1 Korintios 1 - Northern Tepehuan Bible

Pabora biaturhi go buaboitudadami Korintoana óídakami

¹ Gin aaduñi Korintoïrï óídakami, aanï ïr Pabora dai aanï ïmadï gïr aduñi Sóstenes gïn otoxi idi ojai. Gin aaduñi, bia aanï ïmo sïïrhikami otosadïkatai aanï Suxi Kristo. Dai Diuxi ïgai dai podukai gï tïgito dai bhai aa ix Suxi Kristo gin baidana ansaidi ïr otosadïkana aanï.

² Idi ojai ïr gïn bïitarï aapimï buaboitudadami Korintoïrï óídakami. Aapimï gïn bïïtarï tudu ix makïdï ka ïkobai gïn darai Diuxi bïïna darakatai aapimï Suxi Kristo. Ïko darasadï aapimï Diuxi gïn bapaidakai ïgai ïmadï bïïxi go gaa buaboitudadami ïpï ix makïdï bïïxi aipakoga daanïiña Suxi Kristo. Suxi Kristo tudu ïgai daidi ïr Tïanïdamigadï bïïxkatai aatïmï buaboitudadami.

³ Dai ipïrhidi aanï sai kïïga maatï taatana aapimï xïï kïï tutuiga Diuxi gïr Oga ïmadï Suxi Kristo gïr bïïtarï Gïr Nukadakamikatai ïgai. Dai ipïrhidi aanï ix kïïga gïn iibhïxtakan taadakagi aapimï.

Pabora aagai sai bhai gï ïrhidi Diuxikïdï kïï tuigakatai Diuxi go buaboitudadami bïïtarï

^4-5 Gin aaduñi, sïïrhikïdï kïï tuiga Diuxi gïn bïïtarï gïn maakaitai naana maaxi gubukarhigai gïn ibhïdaga bïïtarï bïïnakatai aapimï Suxi Kristo. Xibi ka bïïna daraja aapimï Suxi Kristo tudu ix kaxkïdï bia aapimï bïïxi aïkatai ixtumaxi ïr soiñi gïn ibhïdaga bïïtarï. Naana maaxi soiñi gïn maa ïgai tudu dukami xibi bïïna darakatai aapimï ïgai bhaiga aapimï ix kïïga maakiagi ñoki dai ix kïïga maatiagi ix tumaxi ïr buaboi ïpï. Kaxkïdï dudatai aagidiña aanï Diuxi xïï bhai gin ïrhidi ïgaikïdï.

⁶ Go ñoki ix makïdï gïn aagidi aanï aagaitai Suxi Kristo kïïga gubuakan dukai idui soiñi aapimïrï tudu.

⁷ Dai kaxkïdï xibi ka bia aapimï bïïxi aïkatai go gubukarhigai ix makïdï maakai Diuxi go buaboitudadami. Dai xibi bïïxi bhai gïn ïrhiaragakïdï nïnïraka aapimï ix dibiagi Suxi Gïr Nukadakami.

⁸ Ïgai tudu gïn soiñamu xibi ix kabakan dukai gukibana aapimï gïn buaboidaragïrï asta go kugatïrï tasïrï ukami bai podukai xïïxkadï dibiagi Suxi Kristo Gïr Nukadakami mai tipukagi tomarhi ïmo ixtumaxi ixtukïdï gïpiïrï gïn bupadagi jaa.

⁹ Dai kïïga gï maatï sai Diuxi gïn soiñamu ix kabakan dukai gukibana aapimï kaxkïdï tudu ïgai kïï sïïrhi aatabuayi dai mai yaatagïi. Dai ïgai kaxi ïkobai gïn darai sai bïïnakan darakagi aapimï Maradï. Kaxkïdï ïpï gï maatï sai Diuxi gïn soiñamu ix kabakan dukai gukibana aapimï gïn buaboidaragïrï asta go kugatïrï tasïrï ukami. Ka bïïna daraka aapimï Suxi Kristo Gïr Nukadakami kaxkïdï.

Gïn bupui bïpïtïkatadai go buaboitudami ix kaxkïdï Pabora maa ñoki

¹⁰ Xibi kïïga abïr gïn tïgito kaïka aapimï gin aaduñi. Daiñi, Suxi Kristo ïgai ix makïdï gin maa ïmo sïïrhikami ix kaxkïdï gïn maakai aanï ñoki. Dai aanï aagai sai sïïrhikïdï gï agai ix ïmo aadunumïka aapimï bïïxkatai. Maiti gï aagai ix ïjïkobai biakagi aapimï gïn tïgibudaga chïchïkiatai tudu. Gï aagai xi ïmo tïgibudagai biaka aapimï bhaiyoma dai ix kïïgakïrï gïn nïijada bïïxkatai aipakoga.

