tudu dai Diuxi Ibhïadï ïgai dai maakai.

¹⁰ Ïïmoko mamaakai ïgai gubukarhigai saidi ibuadana maaxidaragai ix makïdï odami maiti ixtutuidikïi xi ibuadagi. Dai jaa saidi ïr Diuxi ñokituldiadamikagi. Dai jaa maakai ïgai gubukarhigai sai maatï kaïkana ix bhai Diuxi Ibhïadïkïdï ñokai ïmo aatagadami. Dai jaa mamaakai ïgai gubukarhigai sai todian dukai bhaigakana ix ñokadagi ïmamaaxi ñokadami ñokidïkïdï ix makïdï tomarhi ïgai dai tomarhi go gaa ix makïdï ami daraka mai maatï kaï. Dai jaa mamaakai ïgai gubukarhigai sai aagaiña ix tïiya ïrhidi ñokidï go ïma maaxi ñokadami.

Mos arhi ïmo tukugai dukai buaboitudadami tomaxi ïjïkobai bia ïgai gubukarhigai

¹¹ Arhi ïmaduga Diuxi Ibhïadï tudu dai gamaakai ïgai gubukarhigai xorai maakia ïrhiadagi ïgai.

¹² Gïn aagidamu aanï ïmo maaxidaragai aatagi ix maaxi gobai. Daiñi, tukugadï ïmo odami naana maaxi bia ix makïdï ïjïkobai bia aaduindadï. Dukami bia ïïkasodï dai noonobidï dai naanakadï dai bupuidï dai bïïxi gobai mos ïr ïmo tukugai bïïxi ïmapi tomaxi ïjïkobai bia aaduindadï. Dai pomaaxi aatïmï buaboitudadami ïpï. Muidu aatïmï tudu dai ïjïkobai bia aatïmï gïr aaduindagai dïï gia bïïxkïrï Suxi Kristo tukugadï dukami aatïmï bïïxkatai ïmapi.

¹³ Aidïxi uraba gïr darai Diuxi Ibhïadï go buaboitudadami amaxi ïmo aadunumï bii aatïmï tudu tomaxi ïr judidiukagi aatïmï ix maiti ïr judidiukagi ïpï. Ïmo aadunumï bii aatïmï ix ïr soigaxikami dukai pipioñi aatïmï ix maiti ïr pipioñi ïpï. Tomax dukai bïïxkatai aatïmï bia Diuxi Ibhïadï dai kaxkïdï ïr ïmo aadunumï aatïmï.

¹⁴ Ka nïidi aatïmï tudu sai mai xu xi mosïkaxi ïmo ixtumaxi bia gïr tukuga. Naana maaxi tutuidadï bia gobai.

^15-16 Dai ix potïimudai gïr ïkaso xiïpï gïr naaka sai maiti ïr tuidadï gobai gïr tukuga, ¿Gobai ix tïiya ïrhidi saidi ïr buaboi ix maiti ïr tuidadï gobai gïr tukuga? Xadïrï. Tomax dukai kaxi ïr tuidadï gobai di.

¹⁷ Dai podukai ïpï xi ïmo bujikamudai bïïxi gïr tukuga xadïrï kaïkamudai aatïmï. Gï agai gïr naanaka ïpï di. Dai podukai ïpï ix ïr ïmo naakaikamudai bïïxi gïr tukuga aidï gia ¿Dukatai uubagiadamudai aatïmï ixtumaxi?

¹⁸ Dïï maiti ïr podukai dai bhaiyoma Diuxi darai naana maaxi tutuidadï gïr tukugana ïïgi ix dukatai bhai ïrhi ïgai.

¹⁹ Dai ix mos ïmo ixtumaxi biakamudai gïr tukuga aidï gia ka maiti ïr gïr tukugakamudai kïïgakïrï ¿Aba? Kaxkïdï tudu gï agai naana maaxi ix biakagi gïr tukuga.

²⁰ Mui naana maaxi bia gïr tukuga tudu. Bia aatïmï gïr ïïkaso dai gïr naanaka dai bïïxi gobai mos ïr ïmo tukugai.

