1Tesalonicenses 3 - Northern Tepehuan Bible

Pabora otoi go Timoteo sai abïnakidiña ïgai go buaboitudadami Tesalonikïrï óídakami

^1-2 Gïr susukurhi, sïïrhikïdï gïn tïgitokana aatïmï mai maatïkatai ix maaxi daraka aapimï. Kabami bïïtïkana tudu gïr bïïtarï gïn tïgitokatai. Dai aidïxi kaxi gïr maitïdan taadaga soi gïr ïrhiditai, aidï aanï ïmadï go Silbano podukai gïr tïgito ix gamo otosagi go Timoteo sai gïn nïidana. Dai aatïmï tanaxi bii kia Atenasïrï. Go Timoteo ïr ïmo aatabuadami Diuxiañdïrï ïpï dai gïr ïmadï gaatabuayi aagaitai go bhai ïrhiaragai aatagi ïpï. Kaxkïdï gïn otoxi aatïmï ïgai saidi gupurtudana ïgai gïn buaboidaraga dai sai gïn abïnakidiña.

³ Kïï maatï aatïmï sai soi gïn buididiña jaa tudu. Dai maiti ipïrhidi aatïmï ix gokïdï ipïrhiadagi tomarhi ïmadutai aapimï ix dagitoagi gïn buaboidaraga. Kaxkïdï gïn otoxi aatïmï go Timoteo. Kïï maatï aapimï tudu sai podukai dáí Diuxi sai soimaaxi taatagi aatïmï soi gïr buididitai jaa.

⁴ Baasïkioñdïrï ka podukai gïn aagidiña aatïmï tudu. Dai xibi ka maatï aapimï saidi ïr buaboi ix makïdï gïn aagidi aatïmï. Ka soi gïn buididimi jaa tudu ix dukai gïn aagidi aatïmï.

⁵ Dai pobai gin ïrhidiña aanï sai maiti gï agai xi gokïdï gïpiïrï gïn surhigidagi go Diabora gïn aagiditai ix dagitoagi aapimï gïn buaboidaraga. Daiñi,ix dagitomudai aapimï gïn buaboidaragai aidï gia mos ïr ïïgikïdïkamudai gïr aaduindaga ix makïdï idui aatïmï gïn aagiditai go bhai ïrhiaragai aatagi. Gobai gin tïgitokatadai aanï tudu. Dai ka maiti ixtui aanï ix bamioma nïnïrakagi dai kaxkïdï otoi aanï go Timoteo sai nïidana sa maaxi daraka aapimï gïn buaboidaragakïdï.

Go buaboitudadami Tesalonikïrï óídakami kïïga abïnakidi go Pabora ïmadï go Silbano

⁶ Dïï gia ka dibia go Timoteo amïkadïrï ïpamu dai gïr aagidi sai apia ïxi kïïga buaboitudai aapimï go Suxi dai sai oigïdai aapimï jaa aipakoga ïpï. Dai pobai gïr tïtïdai ïpï mïsai gïr tïïtïitoiña aapimï gïr oigïdaitai dai sai ix xïïxi gïn nïijada ïrhidi aatïmï sai pokaxi aapimï gïr nïijada ïrhidi ïpï. Podukai gïr tïtïdai Timoteo dibiakai tudu.

⁷ Dai kaxkïdï tomaxi kabami soi taadakana aatïmï soi gïr buididitai jaa bïïxkïrï bhai gïr ïrhidiña aatïmï maatïkatai sai apia kabakan dukai gïïrhimi gïn buaboidaraga.

⁸ Bamioma kïïga abïnakiadan taadatu aatïmï tudu maatïkatai sai apia gupukami dukai buaboitudai aapimï Suxi Kristo.

⁹ Mai tïtïgai aatïmï ixdukatai aagidagi Diuxi xïï bhai gïr ïrhidi aapimïkïdï tudu xïïxkadï aatagiadagi aatïmï ïgai ïmadï.

¹⁰ Dai dudatai daanïiña aatïmï Diuxi bïïxi gïr gubukarhigakïdï sai gïr maakana ix dukatai gïn dibidagi. Kaxkïdï tudu dasa rïrhidi ixtumaxi biïga kia saidi apia bamioma kabakana gïn buaboidaraga.

¹¹ Daanïiña aatïmï Diuxi ïmadï Suxi Kristo sai gïr maakana ïgai ixdukatai gïn dibidagi otoma.

¹² Daanïiña aatïmï ïpï sai gïn soiñana Suxi Kristo sai apia kïïgioma gïn oigïdada aapimï aipakoga dai sai kïïgioma oigïdada aapimï jaa ïpï. Sai ix xïïxi gïn oigïdai aatïmï sai pokaxi oigïdada aapimï jaa.

¹³ Aidï gia Suxi Kristo gïn maakimu gubukarhigai gïn ibhïdagïrï. Dai podukai gokiïrï xïxkadï dibiagi Suxi Kristo ïmadï bïïxkatai ix makïdï urabaka ïgai kïïga mai duadimukatai gukakamu aapimï ïgai buitapi dai Diuxi gïr Oga buitapi ïpï. Mai tipukamu tudu ixtukïdï gïpiïrï gïn bupadagi ixtumaxi aidï. Mosïkaxi Diuxi bïïtarï óídakamu aapimï tudu kïïga oigïdaitai aapimï jaa.