1 Juan 3 - Northern Tepehuan Bible

¹ Gin aaduñi, gïn tïgitobïrai xïïxi kïïga gïr oigïdai Diuxi. Ka maamaradï gïr aagai ïgai di. Dai kïïga ïr buaboi saidi ïr maamaradï aatïmï. Dïï gia go óídakami ix makïdï mai buaboitudai mai maatï sai aatïmï ïr maamaradï Diuxi. Mai maatï ïgai Diuxi tudu, kaxkïdï ¿dukatai maatïkana ïgai xorai ïr maamaradï?

² Gin aaduñi, kaxi ïr maamaradï aatïmï Diuxi xibi. Dïï gia maiti gïr tïtïïgidi Diuxi kia ix maaxka ragai aatïmï xïïxkadï dibiagi Suxi Kristo. Dïï gia kïïga maatï aatïmï sai xïïxkadï dibiagi Suxi Kristo kïïga nïijadamu aatïmï dai maatïkamu ix maaxi ïgai. Dai mos nïiditai aatïmï ix maaxi ïgai aidï gia ka ïpïan mamaaxkamu aatïmï ïgai.

³ Dai kaxkïdï xibi bïïxkatai aatïmï ix makïdï kabakan dukai buaboitudai sai ïpïan mamaaxka ïragai Suxi Kristo xïïxkadï dibiagi ïgai, aatïmï ka maigobai dadasaimi bïïxi go soimaaxkami ix makïdï ibuadana aatïmï. Buañixikan dukai óídaka rïrhidi aatïmï ïpïan dukai Suxi Kristo kaxkïdï.

⁴ Daiñi, odami ix makïdï oijadagi go soimaaxkami ïgai ïr buidïrï bïïtïkami Diuxi. Xïxkadï soimaaxi ibuadagi ïmoko gobai itïiya ïrhidi sai mai ïïgidi ïgai Diuxi sïïrhikamigadï tudu.

⁵ Dai kïïga maatï aapimï sai Suxi Kristo mai soimaaxi ibuayi tomarhi ïmo imidagai. Dai bhaiyoma dibia ïgai tami oidigi daama buanada agaitai gïr soimaaxkamiga.

⁶ Kaxkïdï gï maatï sai odami ix makïdï oijadagi go soimaaxkami mai kïïga maatï Suxi Kristo dai mai urabaka ïgai. Odami ix makïdï urabaka Suxi Kristo mai oidiña go soimaaxkami tudu.

⁷ Gin aaduñi, oidaga odami ix makïdï gïn aagida antaada naana maaxi ix makïdï mai ïpïan kaiti idi ñoki ix makïdï gïn aagidimi aanï xibi. Kaxkïdï gï agai sai kïïga gïn tïtïgitokagi aapimï sai podukai maiti gïn bupuirumadagi ïgai. Daiñi, odami ix makïdï kïïga oijadagi ixtumaxi ïr sïïrhi kïïga buañixikana ïpïan dukai Suxi Kristo mai biakatai soimaaxkami abhana.

⁸ Dïï gia odami ix makïdï oijadagi go soimaaxkami gobai itïiya ïrhidi sai urabaka ïgai go diabora. Go diabora apia soimaaxi ibuadana aidï abhiadïrï xi kïkiba oidigi tudu. Apia kia soimaaxi ibuayi xibi ïpï. Dïï gia Diuxi Maradï dibia tami oidigi daama dai xia dodai ïgai aaduindadï go diabora. Gobai bïïtarï dibia ïgai tudu.

⁹ Kïïga gï maatï odami ix makïdï ïr maamaradï Diuxi. Mai oidiña go soimaaxkami tudu. Bia ïgai Diuxi tïgibudadï kaxkïdï ka ibhïgadïrï dakatai Diuxi. Mai bhaiga ïgai xi apia oijadagi go soimaaxkami maamaradïkatai ïgai Diuxi tudu.

¹⁰ Podukai gï maatï xorai ïr maamaradï Diuxi dai xorai ïr maamaradï go diabora. Odami ix makïdï mai oijadagi ixtumaxi ïr sïïrhi dai mai oigïadagi aaduñdï ïgai mai urabaka Diuxi tudu.

Go Juan aagidi go buaboitudadami sai gïn oigïdada ïgai aipakoga

¹¹ Gin aaduñi, dudatai kaïkana aapimï go aatagi xako ikaiti saidi gï agai saidi kïïga gïn ojoigïada aapimï aipakoga. Kaïkana aapimï gobai aidïxi abhiadïrï utudami kaïkatadai aapimï go bhai ïrhiaragai aatagi tudu.

¹² Daiñi, maiti gï agai xi ïpïan buadagi aapimï go Kain ix makïdï urabakatadai go diabora dai ïïgi mua sukurhidï. Oiditadai ïgai go soimaaxkami tudu dai sukurhidï oiditadai ixtumaxi ïr sïïrhi dai kaxkïdï kïïdaitadai ïgai sukurhidï dai mua.