²¹ Dai xadïrï potïdana gïr bupuji gïr noonobi sai mai aagai gobai. Dai podukai ïpï xadïrï potïdana gïr moo gïr ïïkaso sai mai aagai gobai ïpï.

²² Daiñi, sïïrhikïdï tïgito aatïmï tutuidadï gïr tukuga ix makïdï bamioma mai gupuka maaxi.

²³ Bïïxi tutuidadï gïr tukuga kïïga namïga tudu. Dïï oidaga ïïmoko ix makïdï mai xii namïakami dukai nïidi aatïmï dai ix makïdï xaïrai aatïmï ix nïijadagi jaa dai gobai bamioma nukadai aatïmï dai kïïga iñapai.

²⁴ Dïï gia ix makïdï bamioma bhai maaxi mai pokaxi nunukadai aatïmï. Kaxkïdï tudu Diuxi bhai dui gïr tukuga sai bamioma kïïga nukadakana aatïmï tutuidadï ix makïdï mai xii namïakami dukai nïidi aatïmï.

²⁵ Podui Diuxi sai ïmapi aatabuadagi gïr tukuga tutuidadï gïn soikïitai aipakoga.

²⁶ Pomaaxi ïpï xïxkadï kokoakagi lïïchi tukugadï ïmo odami. Mai bhai taadakana bïïxi tukugadï aidï. Dai ix lïïchi gïr tukuga biakagi ïmo bhai ïrhiaragai maaxi aidï gia bïïxi gïr tukuga bhai gï ïrhidi. ¿Maiti ix ïr buaboi gobai?

²⁷ Go ñoki ix makïdï gïn aagidi aanï gïr tukugakïdï gobai ïr ïmo maaxidaragai ix dukatai aatabuayi aatïmï buaboitudadami. Suxi Kristo tukugadï dukami aatïmï tudu ïmo aadunumïkatai. Muidu aatïmï dai bïïxkatai aatïmï bïïna daraka Suxi Kristo. Ïpïan dukami aatïmï tutuidadï Suxi tukugadï.

²⁸ Daiñi, darai Diuxi naana maaxi gïr soikïdami gïr saagida. Ïpïgioma darai ïgai ix makïdï ïr ojotosadï Suxi Kristo. Dai gokiïrï darai ïgai jaa ix makïdï ïr Diuxi ñokituldiadamigadï. Dai bhodïrï darai ïgai mamaatïtuldiadami. Daidi maa ïgai gubukarhigai jaa saidi ibuadana ïgai maaxidaragai ix makïdï odami mai bhaiga ix ibuadagai. Dai jaa saidi duduadaiña kokokoñiadï. Dai jaa saidi naana maaxiïrï soikïiña go gaa. Dai jaa saidi ïr bhaitï gukakamikana. Dai jaa maa ïgai go gubukarhigai saidi todian dukai bhaigakagi ix ñokiagi ïma maaxi ñokikïdï.

²⁹ Naana maaxi soikïdami maa Diuxi go buaboitudadami tudu dïï ïjïkobai gubukarhigai maa ïgai saidi ibuadana aaduindadï. Dai mai xu xi bïïxkatai ïr ojotosadï Suxi Kristo dai mai bïïxkatai ïr Diuxi ñokituldiadamigadï. Mai xu xi bïïxkatai ïr tïtïïgiadami ñoki xiïpï ibuadami maaxidaragai.

³⁰ Mai xu bïïxkatai bia gubukarhigai ix duduadagi kokokoñiadï xiïpï ix ñokadagi ïmai ñokikïdï ix makïdï tomarhi ïmadutai mai maatï kaï xiïpï xi aagagi ix tïiya ïrhidi go ñoki ix makïdï ïmamaaxi ñokikïdï aagai ïmai.

³¹ Kïïga gï maatï tudu sai mai bïïxi go buaboitudadami bia ï galbaaxi aaduindagai. Dïï gia oidaga ïïmo gubukarhigai ix makïdï bamioma ïr soiñi. Gobai tudu gï agai ix biaka ïrhiada aapimï. Dïï xibi gïn aagidamu aanï ix dukatai ibuadagi aapimï ix makïdï gïïpi bamioma namïga ix bhai go gubukarhigai ix makïdï aagai aatïmï xibiki.