¹¹ Daiñi, go Kloe aaduñdï gin aagidi sai gïn bupui bïïtïkan duu aapimï.

¹² Ïïmoko aapimï as pokaitiña sai aanï gin urabaka dai jaa saidi as urabaka go Apolos, dai jaa go Piduru dai sai jaa Kristo amakoga urabakan kaiti ïpï.

¹³ Daiñi, aatïmï buaboitudadami ïr Suxi Kristo tukugadï gïr dukami dai Suxi Kristo tukugadï mai bhaiga ix ïjïkobai gï darasagi lïïlïchi. Kaxkïdï tudu maiti gï agai ix ïjïkobai iimia aapimï urabakatai aapimï kïkïïrhi ïjïkobai dai podukai gïn bupui bïïtïkagi aapimï. Daiñi, aanï Pabora ïr ïmoko go kïkïïrhi ix makïdï oidadan kaiti aapimï ¿Dai aanï ix tudu kuruxiana gin xixatu gïn bïïtarï? ¡Cho! ¿Dai aanï ix gin uraba agaitadai aapimï dai gïn bapakoi? ¡Xadïrï! ¡Daiñi! ¡Uraba aapimï Suxi Kristo bhaiyoma!

¹⁴ Gia bhai gin ïrhidi aanï Diuxikïdï maatïkatai sai mosïkaxi goka kïkïïrhi bapakoi aanï ami Korintoïrï, mosïkaxi go Krispo ïmadï Gayo.

^15-16 Dai utudama gin tïgito aanï sai bapakoi aanï go Tibañi ïmadï aaduñdï ix makïdï ïgai kiidïrï óídaga ïpï dïï maigobai mai tïgito aanï ix bhai bapakoi aanï jaa. Mai mui bapakoi aanï tudu. Kaxkïdï mai bhaiga aapimï ix pokaitadagi sai aanï gin uraba agaitadai dai gïn bapakoi.

¹⁷ Suxi Kristo gin otoi ansai aagidiña odami go bhai ïrhiaragai aatagi tudu dai mai xu sai bapakonana aanï óídakami. Dai mai aagaiña aanï ñoki ix makïdï saitudakami dukai kaïkagi odami ïpï dai bhaiyoma aagaiña mosïkaxi ixtumaxi idui Suxi Kristo kuruxiana. Kaxkïdï tudu ipïrhidi aanï xi kïïga gïn tïgito nïijadagi odami xïï kïïgadu ixtumaxi idui Suxi Kristo kuruxiana dai mai xu ix mosïkaxi gïn tïgito nïijadagi ix bhai kïïga ñokai aanï. Kaxkïdï mai aagaiña aanï ñoki ix makïdï odami saitudakami ñoki dukai kaïkagi.

Diuxi ïgai ix makïdï bïïxi adama ïr maatïkami

¹⁸ Daiñi, go odami ix makïdï mai buaboitudai mos ïmo buirudagai dukai kaïkana gïr aatagi xïxkadï aagiadagi aatïmï ix tumaxi idui Suxi Kristo kuruxiana. Ïgai mai biaka agai soiñi dai bhïi agai go gïgïbidaragai bïïxkïrï bïïtarï. Dïï gia aatïmï gïr bïïtarï ix makïdï Diuxi kïïgakïrï gïr bubaidimi kïïga maatï aatïmï sai go aatagi bia Diuxi gubukarhigadï.

¹⁹ Daiñi, Diuxi ojadïrï ikaiti, Aanï Diuxi gajiadïrï biamu odami tïgibudadï ix makïdï sastudakami gïn ïrhidi ïïgi ïgai. Mai namïakami dukai biamu aanï tïgibudadï ïgai tudu, ikaiti Diuxi.

²⁰ Kaxkïdï ¿Tumaxi ïr soiñi go mamaatïkami xibi? Dai go ix makïdï kïïga xigiamaaxkami ñokikïdï gamaakai aatagi, dai ix makïdï kïï sastudaga bui ñokaitai jaa, ¿Ïgai tumaxi ïr soiñi ïpï? Go ïï tami idi oidigi daama óídakami tïgibudadï bia ïgai tudu dai Diuxi ka aagai sai ïgai bïïtarï bïïxi go oidigi daama óídakami tïgibudagai mos ïr ïï buirudagai.

