1 Korintios 10 - Northern Tepehuan Bible

Pabora aagidi buaboitudadami sai gïn tïgitona ix dukatai dïgabusai go Israelitas ïïki

¹ Gin aaduñi, ipïrhidi aanï ix gïn tïgitokagi aapimï ix dukatai pogïdui gïr ïïki aaduñi aidïxi oidigana ajiopatadai ïgai. Aidïpïrï bïïxkatai ïgai oidiña go ikomai ïmadï go táí ix makïdï otoi Diuxi sai bhaitïki imïiña. Dai bïïxkatai kïïgakïrï bubuakai saagida dïgabuskïitai go gïï sudagi.

² Podukai bïïxkatai gïr ïïki aaduñi uraba go Moises.

³ Bïïxkatai ïgai kuadana go kuadagai ix makïdï gamaakaiña Diuxi.

⁴ Dai bïïxkatai gayïdana go sudagi ix makïdï maakaiña Diuxi ïpï dai ix makïdï ïmo odaiñdïrï busanïiña. Dai go odai xajadïrï busai go sudagi ïr ïmo maaxidaragai dukai Suxi Kristokïdï. Kaxkïdï tudu ix dukai gïr aaduñi go odaiñdïrï yïïdana sudagi ïïki dai ïgaikïdï óídakaiña podukai ïpï Suxi Kristo ïmadï aimïraiña dai ïgaikïdï óídakaiña gïr aaduñi ïpï.

⁵ Dai bïïxkatai ïgai nïidi ix dukatai soikïiña Diuxi dïï tomax dukai muidutai ïgai soimaaxi idui Diuxi buidïrï. Kaxkïdï mai bhai ïrhi Diuxi dai kodai dai aipako bïïtïkatadai ïgai tukugadï amaxi oidigana xako ajiopatadai ïgai.

⁶ Gobai ix makïdï daibusai ïïki gïr aaduñikaru ïmadï ïr ïmo maaxidaragai gïr bïïtarï sai mai adaimuda aatïmï soimaaxi tïgibudagai ix dukai ibuadana ïgai.

⁷ Dai sai mai buaboitudaiña aatïmï go uubixi ïpï ix dukai ibuadana muidutai ïgai. Ibuadana ïgai ix dukatai oja go Moiseskaru ïïki tudu. Ami ojadïrï ikaiti sai, Go odami gauu daidi gaii gabagimadatai dai bhodïrï go kïkïïrhi ïmadï go oki gïn aaga idui buirudagai gatutudakïitai, ikaiti go ojai.

⁸ Maiti gï agai tudu xi abhana bopodagi aatïmï jaa aipakoga ix dukai idui gïr aaduñi ïïki. Podui ïgai dai ïmokobhai dan baika mirhi koi ïmo tasïrï gïgïbiditai Diuxi.

⁹ Dai maiti gï agai ix ojorhituda aatïmï Gïr Nukadakami ïpï nïida ïrhiditai sa bhai mai bhaamukana soimaaxi ibuadatai aatïmï. Podui muidutai gïr aaduñi ïïki dai kaxkïdï koi kïkïkai kookoyi.

¹⁰ Dai maiti gï agai xi soi kaitada aatïmï Diuxi buidïrï ïpï kaxkïdï tudu podui mui gïr aaduñi ïïki dai Diuxi otoi ïmo tïañikarudï sai mui kodana dai mui koi.

¹¹ Daiñi, xibi karhioga ugiti agai go oidigi. Dai bïïxi gobai ix makïdï daibusai ïïki ïr ïmo maatïtuldaragai xibi gïr bïïtarï ix makïdï óídaga xibi. Ïgaikïdï mamaatïrïi aatïmï sai maiti gï agai ix ibuadagi ixtumaxi ibuadana gïr aaduñi ïïki. Ïgai kïï gubuakami ïrhiditadai ïïgi buaboidaradï dai todian dukai gïpiïrï surhi soimaaxi idunakai.

¹² Kaxkïdï maiti gï agai ix kïï gubuakami ïrhiadagi ïïgi buaboidaradï ïmoko tadu gïpiïrï gïi ïpï soimaaxi ibuadatai ïpï.

