1 Juan 5 - Northern Tepehuan Bible

Go maamaradï Diuxi gamaitïkïi go tïgibudagai ix makïdï oidaga tami oidigi daama

¹ Gin aaduñi, toma xorai ix makïdï buaboitudai sai go Suxi ïr go gïï Tïanïdami ix makïdï otoi Diuxi tami oidigi daama ïgai kaxi ïr maamaradï Diuxi. Ix buaboitudai ïgai sai Suxi ïr go Kristo agaikïdï tudu. Diuxi ïr Ogadï xorai podukai buaboitudagi tudu. Dai kïïga maatiga maaxi sai xorai oigïdadagi ïmo gaoga sai oigïdada agai maamaradï ïpï.

² Kaxkïdï ix oigïadagi aatïmï Diuxi dai ïïgiadagi aatïmï aidï gia oigïdadamu aatïmï Diuxi maamaradï ïpï. Podukai gï maatï ix bhai buaboikïdï oigïdai aatïmï gïr aaduñi Diuxi amadïrï tudu. Gï maatï gobai ïïgi gïr tïgito nïiditai ix bhai oigïdai aatïmï Ogadï, ix bhai oigïdai aatïmï Diuxi tudu. Ix mai oigïadagi aatïmï Diuxi aidï gia xadïrï oigïdaiña aatïmï gïr aaduñi Diuxi amadïrï ïpï.

³ Dai xïxkadï ïïgiadgi Diuxi gokïdï gamamaaxidi aatïmï ix oigïdai aatïmï ïgai ïpï. Dai mai xijaiga ïïgiadagi ïgai.

⁴ Daiñi, bïïxi odami ix makïdï ïr maamaradï Diuxi maitïkïi go soimaaxi ix makïdï oidaga tami idi oidigi daama. Maitïkïi aatïmï buaboitudaitai sai Suxi ïr go Kristo. Buaboitudaitai aatïmï sai ïgai ïr Diuxi otosadï Tïanïdami tudu. Kaxkïdï mai xijaiga ix ïïgiadagi aatïmï Diuxi dai podukai maitiagi aatïmï go soimaaxi.

⁵ Mosïkaxi aatïmï ix makïdï buaboitudai sai Suxi Kristo ïr Diuxi Maradï, mosïkaxi aatïmï ixtutuidi ix maitiagi go soimaaxi ix makïdï oidaga tami oidigi daama tudu.

^6-8 Daiñi, kïïga maatï aatïmï sai go Suxi Kristo ïr Diuxi Maradï. Ño Diuxi tïbagiañdïrï aidïxi gï bakoi go Suxi daidi ikaiti Diuxi sai go Suxi ïr Maradï tudu. Dai gokiïrï aidïxi ka muki agaitadai Suxi, ami maaxiturhi ïgai saidi ïgai ïr Maradï Diuxi ïpï. Dai ïkobïrakoga Diuxi Ibhïadï gïr aagidi sai Suxi ïr Diuxi Maradï ïpï. Dai ïgai mai yaatagïi tomarhi ïmo imidagai. Baikapadïrï maatï aatïmï saidi Suxi ïr Diuxi Maradï tudu. Ïmoko ïr Diuxi Ibhïadï ix makïdï gïr ïmadï daja dai gïr aagidiña. Dai Diuxi ño tïbagiañdïrï aidïxi gï bakoi go Suxi ïpï. Dai ïpïpï gï maaxitu gobai aidïxi ka muki agaitadai go Suxi kuruxiana. Bïï baikapadïrï maatï aatïmï sai Suxi buaboikïdï ïr Diuxi Maradï tudu.

⁹ Daiñi, xi ïmo odami ïr nïijadamikagi ïmo ixtumaxi buaboitudaiña aatïmï ixtumaxi gïr aagidagi ïgai aagaitai gobai. ¿Dai mai ix bamioma gï agai sai buaboitudada aatïmï Diuxi? Ïgai gïr aagidi sai Suxi ïr Maradï tudu.

¹⁰ Dai bïïxi odami ix makïdï buaboitudai sai go Suxi ïr Diuxi Maradï, ïgai kïïga maatï saidi bïïxi ixtumaxi gïr aagidi Diuxi ïr buaboi aagaitai Suxi ïpï. Dïï gia odami ix makïdï mai buaboitudai yaatabogami aagai Diuxi. Mai buaboitudaitai ïgai ixtumaxi gïr aagidi Diuxi aagaitai Maradï tudu.