²¹ Dïï gia Diuxi tïgibudadï gia saitudaga. Dai ïgai podukai gï tïgito dai podukai dáí sai odami tïgibudadïkïdï mai kïïga maatïkana odami Diuxi. Diuxi bhai ïrhi bhaiyoma sai mosïkaxi odami ix makïdï buaboitudagi go bhai ïrhiaragai aatagi gia kïïgakïrï bubuakïna. Dïï óídakami mos buirudagai dukai kaïkana go bhai ïrhiaragai aatagi dai mai buaboitudai.

²² Dai go Judidiu pomaaxi ïpï dai mai buaboitudai. Ïgai nïida ïrhidiña naana maaxi maaxidaragai. Ïma dukai mai buaboitudai ïgai. Kaxkïdï mai namïakan dukai nïidi ïgai go bhai ïrhiaragai aatagi. Dai go odami ix makïdï maiti ïr judidiu kaïka ïrhidiña aatagi ix makïdï ïr odami tïgibudadï kïï sastudakami.

²³ Dïï aatïmï mai sastudakami dukai ñokaiña dai bhaiyoma mosïkaxi aagaiña aatïmï Suxi Kristo ix makïdï kuruxiana gï xixatu. Kaxkïdï mui odami mai buaboitudai gïr aatagi. Go judidiu mos bhakoikana aagaitai aatïmï Suxi Kristo. Dai go ix makïdï maiti ïr judidiu mos buirudagai dukai kaïkana gïr aatagi.

²⁴ Muidu aatïmï ix makïdï ïr Diuxi bapaidadї. Ïïmoko aatïmï ïr judidiu dai jaa gia cho. Dai bïïxkatai aatïmï maatï tïï sai Suxi Kristokïdï gïr ayi Diuxi gubukadadï dai Diuxi tïgibudadï ix makïdï kïï saitudaga.

²⁵ Diuxi tïgibudadï gïïpi bamioma saitudaga ix bhai odami tïgibudadï tomaxi odami po bïnïliadagi saidi ïr buirudagai ixtumaxi buayi Diuxi. Dai tomaxi odami pobïn ïrhiadagi ix mai gubuka Diuxi ïgai bïïxkïrï gïïpi bamioma gubuka ix bhai odami.

²⁶ Gïn tïgitobïrai tudu ix maaxkatadai aapimï aidïxi Diuxi ïkobai gïn bubaitu. Aidï go gaa oidakami mai sastudakami dukai gïn nïidiña bhaitoma bïïxkatai aapimï. Dai mai tïtïanïdami dukai gïn nïidiña go gaa dai maiti ïr gïn bipidakamikana aapimï ïpï, dïï bïïxkïrï Diuxi ïkobai gïn bubaitu.

²⁷ Ïkobai gïn bubaitu ïgai tomaxi mai sastudakami dukai gïn nïidi odami sai podukai gï maaxkana xïï mai namïga go gaa ix makïdï sastudakami gïn ïrhidi ïïgi ïgai. Dai Diuxi ïkobai gïn bubaitu mai gupukatai aapimï sai podukai gï maaxkana xïï mai namïga ïgai ix makïdï gia gupukami gïn ïrhidi ïïgi ïgai ïpï.

²⁸ Pobï gï dui tudu, Diuxi ïkobai bubaitu aapimï ix makïdï go gaa odami soi dukai nïidi dai ix makïdï mai namïakami dukai nïidi ïpï. Podui Diuxi sai mai namïakami dukai biïna bïïxi ix tumaxi ix makïdï kïï namïakami dukai nïidi odami

²⁹ dai sai tipukagi ïpï tomarhi ïmo odami ix makïdï bhaigakagi ix potïdagi Diuxi sai ix maaxi ïmoko ïïgi gubukadadïkïdï bia.

³⁰ Daiñi, mos ïïgi Diuxi gubukarhigadïkïdï bïïna daraja aatïmï Suxi Kristo. Aatïmï maiti idui tomarhi ïmo ixtumaxi. Suxi Kristokïdï tudu gïr maa Diuxi ïïgi tïgibudadï dai Suxi Kristokïdï ïpï bhai dui Diuxi sai kïïgakïrï gïr nïidiña ïgai ïpï. Suxi Kristo ïgai ix makïdï ïkobai gïr bubaitu sai mos ïïgi Diuxi bïïtarïkana aatïmï dai ïgai aa namïki gïr buatuldaraga ïpï sai kïïgakïrï bubuakïna aatïmï.

³¹ Kaxkïdï maiti gï aagai ix po tïiyagi aatïmï sai ïïgi gïr gubukarhigakïdï namïga aatïmï. Bhaiyoma gï aagai ix potïiya aatïmï sai mosïkaxi Suxi Kristo ïgai ix makïdï namïga.