¹³ Gï agai ix kïï gï tïgitokagi ïmoko tudu. Daiñi, go soimaaxkami ajïi bïïxi odami. Kaxkïdï maiti gï agai xi po gï ïrhiada aapi sai mosïkaxi ïmoko gï ajïi gobai. Dïï gia kïïga gï maatï sai kïï tuiga Diuxi dai maiti gï dagitomu buaboitudadamikatai aapi dai bhaiyoma gï soikïdamu ïgai sai biakana aapi ix dukatai bui kïïkibagi go soimaaxi.

Pabora aagidi go buaboitudadami sai mai urapïkïiña go gaa odami ix makïdï buaboitudai uubixi

¹⁴ Gin aaduñi, kïïga gïn oigïdai aanï kaxkïdï gïn tïanïi aanï sai mai buaboitudaiña aapimï go uubixi. Gajiadïrï abïr bia gobai.

¹⁵ Kïïga bia aapimï tïgibudagai ixtukïdï gin maatï kaïkagi tudu kaxkïdï abïr ïïgi aagada ix bhai mai kïï aagai aanï.

¹⁶ Gïn aagidamu aanï ïmo ñoki aagaitai xïïxkadï gayïdagi aatïmï dai gakuadagi gïr tïgito agaitai ix tumaxi idui Suxi Kristo gïr bïïtarï. Ïmo urabaragai gobai gïr bïïtarï. Daiñi, go iidagai ïr ïmo maaxidaragai Suxi ïradïkïdï. Dai xïïxkadï ïmapi gayïdagi aatïmï bïïxkatai dai potïdagi aatïmï Diuxi ix bhai gïr ïrhidi ïgaikïdï kïïga biakana aatïmï ïmo urabaragai. Ïmapi gïr tïgitokana aatïmï podukai sai Suxi aaxi ïradï mukukai gïr bïïtarï. Dai xïïxkadï saasasadagi aatïmï go pan dai gïr takoidadagi gokïdï gïr tïgitokana aatïmï sai Suxi kïïga gïr soi gï saasasatudakai tukugadï kuruxiana.

¹⁷ Mos arhi ïmo panaiñdïrï gakuayi aatïmï bïïxkatai tudu dai podukai biakana aatïmï ïmo urabaragai dai gamamaaxidi ix ïr ïmo aadunumï aatïmï. ¿Maiti ix ïr buaboi gobai?

¹⁸ Gïn tïgitobïrai ixdukatai ibuayi go judidiu. Daiñi, ïgai xadutudai Diuxi xïïxkadï gakuadagi ïgai kuadagai ix makïdï ïr daxdaradï Diuxi.

¹⁹ Dai podukai ïpï odami ix makïdï kuadana daxdaradï ïmo ubixi xadutuadan buayi go ubixi ïpï. Dïï gia tomaxi odami daxdagi kuadagai go uubixi gobai mai itïiya ïrhidi sai bia gubukarhigai go ubixi. Dai mai itïiya ïrhidi sai go daxdaragai ïr soiñi odami bïïtarï ïpï.

²⁰ Bhaiyoma itïiya ïrhidi gobai sai ix makïdï gï dadaxdi ïmo ubixi maiti gï dadaxdi Diuxi. Kaxkïdï tudu ix makïdï gï dadaxdi go uubixi gï dadaxdi go diabora tïtïañikarudï bhaiyoma. Kaxkïdï xorai kuadagi gobai urapïkïdan buayi diabora tïtïañikarudï. Dai maiti ipïrhidi aanï ix urabagi aapimï go diabora tïtïañikarudï toma lïïchi. Kaxkïdï maiti gï agai ix kuadagi aapimï gobai.

²¹ Maiti ïr sïïrhi tudu ix gayïdagi dai gakuadagi aapimï go xadutudaradï Diuxi dai gayïdagi dai kuadagi go xadutudaradï diabora tïtïañikarudï ïpï.

²² Tadu bhamukitu aapimï Diuxi. Gïïpi bamioma gubuka ïgai xi aapimï di.

Pabora aagidi go buaboitudadami saidi ibuadana ixtumaxi ïr soiñikagi jaa bïïtarï

²³ Ïïmadutai aapimï buaboitudadami pokaitiña sai bia oigaragai ix ibuadagi ïïgi ixtumaxi iduña ïrhiada. Dïï aanï aagai sai maiti gï agai podukai. Mai xu ix bïïxi ix tumaxi duñagi ïmoko ïr soiñi. Mai xu ix bïïxi ix tumaxi iduñagi ïmoko soikïi jaa ix gïrhiagi buaboidaradï tudu.

