प्रकाशितवाक्य 15 - खेरलो वचन नोवालो नियमसेवली पिड़ा लावणारे हात हेरोगदुत 1 पुशो मी जुगा माय एक बोंगलाय ओहली मोटली निसाणी दिख्यो, तो ज्यो काय हात हेरोगदुता फाय हात आवणार पिड़ा एत्यु, त्यु सेवल्यु पिड़ा एत्यु, काहाकाय न्यु हेऱ्यो बोगवानान राग ओलाय जाथे। 2 तेवी माहु सिसान गेत एक देरीयो देखाय देनो जा माय आक्ठो बेचक्यो एय। एने उंजु मी दिख्यो काय जा माणहे ता जेनवेरा एने तान मुरती एने तान आकड़ा पोर जीत हासील किरेल हेते। ता माणहे बी ता सिसान देरीयान उपेर, बोगवानान उगे रेन आपायेल रेणथो लेन उबरियेल एता। 3 ता माणहे बोगवानान पावोर मुसान एने मेंड्रान गीत गावणे बाजरियेल एता: “एय आखाह रेन ताकेतवाला मालीक बोगवान, तार काम मोटला एने बोंगलाय ओहला हेते! एय देस देसान राजा, तार वाट खेरली एने खेराय माय बोरायेल हे! 4 एय मालीक, कुण हे जो तुवाह नाय बिय? एने तार नावान बोड़ाय नाय केरी? काहाकाय तु उलोस चोखालो हे। एने आखा देसान माणहे आवी एने तार आरादना केरती, काहाकाय तार नियाव ने काम आखा पोर देखाय जायेल हेते।” 5 ज्यान पासाण मी ज्यो दिख्यो काय हेरगान मोंदिर माय वायदान तोम्बु खोलाय गीयोह। 6 ता मोंदिर माय रेन हात हेरोगदुत हात पिड़ा लेन निकेलना, ता हुवाल्ला साप सुतरा फाड़का पेरीन एने साती पोर होनान पुट्टो लेन एता। 7 तेवी ता चार जीवताला जेनवेरा माय रेन एक एने कायेम कायेम जीवतालो रेणार बोगवान ने रागाम बोरायेल हात वाटकाह, हात हेरोगदुताह आप दिनो। 8 बोगवानान बोड़ाय एने तान सेक्तीन कारेण मोंदिर दुवाड़ा माय बोराय गीयो, एने जाह वोर हात हेरोगदुतान हात पिड़ा निवेर नाह गियी, ताह वोर मोंदिर माय कुणूस बी जाय नाह सेक्यो। |
The New Testament in Nahali Language © The Word for the World International and Nahali Vishwaseen Mandli, Toranmal, Dhadgaon, Nandurbar, Maharashtra 2020