1Tesalonicenses 4 - Northern Tepehuan Bible

Pabora aagidi go buaboitudadami ixdukatai bhai ïrhidi Diuxi sai óídakagi ïgai

^1-2 Gïr susukurhi, gïn aagida ïragai ïpï ïmo ñoki ix dukatai gï agai ix oidakagi buaboitudadami. Kaxi gïn aagidi aatïmï tudu ixdukatai ipïrhidi Diuxi ix óídakagi aapimï. Dai kïï maatï aapimï sai Suxi Kristo gïr maa ïmo sïïrhikami ix kaxkïdï sïïrhikïdï gïn abïnakida rïrhidi sai kïïga óídakagi aapimï ixdukatai Diuxi ipïrhidi. Dai ka podukai óídaga aapimï dïï bïïxkïrï gïn abïnakidimi aatïmï sai apia kïïgioma óídakagi aapimï ix dukatai ipïrhidi Diuxi.

³ Ipïrhidi Diuxi sai mosïkaxi ïgai bïïtarï óídakana aapimï ïko darakatai soimaaxkamiañdïrï. Maiti ipïrhidi ïgai sai abhana bopodagi aapimï jaa ix makïdï maiti ïr sïïrhi tudu.

⁴ Dai bhaiyoma ipïrhidi sai maatïkagi aapimï ixdukatai tïanïdagi gïn tukuga sai mai ïïgiada aapimï xïïxkadï gïn bapainxadagi gobai soimaaxkami amakoga. Ipïrhidi ïgai sai xadutuada aapimï ïïgi gïn tukuga tudu sai Diuxi bïïtarïkana gobai dai sai podukai gïn tukugakïdï xadutuada aapimï jaa ïpï.

⁵ Maiti gï agai tudu ix ïïgiada aapimï gïn tukuga xïïxkadï gïn tanïda gobai sai soimaaxi ibuada aapimï. Daiñi, go gaa ix makïdï mai buaboitudai Diuxi adaimïiña ixtumaxi ipïrhidi ïïgi tukugadï dai aapimï maiti gï agai ix pobuadagi.

⁶ Maiti gï agai tudu xi bopodagi aapimï jaa ïmadï aipakoga ïïgiditai tukugadï ix dukai ibuayi go ix makïdï maiti ïr buaboitudadami. Ix pobuadagi aapimï mai xadutuada antaada aapimï ïmai buaboitudadami. Dai maiti gï agai gobai. Kaxi gïn aagidi aatïmï tudu sai Diuxi maakimu gïgïbidaragai ix makïkïdï soimaaxi ibuadagi podukai dai podukai gï sïïrhiñdamu Diuxi ïgai ïmadï.

⁷ Diuxi gïr báí mai xu sai soimaaxi ibuadagi aatïmï tudu dai bhaiyoma gïr báí sai ïgai bïïtarïkana aatïmï.

⁸ Daiñi, mai xu xi ïr ïïgi gïr tïgibudaga idi ñoki sai mosïkaxi Diuxi bïïtarï óídakana aatïmï ïkobai darakatai soimaaxkamiañdïrï. Dai bhaiyoma Diuxi ïgai dai gïr maa Diuxi Ibhïgadï ix makïdï kïï buañixi dai gïr tïanïi sai buañixikami duakai óídakana aatïmï. Kaxkïdï ix oidakagi xorai mai ïïgiada ïrhiada idi ñoki, ïgai mai xu ix mosïkaxi aatïmï maiti gïr ïïgidi. Dai bhaiyoma mai ïïgidi ïgai Diuxi Ibhïadï. Kaxkïdï tudu Diuxi Ibhïadïañdïrï dibia idi ñoki.

⁹ Daiñi, Diuxi kaxi gïn maatïturhi ix dukatai oigïdadagi aapimï go gaa tudu. Dai kaxkïdï gokïdï bhaitoma maiti gï agai ix gïn maakiagi aatïmï ñoki.

