प्रकाशितवाक्य 5 - खेरलो वचन नोवालो नियम

गुंडालील पुस्तेक एने मेंड्रो

¹ जो राजगादि पोर बोह रियेल ईतो, तान जेवड्या आथाम मी एक पुस्तेक दिख्यो; जान माय एने बाहेर लिखेल एतो, एने तीह हात सिक्‍का लागाड़ीन बोंद किरेल एतो।

² एने मी एक ताकेतवाला हेरोगदुताह दिख्यो। जो जोरेस आयड़ीन गोसणा केरने बाजरियेल ईतो, “ज्या गुंडालील पुस्तेक ने सिक्काह तोड़ने एने ताह उगाड़नेन ताकेतवालो कुण हे?”

³ पुण नाह हेरगा माय, नाह देरती पोर, नाह देरतीन नेचो कुण ता पुस्तेकाह उगाड़ने एने ता पुस्तेक माय काय हे देखणेन ताकेत मेलनार कुणीस नाह एतो।

⁴ तेवी मी उहकी उहकीन रेड़ने बाज गीयो, काहाकाय ता पुस्तेकाह उगाड़ने एने ता माय जो लिखेल एतो ताह देखणेन लायकीन कुण नाह जुड़नो।

⁵ तेवी डावाला माणहा माय रेन एक जाण माहु केयो, “रेड़ी मा। एने देख! यहुदान गेराणान तो सिहो जो दाऊदान वोस हे, ता हात सिक्‍का तोड़ने एने गुंडालीन पुस्तेकाह उगाड़ने केरता ताकेवालो ईयेल हे।”

⁶ तेवी मी दिखो मेंड्रो राजगादिन विची माय उबरेनोह, एने चार जेनवेराह एने डायला माणहा से गेराय रिनोह। तो ओहलो देखातालो काय ताह मारील हे। ताह हात हिंगे एने हात डोला एता, जा बोगवानान हात जीव हेते, जाह आखी देरती पोर मोकलील एतो।

⁷ तेवी मेंड्रो जाईन राजगादि पोर जो बोह रियेल ईतो, तान जेवड्या आथाम रेन ता पुस्तेकाह लीय लिदो।

⁸ तो ता पुस्तेकाह लिदो तेवी ता चार जेनवेरे एने चोववीस डायला माणहे ता मेंड्रान पाया पोड़ना। ता आखा डायला फाय रेणथो एने ईंगाला माय बोरायेल होनान वाटका एता, त्यु बोगवानान माणहान विन्ता हेत्यु।

⁹ ता एक नोवालो गीत गावणे बाजरियेल एता: “तु ज्या पुस्तेकाह लेणे, एने ज्या पोर लागेल सिक्काह तोड़नेन लायकीन हे। काहाकाय तुवाह बोलीन रूप माय मार दियेल एतो, एने ताच ने द्‍वारा तु बोगवानान माणहाह एकेक जाती, बाषा, एने आखी वोस से देसाह वेचातो लेन सोड़ेव लियेल हे,

¹⁰ ताह आमरा बोगवानान सेवा केरनेन केरता राज एने चाकर्‍यो बाणायेल हे, एने ता देरती पोर राज केरती।”

¹¹ पुशो मी दिख्यो, एने एजार एने लाखो हेरोगदुतान आवाज होमल्यो, ता राजगादि एने ता चार जेनवेरान एने ता डायला माणहान चार उगे उबरियेल एता।

¹² एने ता मोठेस आयड़ीन ज्यो गीत गावणे बाजरियेल एता: “तो मेंड्रो जो माराय जायेल एतो, ताकेत, देन, इकेल, आदिकार, मान सम्मान, बोड़ाय, एने स्तुतीन लायेक हे!”

¹³ एने हेरगाम, देरती पोर, देरतीन नेचो एने देरीयाम जा आखी वोस्तुह, एने आखो जो काय ता माय हे, ज्यो गावतीन होमल्यो: “जो राजगादि पोर बोह रिनोह तान एने मेंड्रान स्तुती, एने मान सम्मान, बोड़ाय, एने ताकेत कायेम रेय!”

¹⁴ तेवी ता चार जेनवेरे केया, “आमेन!” एने डावाला माणहे पाया पोड़ीन आरादना केऱ्या।