¹³ Gin aaduñi, kïïga gï maatï saidi go odami ix makïdï mai buaboitudai gïr kïïdada agai podukai ïpï. Dai mai bia aapimï xi gïn tïkakadagi ix tuixidï gïn kïïdai ïgai. Ïpïan buayi ïgai go Kain kaxkïdï.

¹⁴ Daiñi, kïïga maatï aatïmï sai ka mai koidadï gïr duu gïr iibhïdaga xibi. Kïïga maatiga maaxi gobai, gïr oigïdai aatïmï aipakoga kaxkïdï. Gobai ïr ïmo maaxidaragai ix ka duduakatu gïr ibhïdaga tudu. Dïï gia odami ix makïdï mai oigïdadagi jaa ïgai gia apia kia ïr koidadï dukai iibhïadï.

¹⁵ Daiñi, Diuxi ïmo gamuakami dukai nïidi toma xorai ix makïdï kïïdadagi aaduñdï tudu. Dai ïmo gamuakami xadïrï urabakana go oidakaragai bïïxkïrï bïïtarï ix makïdï gïr maakai Diuxi. Gobai maatiga maaxi.

¹⁶ Daiñi, Suxi Kristo ïïgi gï tïïgi saidi gï muatudana gïr bïïtarï dai pobuadatai gïr tïtïïgidi ïgai ixdukatai kïïgakïrï oigïada aatïmï jaa. Dai gokïdï gï maatï sai gï agai aatïmï xi gamaakadagi tomax tumaxi dai asta ïïgi gïr ibhïdaga soiña rïrhiditai gïr aaduñi.

¹⁷ Dukami, xi kïïga biakagi ïmoko ixtukïdï oidakagi dai nïidagi ïmai ix makïdï mai biakagi, gï agai xi soi gïldagi ïgai bïïtarï dai soiñagi. Ix pokaitadagi ïmoko sai oigïdai jaa ïpïan ïxi ix xïïxi Diuxi oigïdai dïï gia ix mai soiñagi ïgai go jaa aidï gia maiti ïr buaboi sai oigïdai ïgai ix dukai Diuxi oigïdai.

¹⁸ Gin aaduñi, maiti gï agai sai mosïkaxi pokaitadagi aatïmï sai oigïdai aatïmï jaa. Gï agai bhaiyoma sai ibuada aatïmï ixtumaxi ïr soiñikagi jaa bïïtarï dai podukai mamaaxdagi sai buaboikïdï oigïdai aatïmï.

¹⁹ Ix pobuadagi aatïmï aidï gia maatïkamu aatïmï saidi ïr oijadami aatïmï ixtumaxi ïr buaboi dai iibhïxtakan taadakamu gïr ibhïdaga kïïga maatïkatai sai mai tipu soimaaxkami gïr abhana Diuxi bïïtarï.

²⁰ Daiñi, tomaxi soimaaxi ibuadami taadakagi aatïmï gïr ibhïdagïrï gïpiïrï gïr bupadan buadatai ïïgi gïr tïgibudaga, bïïxkïrï Diuxi bamioma gubuka xi bhai gïr ibhïdaga dai gïr tïgibudaga. Dai ïgai gia buañixikami gïr bia. Kaxkïdï bhaiga aatïmï xi ibhïxtakan taadakagi. Ïgai bïïxi maatï tudu dai bamioma kïïga maatï xi aatïmï.

²¹ Pomaaxi gin aaduñi, kïïga maatï aatïmï sai mai tipu soimaaxi gïr abhana dai kaxkïdï kïïga bia aatïmï ïïmadadaragai dai urabaragai Diuxi ïmadï.

²² Dai kaxkïdï xïïxkadï daanïdagi aatïmï kïïga maatïkana aatïmï sai gïr maaki agai ixtumaxi tañiagi aatïmï. Kïïga ïïgidi aatïmï dai kïïga ibuayi aatïmï ixtumaxi bhai ïrhidi ïgai kaxkïdï.

²³ Diuxi gïr tïjai sai buaboitudaiña aatïmï Maradï, sai buaboitudana aatïmï Suxi Kristo tudu. Dai gïr tïjai sai gïr oigïadagi aatïmï aipakoga ïpï. Gobai ïr go sïïrhikami ix makïdï gïr maa Diuxi tudu.

²⁴ Dai toma xorai ix makïdï ïïgiadagi Diuxi sïïrhikamigadï ïgai kïïga biakana urabaragai Diuxi ïmadï. Diuxi gïr maa Ibhïadï saidi gïr ïmadï dakana tudu. Dai ka biakatai aatïmï Diuxi Ibhïadï gokïdï maatï aatïmï saidi ka kïïgakïrï uraba bii aatïmï Diuxi bïïxkïrï bïïtarï.