¹⁰ Ka kïïga oigïdai aapimï go gaa buaboitudadami ami Masedoniana óídakami tudu. Dïï bïïxkïrï gïn abïnakida rïrhidi aatïmï sai apia bamioma kïïga gïn oigïdadagi aapimï aipakoga.

¹¹ Gïn abïnakida rïrhidi aatïmï sai gaagagi aapimï ix dukatai kïï bhai maaxkami dukai óídakagi dai maiti gï agai xi gïn bapasadagi xako maiti gïn ajïakagi. Daidi buadabïrai ïïgi gïn aaduindaga tudu sai podukai biakana aapimï ix dukatai óídakagi. ¿Mai ix podukai gïn mamaakaiña aatïmï ñoki baasïkioñdïrï abhiadïrï?

¹² Podukai tudu jaa ix makïdï mai buaboitudai gïn tïgito nïijadamu kïï bhai maaxkami dukai óídakatai aapimï. Dai podukai ïpï maiti gï aagadamu ix gïn maakiagi ïgai soiñi. Maiti gïn biïgakamu soiñi tudu Ïïgi gamaitïmu aapimï ïïgi aatabuadatai bhaiyoma.

Pabora aagai duduakaradï odami ix makïdï uraba daraka Suxi Kristo

¹³ Gïr susukurhi, ipïrhidi aatïmï ix kïïga maatïkagi aapimï ixdukatai daibuña agai ix makïdï koiyagi uraba darakatai Suxi Kristo. Bia ïgai ïmo kïïgadukami nïnïraragai tudu. Dai ix kïïga maatïkagi aapimï ix tuma nïnïraka gïn aaduñi uraba darakatai ïgai Suxi Kristo aidï gia ka mai kabami soi gïn ïldamu aapimï xïïxkadï mukiagi ïmadutai ïgai. Ka mai ïpïan dukai soi gïn ïldamu aapimï go odami ix makïdï mai buaboitudai tudu. Mai bia ïgai ïmo kïïgadukami nïnïraragai ix dukai bia aatïmï kaxkïdï sïïrhikïdï soi gïn ïjïrhidiña ïgai.

¹⁴ Dïï gia aatïmï gia kïïga buaboitudai sai Suxi Kristo muu dai ïpamu duaka. Dai kaxkïdï buaboitudai aatïmï ïpï sai Diuxi duduakatuldamu ix makïdï uraba daraka Suxi Kristo. Dai buaboitudai aatïmï ïpï sai ix makïdï duakatu Diuxi oidamu Suxi Kristo xïïxkadï dibiagi ïgai ïpamu.

¹⁵ Idi ñoki ix makïdï gïn aagidamu aatïmï xibi ïr ïmo ñoki ix makïdï gïr maatïturhi Suxi Kristo. Daiñi, gïr maatïturhi ïgai sai xïïxkadï dibiagi ïgai ïpamu sai aatïmï ix makïdï buaboitudai dai kia duduakagi modukai duduakakami taiyako iimimu dai buidïrï ayimu. Dai mai xu ix bhaitï iimimu aatïmï go ix makïdï ka koi ïpï. Ïmapi iimimu aatïmï.

¹⁶ Aidï gïïgïr iñakidamu Suxi Kristo tïbanïkai tïbagiañdïrï tudu. Dai aidï gï kaidatudamu ïpï Diuxi tïtïañikarudï bhaitï kïakamigadï. Dai ganïjida agai ïgai Diuxi trompetagadïkïdï ïpï. Daidi duakatuldamu Diuxi go buaboitudadami ix makïdï ka koi.

¹⁷ Dai bhodïrï aatïmï ix makïdï kia duduakakagi taiyakoga iimimu ïgai ïmadï dai mïï buidïrï ayimu aatïmï Suxi Kristo ïbïltapi dai aidï gia ka ïmadï darakamu aatïmï bïïxkïrï bïïtarï.

¹⁸ Gï agai tudu xi gïn abïnakidada aapimï aipakoga aagaitai idi aatagi.