1 Korintios 11 - Northern Tepehuan Bible

¹ Daiñi, aanï ïpïan dukai ibuayi Suxi Kristo kaxkïdï abïr gin ïpïan dukai ibuada ïpï.

Pabora aagidi go oki buaboitudadami ix dukatai gï agai ix ibuadagi ïgai ïmpaiñdaradïrï

² Gin susukurhi, kïïga tïgitokaiña aapimï bïïxi go aatagi ix makïdï gïn aagidi aanï. Dai kïïga ibuayi aapimï bïïxi ixtumaxi gïn tïjai aanï ïpï. Kïïga ibuayi aapimï podukai ibuadatai.

³ Dïï kia oidaga ïmo ixtumaxi ix makïdï gïn aagida in ïrhidi. Ipïrhidi aanï ix maatïkagi aapimï sai ix dukai tïanïi gïr moo gïr tukuga podukai Suxi Kristo ïpï ïr modï dukai kïkïïrhi. Dai podukai ïpï kïkïïrhi ïr modï dukai ïpï ooñigadï dai Diuxi ïr modï dukai Suxi Kristo.

⁴ Kaxkïdï ïmo kïïrhi xïxkadï gadaanïda agadagi Diuxi xiïpï aagadagi Diuxi ñokidï maiti gï agai ix iñapikagi modï. Ix iñapikagi modï gobai ïr ïmo parunaragai Suxi Kristo buidïrï tudu.

⁵ Dïï go oki gia gï agai ix iñapikagi momodï. Ïgai ïr ïmo parunaragai kunadï bui ix mai iñapikagi modï xïxkadï gadaanïdagi Diuxi ïmpaiñdaragïrï. Dai podukai ïpï xïxkadï aagiadagi Diuxi ñokidï. Ix pobuadagi ïgai mai iñapikatai momodï gobai ïr ïmo xaïraragai. Gïn aagidamu aanï ix maaxi gobai. Daiñi, ¿mai ix xaïraraga ix ïmo oki ïmo kïïrhi dukai ikidagi kuupadï? Ïmo kïïrhi dukai ibuayi ïgai kaxkïdï. Dai podukai ïpï ix daanïda ïgai Diuxi mai iñapikatai modï. Gobai ïr xaïraragai ïpï.

⁶ Daiñi, ix maiti ipïrhiada ïmo oki ix iiñagi modï gobai ïr ïpïan dukami ix kïï ikidikamudai modï ïmo kïïrhi dukai. Daiñi, go oki maiti ipïrhidi ix kabami kaburhikagi kuupadï ¿Aba? Maiti ipïrhidi ix ïmo kïïrhi maaxkagi kaxkïdï. Dïï kïkïïrhi mai iñapikana modï xïxkadï gadaanïdagi ïgai dai ïïmo oki mai iña ïrhidi momodï ïpï. ¿Ix tuixi pobuayi ïgai? Gobai ïpïamaaxi kïïrhi ïpï di. Gï agai tudu ix iiñagi ïgai momodï.

^7-8 Dïï gia kïkïïrhi maiti gï agai ix iñapikagi momodï gadaanïitai Diuxi xiïpï aagaitai Diuxi ñokidï. Kaxkïdï tudu kïkïïrhi ïpïamaaxi duñixi Diuxi dai maaxitudai ïgai xïïxi ïr gïdukami Diuxi mai iñapikatai momodï. Dai go oki kïïrhiañdïrï busai sai maaxitudana xïïxi ïr gïdukami ïgai. Kïïrhiandïrï idui Diuxi go oki tudu dai mai xu ix okiañdïrï idui ïgai go kïïrhi.

⁹ Dai ïkobïrakoga go kïïrhi bïïtarï idui Diuxi go oki dai mai xu ix oki bïïtarï idui ïgai go kïïrhi.

¹⁰ Daiñi, asta Diuxi tïtïañikarudï tïgito nïnïidiña ix bhai oki ïïgidimi kunadï. Kaxkïdï go oki gï agai ix maaxitudagi ix ïïgidi dai iñagi momodï.

¹¹ Dïï gia tomaxi ïr buaboi gobai sai go oki bia ix ïïgiadagi kunadï dïï gia aapimï buaboitudadami abïr gïn tïgitoka sai bïïxkatai aapimï uraba daraja Diuxi. Mai xudu ix ïr kïkïïrhikagi ix ïr okikagi ïpï. Mai bhaiga oki ix pokaitadagi sai mai tïgitokagi go kïïrhi tudu dai tomarhi kïkïïrhi mai bhaiga ix pokaitadagi sai mai tïgitokagi go oki. Sïïrhikïdï gïn tïgito aapimï aipakoga.

