तीतुस 3 - खेरलो वचन नोवालो नियम

मसी बोलनो चालनो कोहलो जुवे

¹ माणहाह एर केराव काय सारकार एने आदिकारीन ताबाम रेती, एने तान उकुम मानी, एने आखा हाजो काम केरनेन केरता तियार रेती,

² कुणीन बी ईजुत नाय वेरी, लेड़ाणार नाय रेणे जुवे; पुण हुवाला सोबावान रेणे जुवे, एने आखा माणहा हेऱ्यो मोटली गेरबोड़ाय हेऱ्यो रेय।

³ काहाकाय आपु बी पेल विणएकल्या, एने उकुम नाह माणनारे, ब्रम माय पोड़ीन आलेग आलेग बातीन अबिलाषाम एने हुकान पावराय माय एता, एने बेदबाव, एने कुयराय केरनेम जीवन जीवताला, एने खाराब एता, एने एका दिहरा हेऱ्या दुसमोनाय केरताला।

⁴ पुण जेवी आपणो सुटकारो आपणार बोगवानान गीण एने माणहा माय तान मोंग आवो,

⁵ ते तो आपुह सुटकारो आप्यो; एने ज्या देरमान कामान कारीन नाह जा आमु केऱ्या, पुण तान गीणान गेत नोवाला जेल्मान उंगेलनेन नेम एने चोखालो जीव आपुह नोवालो बाणावणेन द्‍वारा एनोह।

⁶ बोगवान आपु पोर चोखालो जीवाह सुटकारो आपणार यीशु मसीन द्‍वारा आपु पोर बोरपुर माय रोचवेल हे।

⁷ काय तान गीण ने द्‍वारा आपु देरमी ठेरायेन जेलेमक्यो जीवणान आसान गेत वोस बोणी।

⁸ ज्‍यु वातु खेरल्यु हेत्यु, एने ज्‍यु वातुन बाराम तु मोजबुत माय बोली ओहली मार मोरजी हे, ज्यानकेरता काय जा बोगवाना पोर बुरहो किरेल हेते, ता हाज हाजा कामे केरनेम द्यान देय। ज्‍यु वातु हाजी एने माणहान फायदान हेत्यु।

⁹ पुण फोगान बोलाचाल, एने वोस ने, एने विरोद एने राड़ जा कायदान बाराम हेते, वोचीन रे; काहाकाय ता विणफोल एने फालतुक हेते।

¹⁰ फुट पाड़णार माणहाह एक दुय वारीन सोमजाड़ीन ताह रेन आलेग रे।

¹¹ ज्यो जाणीन काय ओहलो माणुह खाराब एय गीयोह, एने सोताह दोसी ठेरावीन पाप केरती रीथे।

सेवली खुबेर

¹² जेवी मी तार फाय अरतिमासाह नाहते तुखीकुसाह मोकलुह, ते मार फाय निकुपुलीस वोर आवणेन कोसीत किरजे, काहाकाय ता मी हियालाम रेणेन निर्णय लियेल हे।

¹³ जेनास देरेमगुरूह एने अपुल्लोसाह कोसीत केरीन ओंगाण पोचाड़ दे, एने देख काय ताह काल्ली बी वोस्तुन कोमी नाय पोड़ने जुवे।

¹⁴ आपणा माणहे बी जोरवतीह पुरी केरनेन केरता हाजा कामाम लागीन रेणे हिके काय फालतुक जीवाय नाय जीवे।

¹⁵ मारा आखा हातीन उगे रेन तुवाह नमस्‍कार। जा बोरहान वोजेसे आमुह मोंग केरतेह, ताह नमस्‍कार। तुमू आखा पोर बोगवानान गीण एती रेय।