1Tesalonicenses 2 - Northern Tepehuan Bible

Pabora aagai ix dukatai aatadui ïgai aidïxi ïmadï dakatadai go Tesalonikana óídakami

¹ Gïr susukurhi, kïï maatï aapimï xïï kïïga jii gïr aaduindaga baasïkioma gïn dibidakai aatïmï.

² Daiñi, kïï maatï aapimï sai mai kia aïkai aatïmï ami xako daraka aapimï sai kabami soi gïr buididi jaa Filipoana aagaitai aatïmï go bhai ïrhiaragai aatagi. Podukai daibusai Filipoana tudu. Dai ami xako daraka aapimï muidukana gïr buidïrï bïïtïkami ïpï. Dïï bïïxkïrï mai duadimudakïdï aagaiña aatïmï go bhai ïrhiaragai aatagi ami gïr soikïitai Diuxi. Kaxkïdï kïï jii gïr aaduindaga.

³ Dai go ix makïdï gïn aiturhi aatïmï gïr aatagi gobai kïïga ïr buaboi. Maiti gïn buirumagi aatïmï tudu dai bhaiyoma kïï sïïrhi gïn aagidi dai gïn tanïiña mïsai buaboitudaiña gïr aatagi. Dai tomarhi mai gaagaitadai aatïmï ixtumaxi ïïgi gïr bïïtarï gïn aagiditai gobai.

⁴ Bhaiyoma Diuxi kïïga maatï ixdukatai aatabuayi aatïmï dai bhai aa tïxi aipakoga aituldana odami go bhai ïrhiaragai aatagi. Diuxi bïïxi maatï asta ixtuma tïtïitoi aatïmï tudu dai kaxkïdï ñokai aatïmï ixdukatai Diuxi ipïrhidi dai mai xu ixdukatai odami ipïrhidi.

^5-6 Kïï sïïrhi gïn aatagidi aatïmï tudu dai mai xu ix mos xigian dukai gïn aatagidi ipïrhiditai ix gïr maakiagi aapimï tuminxi. Maiti gïn aatagidi aatïmï mosïkaxi ix dukatai bhai ïrhiadagi aapimï tudu. Dai tomaxi mai kïïgakïrï gïr nïijadagi aapimï xiïpï jaa kaïkatai gïr aatagi bïïxkïrï sïïrhi ñokaiña aatïmï. Daiñi, aatïmï ïr ojotosadï Suxi Kristo dai kïïga bia aatïmï oigaragai ix kabami gïn tïanïdagi.

⁷ Dïï mai pobuadana aatïmï dai bhaiyoma kïï tuigakana aatïmï gïn bïïtarï. Kïïga gïn nukagi aatïmï tudu ïpïandukai ïmo oki ixdukai xiituldada maamaradï.

⁸ Kïïga gïn oigïdai aatïmï tudu ix kaxkïdï gïn aagidi aatïmï go bhai ïrhiaragai aatagi. Dai kaxkïdï ïpï bhai ïrhiarakïdï dadasaiña aatïmï bïïxi gïr gubukarhiga gïn soiña ïrhiditai.

⁹ Kïïga gïn tïgito aapimï ïrhi aanï xïï kabami aatadui aatïmï gïn ïmadï darakatai. Ga aatabuadana aatïmï tasïrï dai modukai tukarï sai biakana aatïmï ixtukïdï óídakagi dai mai xu ix aapimïañdïrï bui ixtumaxi gïn aagiditai go aatagi. Maiti ipïrhiditadai aatïmï ix soi gïn buadagi aapimï gïr maakaitai soiñi kaxkïdï.

¹⁰ Aapimï ïr nïijadami sai óídakatadai aatïmï Diuxi bïïtarï kïï buañixikan dukai dai Diuxi ïr nïijadami ïpï. Kaxkïdï mai tipu ixtukïdï gïpiïrï gïr bupadagi go gaa.

^11-12 Dai kïï maatï aapimï sai gïn oigïdaiña aatïmï gïr maamara dukai. Gïn ojoga dukai aatïmï tudu dai gïn abïnakidiña aatïmï dai gïn mamaakaiña ñoki ix dukatai gï agai ix óídakagi aapimï Diuxi maamaradïkatai. Kaxkïdï tudu Diuxi ïgai dai gïn báí saidi urabakana aapimï go ix makïdï Diuxi tïanïi sai podukai nïijadana aapimï xïï xigian dukai tïanïi Diuxi.