¹² Daiñi kïïga maatiga maaxi sai go oki kïïrhiañdïrï duñixikatadai tukamïrï dïï gia aidï abhiadïrï okiañdïrï bubuakïi bïïxi kïkïïrhi. Kaxkïdï ¿Dukatai pokaitidana aapimï sai maiti gïn tïgito aipakoga? Diuxi ïgai dai ïr ibuadami bïï gokatai tudu. Diuxiañdïrï daibïi bïïxi aïkatai tudu.

¹³ Kïïga abïr gïn tïgito kaïka idi ñoki tudu dai aagada ix bhai maiti ïr buaboi sai gï agai go oki ix iñapadagi momodï xïïxkadï ïmo ïmpaiñdaragiana gadaanïdagi ïgai Diuxi.

^14-15 Daiñi, ¿Maiti ix ïr buaboi sai ïmo oki kïï tiodi dai kïïga okiga maaxi tïbïdukatai kuupadï? Diuxi maa kuupadï ïmo iiñaragai dukai momodï bïïtarï tudu. Dïï gia kïkïïrhi bïïtarï ïr xaïraragai xi kabami tïbïdukagi kuupadï. Gobai gia kïïga maatiga maaxi.

¹⁶ Kaxi gïn aagidi aanï tudu ixdukatai ibuadagi oki ïmpaiñdaradïrï buaboitudami. Dai ix oidakagi xorai ñokadagi po ïrhiditai ix mai kïï aagai aanï gokïdï aanï mosïkaxi ïmo ixtumaxi aagidiña. Mosïkaxi aagidiña aanï sai bïïxi go gaa ojotosadï Suxi Kristo gin ïpïandukai aagai gokïdï. Dai bïïxi go buaboitudadami ix makïdï aipakoga gïn ïmpaidiña podukai ibuayi ixdukai aagai aanï ïpï. Kaxkïdï mai tipu ñoki.

Go buaboitudadami Korintoïrï óídakami mai kïïga ibuadana xïxkadï ïmapi gakuadana go kuadagai xïxkadï tïtïitoda ïgai Suxi

^17-19 Gin susukurhi, mai bhaiga aanï ix potïiyagi sai kïïga ibuayi aapimï. Daiñi, gïn aagidamu aanï ix dukatai kajioma aanï gïn ïmpaiñdaragakïdï. Kajioma aanï aatagi sai gïn bupui surhigïiña aapimï gïn ïmpaiñdaragiana dai ïïmoko go aatagi ix makïdï kajioma aanï ïr buaboi ïrhi aanï. ¡Xïï kïïga maaxidi aapimï sai kïïgakïrï gïn nïidi Diuxi pomaaxi ibuadatai! ¡Ïmo buirudagai gobai! Gï agaitadai ix aipakoga gïn soikïdagi aapimï bai bamioma gïrana gïn buaboidaraga dïï bhaiyoma aapimï gïn bupui surhigïiña aipakoga. Kaxkïdï, ¿Dukatai potïna aanï sai kïïga ibuayi aapimï pobuadatai?

²⁰ Daiñi, xïïxkadï ïmapi gakuadagi aapimï tïgito agaitai Suxi Kristo dai mai tïtïitoiña Suxi aapimï bhaiyoma.

²¹ Mosïkaxi ïïgi gïn tïgitokana aapimï tudu. Kajioma aanï sai ïïmadutai aapimï otoma kuadana dai yïïdana ixtumaxi bua dai mai óídiña go gaa. Podukai aapimï asta nabaakorïiña ïïmadutai bhaibitukami gakuadatai dai gayïdatai dai jaa mos bhiugikoiña mai óíditai aapimï.

²² ¡Sïïrhikïdï mai kïïga ibuayi aapimï! ¿Maiti mïx bia ïïgi gïn kiiki xako gaugiagi bïïxi ixtumaxi ugia ïrhiada aapimï? Dïï aapimï bhaiyoma gïïgïpi buyiña kuadagai xïïxkadï ïmapi gakuada aapimï dai podukai soi dukai nïnïidiña aapimï Diuxi ïmpaiñdaradï dai xaïratudai aapimï ix makïdï mai bua kuadagai. ¿Bhai ix ïr kïïga podukai? Kaxkïdï mai bhaiga aanï ix potïiyagi sai kïïga ibuayi aapimï tudu.