¹¹ Diuxi gïr aagidi sai gïr maakai ibhïdagai utudui sai kïïgakïrï óídakana aatïmï bïïxkïrï bïïtarï mos buaboitudakai aatïmï Maradï tudu.

¹² Kaxkïdï gï maatï sai xorai buaboitudagi Diuxi Maradï ka bia go kïïgakïrï oidakaragai bïïxkïrï bïïtarï. Dïï gia odami ix makïdï mai buaboitudai mai bia gobai.

Go Juan ipïrhiditadai ix go buaboitudadami kïïga maatïkagi sai óídaka agai bïïxkïrï bïïtarï

¹³ Daiñi, gïn ojidi aanï aapimï ix makïdï buaboitudai Diuxi Maradï saidi kïïga maatïkana aapimï sai ka bia aatïmï go utudui oidakaragai ix makïdï bïïxkïrï bïïtarï kabakarïi.

¹⁴ Dai xibi kïïga ïïmadai aatïmï Diuxi dai kaxkïdï kïïga maatï aatïmï sai Diuxi gïr kaïkana xïïxkadï daanïdagi aatïmï dai tañiagi aatïmï ixtumaxi. Xïxkadï tanïdagi aatïmï ixtumaxi ix makïdï bhai ïrhidi ïgai tudu.

¹⁵ Dai kïïga gïr mamaakai ïgai ixtumaxi tañiagi aatïmï ïpï. Bïïxi gobai maatï aatïmï biakatai kïïga ïïmadaragai Diuxi ïmadï.

¹⁶ Gin aaduñi Diuxi amadïrï, ix ïmadutai gïn aaduñi soimaaxi ibuadagi dai aapimï nïijadagi, gï agai sai daanturhiada aapimï. Dai Diuxi maakimu oigaragai gobai ix makïdï soimaaxi idui sai apia kia oidakagi ïgai. Ix go soimaaxkami ix makïdï idui ïgai maiti ïr buapadami mukigami tudu. Daiñi, oidaga soimaaxkami ix makïdï gia buapai mukigami dai maiti gï agai ix daanturhiada aapimï xorai ibuadagi gobai.

¹⁷ Dai gï agai sai maatïkagi aapimï sai bïïxkïrï xïïxkadï mai sïïrhi ibuadagi ïmoko gobai ïr soimaaxkami Diuxi bïïtarï dïï gia mai bïïxi aïkatai soimaaxkami buapai mukigami.

¹⁸ Kïïga maatï aatïmï tudu sai aatïmï ix makïdï ïr maamaradï Diuxi mai oidiña go soimaaxkami. Suxi Kristo ix makïdï ïr Diuxi Maradï gïr nukadai kaxkïdï. Dai kaxkïdï go diabora maiti ixtutuidikïi ix gïpiïrï gïr surhigidagi maamaradïkatai aatïmï Diuxi.

¹⁹ Kïïga maatï aatïmï saidi ïr maamaradï aatïmï Diuxi tudu. Dai maatï aatïmï ïpï sai go diabora tïanïi bïïxi go gaa oidigi daama óídakami ix makïdï mai buaboitudai Suxi Kristo.

²⁰ Daiñi, kïïga maatï aatïmï sai dibia Diuxi Maradï tami oidigi daama dai gïr tïtïïgidi xorai buaboikïdï ïr Diuxi. Suxi Kristo ïgai dai gïr tïtïïgidi tudu. Dai xibi ka urabakatai aatïmï Suxi Kristo ka uraba bii aatïmï Diuxi ïpï. Suxi Kristo ïr Diuxi kaxkïdï. Buaboikïdï ïr Diuxi ïgai dai mai tipu ïmai. Mai tipu ïmai xorai gamaakadagi go utudui oidakaragai bïïxkïrï bïïtarï tudu. Mosïkaxi Suxi gïr maakai gobai.

²¹ Gin aaduñi, kïïga gïn oigïdai aanï dai kaxkïdï gïn aagidimi aanï sai mai buaboitudada dai mai oijada aapimï tomarhi ïmo ïma maaxi ixtumaxi. Mosïkaxi Suxi Kristo abïr oijada dai buaboituda tudu. Ïgai buaboikïdï ïr Diuxi kaxkïdï. Mosïkaxi.