1Tesalonicenses 1 - Northern Tepehuan Bible

Pabora otoxdi ïmo biatuldaragai go buaboitudadami ix makïdï gïn ïmpaidiña Tesalonikïrï

¹ Bhaiga aapimï buaboitudadami ix makïdï gïn ïmpaidiña ami Tesalonikïrï. Aanï Pabora ïmadï go Silbano dai go Timoteo gïn otoxdi idi ojai. Gin susukurhi, kïïga maatï aatïmï sai aapimï buaboitudadami uraba daraka Diuxi gïr Oga ïmadï Suxi Kristo Gïr Nukadakami. Dai ipïrhidi aatïmï sai maatï taatana aapimï xïï kïï tuiga ïgai gïn buidïrï dai sai gïn maakana ïgai ibhïxtaragai gïn ibhïdagïrï.

^2-3 Gïr susukurhi, dudatai gïn daanturhiña aatïmï dai aagidiña aatïmï Diuxi gïr Oga xïï bhai gïr ïrhidi aatïmï aapimïkïdï. Dai bïïxkïrï gïn tïgito ajiopaiña aatïmï gïr tïgitokatai xïï kabami aatabuayi aapimï soikïitai jaa. Kïïga oigïdai aapimï jaa tudu. Dai kïïga buaboidaitai nïnïraka aapimï xi dibiagi Suxi Kristo ïpamu. Kaxkïdï maiti gïn daadagitoi aapimï ïpï ix gïn maitiagi go soi ïrhiaragai tomaxi soi gïn buidadagi jaa.

⁴ Kïïga maatï aatïmï sai gïn oigïdai Diuxi dai kaxkïdï ïkobai gïn bubaitu ïgai saidi ïr maamaradïkana aapimï.

⁵ Kïïga maatiga maaxi tudu sai Diuxi ïgai dai gïn soi sai buaboitudaiña aapimï. Kaxkïdï tudu aidïxi gïn aagidi aatïmï go bhai ïrhiaragai aatagi Diuxi Ibhïadï kïï gubukan dukai aatadui aapimïrï saidi kïïga maatïkana aapimï ix ïr buaboi gïr aatagi. Mai ïïgi gïr gubukarhigakïdï gïn aatagidi aatïmï tudu. Dai gokïdï gï maatï kïïga sai gïn oigïdai Diuxi dai sai ïkobai gïn bubaitu ïgai. Ïma dukai xadïrï gïn soiñamudai Diuxi Ibhïadï sai buaboitudaiña aapimï. Dai kïïga nïidi aapimï ix dukatai óídakatadai aatïmï amïï gïn dibidakai dai podukai máí aapimï saidi maiti ïr yaatagi gïr aatagi.

⁶ Dai aapimï sïïrhikïdï kïïga ibuayi ïpï. Ibuayi aapimï ïpïandukai aatïmï ïmadï Gïr Nukadakami tudu. Daiñi, kajioma aatïmï sai jaa maiti ipïrhidi ix buaboitudada aapimï dai bhaiyoma soi gïn buididiña buaboitudakai aapimï. Dïï gia kajioma aatïmï ïpï sai tomax dukai maiti gïn daadagitoiña aapimï ix gïn maitiagi go soi ïrhiaragai xïxkadï soi gïn buididiña jaa. Saidi as gïn soikïiña Diuxi Ibhïadï sai bhai gïn ïrhidiña aapimï bhaiyoma. Podukai tudu ibuayi aapimï ix dukai ibuayi aatïmï ïmadï Gïr Nukadakami Aatïmï ïpï maiti gïr daadagitoiña ix gïr maitagi go soi ïrhiaragai tomaxi soi gïr buidadagi jaa.

⁷ Dai xibi bïïxi go buaboitudadami Masedoniïrï dai Akayïrï óídakami kïïga tïgito nïidiña ix dukatai óídaga aapimï. Dai podukai mamaatïrïi ïgai ix dukatai óídakagi ïgai ïpï nïiditai xïï bhai gïn ïrhidi aapimï buaboidaitai aapimï Diuxi.

⁸ Aagidiña aapimï mui odami Gïr Nukadakami aatagidï tudu. Dai ïgai aagidiña jaa maigobioma. Xibi bïïxi aipakoga Masedoniana dai Akayana óídakami kajioma xïï kïïga buaboitudai aapimï. Dai xïïxkadï dibidagi aatïmï odami maigobioma óídakami kaxi maatïkana ïgai ïpï xïï kïïga buaboitudai aapimï. Ka mai bia aatïmï ix aagidagi tudu

⁹ dai bhaiyoma ïïgi gïr aagidiña ïgai xïï kïïga buaboitudai aapimï. Kajioma go gaa óídakami xïï kïïga gïr miadïgidi aapimï tudu gïn dibidakai aatïmï. Dai gïr aagidiña go gaa óídakami sai ka mai buaboitudai aapimï go uubixi ix makïdï mai duduaka dai sai xibi ka buaboitudai aapimï Diuxi ix makïdï gia ïr duakakami dai ïr buaboi.

¹⁰ Gïr aagidiña ïgai ïpï sai nïnïraka aapimï ix dibiagi Diuxi Maradï tïbagiañdïrï ïpamu. Kïïga buaboitudai aapimï tudu sai muu Suxi Kristo dai sai Diuxi duakaturhi ïpamu. Buaboitudai aapimï sai Suxi Kristo kïïgakïrï gïr bubaida agai sai maiti gïr aïna go gïgïbidaragai ix makïdï maaki agai Diuxi bïïxi go gaa oidigi daama óídakami.