Pabora aagidi ix dukatai gï agai xi ibuadagi dai xadutudaitai tïgitokagi go Suxi Kristo

²³ Gin susukurhi, kaxi gïn maatïturhi aanï ixtumaxi gin maatïturhi Suxi Kristo go kuadagaikïdï ixtukïdï gïr tïgitokana aatïmï ïgai. Gïn aagidi aanï tudu sai aidï tukarï xi gatïïgi Udaxi go Suxi sai bhïiyi Suxi pan

²⁴ dai aagidi Diuxi sai bhai gï ïrhidi ïgaikïdï dai bhodïrï saasasa. Dai bhodïrï takogi ïgai mamaatïrdamigadï. Daidi itïtïdai ïgai, —Idi pan ïr gin tukuga dukami ix makïdï gï saasasa agai gïn bïïtarï. Gin tïgitobïrai mïx xïïxkadï ugiagi idi— itïtïdai.

²⁵ Dai bhodïrï kaxi gaugakai bhïiyi ïgai ïmo tasa biakami bino dai potïi ïpï. Aagidi Diuxi ix bhai gï ïrhidi dai bhodïrï maa mamaatïrdamigadï daidi itïtïdai, —Idi bino ïr gin ïra gï dukami dai ïr ïmo maaxidaragai sai xïxkadï aaxtagi aanï gin ïra namïakami bimu go utudui ñoki ix makïdï bhai duñagai Diuxi gïn bïïtarï. Gin tïtïitodabïrai mïx xïxkadï iiyagi gobai— itïtïdai.

²⁶ Kaxkïdï xibi abhiadïrï asta xïxkadï dibiagi Suxi Kristo ïpamu go pan dai go bino gïn tïgitotuldamu ix muu Suxi gïn bïïtarï. Gïn tïgitotuldamu gobai xïxkadï gakuadagi dai gaiiyagi aapimï.

²⁷ Daiñi, gï agai ix kïïga gïn xadutuadagi aipakoga mïx xïxkadï gakuadagi go kuadagai tïgitokatai go Suxi. Ïma dukai mai xadutuadan buayi aapimï Suxi Kristo tukugadïkïdï dai ïradïkïdï.

²⁸ Kaxkïdï abïr kïïga gïn tïgito nïida ix dukatai ibuayi gakuadatai dai gayïdatai gobai.

²⁹ Ix ugiagi ïmoko mai xadutudaitai go gaa buaboitudadami aidï gia ïïgi bhïbhïjïi ïgai gïgïbidaragai Diuxiañdïrï. Go buaboitudadami ïr Suxi tukugadï gïn dukami di.

³⁰ Kaxkïdï mai gupukana muidutai aapimï dai kokokoñikana dai asta ka koi ïïmoko maiti gïn xadutudaitai aipakoga.

³¹ Dïï gia ix kïïga gïr xadutuadagi aatïmï aipakoga gakuadatai go kuadagai aidï gia maiti gïr gïgïbituldamu Diuxi dai tomarhi mai potïimu ïgai ix mai kïïga ibuayi aatïmï.

³² Daiñi, xïïxkadï Diuxi maakiagi ïmo gïgïbidaragai ïmo maatïtuldaragai dukai gobai gïr soikïi sai maiti gïr aïna ïmo gïdukami gïgïbidaragai ix makïdï ajïi go gaa ix makïdï mai buaboitudai.

³³ Kaxkïdï tudu xïxkadï gaugia agadagi tïgitokatai Suxi abïr maaka oigaragai bïïxkatai sai gaugiagi.

³⁴ Dai ix kabami bhiugikoñikagi aapimï abïr gauga gïn kiiyïrï mai kia iimïkai ïmpaiñdaragiana. Podukai kïïga xadutuadamu aapimï go gaa dai mai potïimu Diuxi sai mai kïïga ibuayi aapimï mai dagitokai ix gaugiagi go gaa. Podukai maiti gïn maakimu Diuxi gïgïbidaragai. Kia biïga jaa aatagi ix gïn aagidagi aanï aagaitai ix makïdï gin ojidi aapimï dïï gobai gïn aagidamu aanï gokiïrï xïxkadï amïka gïn dibidagi aanï.