प्रकाशितवाक्य 6 - खेरलो वचन नोवालो नियम

सिक्को

¹ ओवतो मेंड्रो हात सिक्‍का माय रेन एक सिक्काह उगाड्यो, एने ता चार जेनवेराम रेन एकाह वादलान गाजणेन गेत आवाज किरतेन होमल्यो, “आव!”

² जेवी मी दिख्यो, तेवी एक दुवल्यो गुड़ो देखानो। एने जो ता गोड़ा पोर बोह रियेल ईतो ता फाय एक दोंदली एती, एने ताह एक मुकूट आपायेल एतो। तो जिकील ने गेत जीत हासील केरनेन केरता निकेलनो काय जीत हासील केरी।

³ जेवी मेंड्रो दुसरा सिक्काह उगाड्यो, तेवी मी दुसरा जेनवेराह ज्यो कितेन होमल्यो, “आव!”

⁴ तेवी रातला रेंगान एक गुड़ो आवो, ता गोड़ा पोर बोहणाराह ज्यी सेक्ती आपेल एतो काय देरती पोर रेन सान्ती विस लेय, ताकाय माणहे एका दिहराह मारी। एने ताह एक मोटली तालवार आपेल एती।

⁵ जेवी मेंड्रो तीसरा सिक्काह उगाड्यो, तीबी मी तीसरा जेनवेराह ज्यो कितेन होमल्यो, “आव!” तेवी मी दिख्यो, ते एक काल्लो गुड़ो देखानो। ता गोड़ा पोर बोहणारान आथा माय एक ताकड़ो एतो।

⁶ एने मी ता चार जेनवेरान विची माय रेन एक आवाज ज्यो कितेन होमल्यो, “एक दिह्यान मोंजरीन बोदले एक दिह खाणेन केरता हेरबोर गोव, एने एक दिह्यान मोंजरीन बोदले तीन हेरबोर जुवार। पुण जेतुन ने जाड़ाह एने अंगुरान वाड़ीह नुकसान मा पोचाड़हे!”

⁷ जेवी मेंड्रो चोवथा सिक्काह उगाड्यो, तेवी मी चोवथा जिवताला जेनवेराह ज्यो कितेन होमल्यो, “आव!”

⁸ जेवी मी दिख्यो, तेवी माहु ता एक मुरेल ने गेत पेल्ला रेंगान गुड़ो देखानो। ता गोड़ा पोर बोहणारान नाव मोत हे, एने आंदारकेली तान पासाण पासाण जाणे बाजरियेल एती। ताह ज्यो आदिकार आपेल एतो काय काल पाड़ी, बेमारी लागाड़ी, एने देरतीन जेंगली जेनवेरा केरीन माणहाह मार टाकी।

⁹ जेवी मेंड्रो पाचवा सिक्काह उगाड्यो, ते मी वेदीन नेचो ता माणहान जीव दिख्यो। बोगवानान वचन ने पारचार केरनेन कारीन एने तान गोवाय माय विश्वासयोग्य रेणेन कारेण जा ता कियेल एता, तान वोजेसे माराय जायेल एता।

¹⁰ ता मोठेस आयड़ीन केया, “एय ताकेतवाला मालीक, चोखालो एने खीरलो बोगवान हे! तु काह वोर नियाव नाय किरहे, एने केदीह वोर देरती पोर रेणारा माणहा फाय रेन आमरा खुन ने बुदलो नियाव लिहे?”

¹¹ ता माय रेन एकेकाह दोवल्या फाड़का आपाय गीया, एने ताह कियेल, थोड़ीक वार वोर आराम किरो, जाह वोर काय तुमरा मसी मायवाला हाती सेवक एने बुरहो केरनारा बाय बोणहा मोरनेन गेणती पुरी नाय एय जाय, जा तुमरी गेत माराण्या हेते।

¹² जेवी मी मेंड्राह साहवा सिक्काह उगाड़तालो दिख्यो। तेवी देरती फाटनी एनो, एने दिह कामल्यान गेत काल्लो, एने चांद लुय ने गेत रातलो एय गीयो।

¹³ जुगा वाला तारा देरती पोर इहकेरीन पोड़ गीया, जिहकेरीन मोटलो वादोण आवणे से अंजीरान कोवला फोल पोड़ जातेह।

¹⁴ जुग फाटीन चेटायीन गेत गुंडलाय गीयो, एने एकेक बुयड़ो एने टापु तान जागे रेन सेटा केराय गीया।

¹⁵ तेवी देरतीन राजा, मुखी, आदिकारी, मालदार, ताकेतवाला एने एकेक पावोर एने एकेक आजाद माणुह बोयड़ान गुफा माय एने मोटला देगड़ान बुंदे जाईन लिकाना।

¹⁶ ता बोयड़ाह एने मोटला देगड़ाह ज्यो केणे बाज गीया, “आमरी उपेर पोड़ जावो एने आमुह तान नेजरी माय रेन वोचाड़ो जो राजगादि पोर बोह रिनोह, एने मेंड्रान रागाह रेन लीकाड़ लिवो!

¹⁷ काहाकाय तान रागान बिय आवी ओहलो दिह आव लागेल हे, एने ओहलो कुण हे जो तान सामनो केर सिकेह?”