¹³ Gïr susukurhi, dudatai aagidiña aatïmï Diuxi ix bhai gïr ïrhidi maatïkatai sai kïïga buaboitudai aapimï gïr aatagi. Mai xu ix mosïkaxi odami aatagidï dukai kaï aapimï gïr aatagi tudu. Diuxi ñokidï dukai kaï aapimï bhaiyoma dai podukai aba ïgai. Dai Diuxi ñokidï kïïga gïn soikïi gïn ibhïdagïrï buaboitudaitai aapimï gobai.

¹⁴ Gïr susukurhi, kïï maatï aatïmï sai gïn aaduñi soimaaxi gïn taatamiturhiña. Kaxkïdï kïïga maatiga maaxi sai buaboitudai aapimï Diuxi ñokidï. Ix mai buaboitudamudai aapimï xadïrï pomaaxi gïn taatatuldana ïgai di. Ïïpïandukai dïgabusai aapimï ïmadï go gaa buaboitudadami ix makïdï gïn ïmpaidiña Judeïrï. Ix makïdï uraba daraka Diuxi dai Suxi Kristo tudu. Go judidiu soimaaxi taataturhi ïgai tomaxi ïr aaduñdï ïgai. Dai podukai aapimï ïpï bia gïn aaduñi ix makïdï soimaaxi gïn taataturhi buaboidaitai aapimï.

¹⁵ Mui judidiu maiti ïr buaboitudadami tudu dai ïgai ïr duñidï xi gï muatu Suxi Kristo dai ïkioma kodaiña ïgai go aagadami Diuxiañdïrï ñoki ïpï. Dai xibi aatïmï gïr bui surhigïi ïgai soi gïr buididitai. Buidïrï bïïtïkami ïgai Diuxi tudu dai asta buidïrï bïïtïkami ïgai bïïxi óídakami ïpï pobuadatai.

¹⁶ Dai kaxkïdï gïr sobhida ïrhidiña ïgai ix mai aituldada aatïmï go bhai ïrhiaragai aatagi go odami ix makïdï maiti ïr judidiu. Maiti ipïrhidi ix kïïgakïrï bubuakiagi ïgai kaxkïdï. Sobhikïiña ïgai jaa ix mai buaboitudagi tudu. Podukai adaimïiña ïgai go soimaaxkami tudu. Dïï gia Diuxi ka mai dagitomu ix apia sobhidagi ïgai jaa ix buaboitudagi. Xibi ka ayi ïmo gïdukami gïgïbidaragai Diuxiañdïrï go sobhidakami bïïtarï tudu.

Pabora dibida ïrhidi go Tesalonikïrï óídakami buaboitudadami ïpamu

¹⁷ Gïr suskurhi, baasïki aidïxi gïn ïmadï darakatadai aatïmï go judidiu mai ojoida kaï gïr aatagi dai gïr koda ïrhiditadai. Kaxkïdï biakatadai aatïmï ix otoma iimiagi dai gïn dagitoagi. Dai kabami soigamu aatïmï aidï ïpïan dukai xi ka mai nïijada agadagi ïmoko maamaradï. Bïïx tasai gïn tïgitokana aatïmï tudu. Dïï mai xii tïbïpi ïkobai darakamu aatïmï ïrhi aanï.

¹⁸ Bïïxi gïr gubukarhigakïdï gïn tïgitokana aatïmï tudu. Dai aanï Pabora muiyoko imia iñagaiña gamoko xako daraka aapimï dïï maiti gïr dagito go Diabora ix iimiagi aatïmï.

¹⁹ Xïïxkadï buitapi gukakagi aatïmï Suxi Kristo dibiakai ïgai ïpamu bhai gïr ïrhiadamu gïr ïmadï darakatai aapimï ïmadï jaa ïpï ix makïdï buaboitu gïr aatagi. Aidï aapimï ami gukakamu Suxi Kristo buitapi ïpï dai gobai ïr ïmo gïdukami maitïki dukaikamu gïr bïïtarï. Kaxkïdï bhai gïr ïrhidi aatïmï aapimïkïdï dai gïn nïida rïrhidi xibi.

²⁰ Aipakoga aagaiña aatïmï tudu xïï kïïga idui gïr aaduindaga amïka gïr urabakatai aapimï. Gïr bhai ïrhiaraga aapimï kaxkïdï.