1Sa 16 - Northern Tepehuan Bible

¹ Dai Gïr Nukadakami aataga ïmadï Samuel daidi itïtïdai, —Maiti agai pïxi soi gï ïrhiadagi tïtïitoitai go Saul. Aanï ka maiti ipïrhidi xi ïr Reykagi ïgai Israelïrï. Sudadañi asaiti xadutudikami kañiru agadïrï ix makïdï gï toidi kïïrhi modïrï xudu Rey gï daasa agadagi ïgai. Bhodïrï mïïka dibida go Isaí Belenïrï. Ipïrhidi aanï xi ïmo maradï ïgai ïr Reykagi xibi— itïtïdai Gïr Nukadakami.

² —Ïbhïidi aanï xi kajiagi go Saul xi daasa iñagai ïmai Rey. Gin mua antaada ïgai— itïtïdai Samuel. —Cho— itïtïdai Gïr Nukadakami —Saadakañi ïmo arhi baakaxi dai pobai tïda aapi xi gin daaxida agai dai xi pomaaxi bïïtarï imïi aapi.

³ Baidakañi aapi go Isaí bai gï urabana daaxidaradïrï. Aanï gï aagidamu pïxi dukatai iduñagi dai xorai toidagi aapi go asaiti— itïtïdai Gïr Nukadakami Samuel.

⁴ Daidi go Samuel idui xi dukatai agaitadai Gïr Nukadakami dai jii Belenamu. Aidïxi ka aijimi ïgai Belenïrï go bhaitï gukakamigadï go óídakami duduadimu dukai buidïrï iji dai biaturhi. —¿Tumaxi gïr bhïidati aapi. Gïr buapi pïxi soi ïrhiaragai?— ikaiti ïgai.

⁵ —Cho, maiti tipu soi ïrhiaragai— ikaiti Samuel. —Mos daaxda iñagai idi arhi baakaxi Gïr Nukadakami bïïtarï— ikaiti. —Bhaiga abïr gïn duñi ïmo xadutudaragai bïïtarï. Abïr gïn bapaïtïbi aapimï xi dukai gïr biturhi Diuxi daidi gin uraba— itïtïdai. Bhodïrï soi Samuel go Isaí ïmadï maamaradï xi ïgai bhai gïn duna go xadutudaragai buidïrï ïpï. Dai bai ïgai sai ugana lïïchi go daaxdaragai ix makïdï buapi ïgai Diuxi.

⁶ Aidïxi go Isaí ïmadï maamaradï ka ayi xako daja Samuel go Samuel tïï ïmo maradï Isaí ix makïdï Eliab tïgidu. Dai pobï ïrhi go Samuel, —Idi gia ïr ïgai ïrhi aanï ix makïdï Gïr Nukadakami ojoidi Rey bïïtarï. Xibiki gin aagidamu Diuxi xi toida aanï asaiti— gï ïrhidi Samuel.

⁷ Dïï Gïr Nukadakami itïtïdai, —Maiti gï tïgito nïñiada xïï kïï tiodi ïgai dai xïï tïkaboga ïgai ïpï. Aanï maiti ipïrhidi xi ïr Reykagi ïgai. Odami mosïkaxi tukugadï nïidi dïï aanï gia ibhïadï nïidi bhaiyoma—.

⁸ Bhodïrï bai Isaí go Abinadab dai ami tutui buidïrï go Samuel . Dïï Samuel itïtïdai, —Idi maiti ïr Gïr Nukadakami daasagadï Rey bïïtarï— itïtïdai.

⁹ Dai bhodïrï bai Isaí go Sama tïgidukïdï. Dai Samuel itïtïdai, —Tomarhi idi maiti ïr daasagadï— itïtïdai.

¹⁰ Isaí bua kubarakami maamaradï dai ami tutui buidïrï go Samuel dïï Samuel itïtïdai, —Gïr Nukadakami maiti ipïrhidi xi Reykagi tomarhi ïmadutai gobai— itïtïdai.

¹¹ —¿Maiti xi tipu jaa gï maamara?— itïtïdai. —Mosïka arhidukïdioma bii. Dai oidigana daja nukadai ïgai kañiñiru— itïtïdai Isaí. —Otoma bhaigobai ibaida— itïtïdai Samuel. —Maiti ugimu aatïmï go bhaabhaidi daaxidaradï Gïr Nukadakami xi mai dibiagi ïgai— itïtïdai.

¹² Dai go Isaí otoxi ñoki sai mïkadïrï dibiana go arhi gïrhi. Dabid tïgidu go arhi gïrhi dai kïï tiodi. Dai Gïr Nukadakami itïtïdai go Samuel, —Idi gia ïr ïgai. Toidañi asaiti go Dabid ixtukïdï gï darasai Reyes— itïtïdai.