²⁴ Dai maiti gï agai ix ibuadagi ïmoko mosïkaxi ixtumaxi ïr soiñi ïïgi bïïtarï. Gï agai bhaiyoma ix gaagagi aatïmï ixdukatai ibuadagi ix makïdï kïïgakïrï soiñagi jaa sai bamioma gïrana buaboidaradï.

²⁵ Xibi gïn aagidamu aanï ixdukatai ibuadagi aapimï go kuadagaikïdï ix makïdï gï dadaxdi go uubixi. Daiñi, xïïxkadï gasabïda agadagi aapimï kuadagai ïmo gagarakaruana maiti abïr gatïkakada ix bhai maiti ïr daxdaradïkatadai gobai ïmo ubixi. Kaxkïdï tudu mai po gïn ïrhiada ix bhai mai soimaaxi idui gokiïrï ugakai. Maiti gï agai tudu ix buamï ïrhiada aapimï ix bhai ix kïïgadu ix ugia aapimï ix cho ïpï.

²⁶ Daiñi, Diuxi ñokidïrï ikaiti sai, Bïïxi ïr tuidadï Diuxi go oidigi ïmadï bïïxi ixtumaxi oidaga tami oidigi daama, ikaiti go ojai. Kaxkïdï tomaxi gï dadaxdi ixtumaxi ïmo ubixi bïïxkïrï ïr Diuxi tuidadï gobai. Kaxkïdï tudu, ¿Ix tuixidï ïr soimaaxkami gobai?

²⁷ Dai ix ïmo odami ix makïdï maiti ïr buaboitudadami gï baidagi sai ïmadï ugiagi aapi, aidï gia maiti buamï ïrhiada aapi dai uga tomax tumaxi gï bhidagi ïgai. Maiti tïkakada tudu ix bhai maiti gï daxditadai gobai ïmo ubixi. Mai xu ix po gï ïrhiada aapi sai soimaaxi ibuayi gakuadatai gobai tudu.

²⁸ Dïï gia maiti gï agai ïpï ix ibuadagi aapi ix makïdï soimaaxkami ïrhiadagi jaa. Kaxkïdï ix gï aagidagi ïmai saidi gï daxditadai go kuadagai gobai ïmo ubixi aidï gia maiti gï agai ix kuadagi aapi. Tadu poïrhidi ïgai sai soimaaxi ibuayi aapi gakuadatai.

²⁹ Daiñi, tomaxi aapi kïï maatï sai gobai maiti ïr soimaaxi go gïmai gia poïrhidi ix ïr soimaaxi. Dai maiti gï agai ix ibuadagi aapi ixtumaxi soimaaxi ïrhidi jaa. Daiñi, jaa ikaitiña sai maiti gï agai ix buamï ïrhiada ïmoko tomaxi gïn ïrhiadagi jaa gakuadatai ïmoko.

³⁰ Po kaitiña ïgai tudu saidi ix aagidagi ïmoko Diuxi sai bhai gï ïrhidi ïgaikïdï gakuadatai go kuadagai saidi aidï gia as maiti gï agai ix po kaitadagi jaa ix soimaaxi ibuayi gakuadatai. Dïï maiti ïr podukai.

³¹ Daiñi, bïïxi aïkatïrï ix tumaxi ibuadagi aatïmï gï agai ix maaxitudagi aatïmï xïïxi ïr gïdukami Diuxi tomaxi ïr kuadagaikïdï xiïpï iidagaikïdï xi ïma maaxikïdï ïpï.

³² Maiti gï agai tudu ix ibuadagi ixtumaxi sobhikïdagi jaa ix buaboitudagi tomaxi ïr judidiukagi ïgai ix jaa ïpï, ix ka uraba daraka ïgai Diuxi buaboitudakai ix cho ïpï.

³³ Buadabïrai ixtumaxi aanï ibuayi tudu. Aanï ibuayi ixtumaxi ix makïdï kïkïïgadukami aagai jaa. Maiti ibuayi aanï mosïkaxi ixtumaxi ïr soiñikagi ïïgi aanï gin bïïtarï tudu. Dai bhaiyoma ibuayi aanï ixtumaxi ïr soiñikagi jaa bïïtarï sa bhai soiñana sai kïïgakïrï bubuakïna.