प्रकाशितवाक्य 13 - खेरलो वचन नोवालो नियम

दुय जोरवार जेनवेरे

¹ ओवतो मी एक ओहला जेनवेराह देरीया माय रेन निकेलतालो दिख्यो। जान दोह हिंग एने हात मुंड एता; तान हिंगा पोर दोह मुकूट, एने तान मुंडा पोर बोगवानान चिहटान नाव लिखेल एतो।

² जा जेनवेराह मी दिखेल तो खेड्यान गेत एतो, पुण तान पाय रिसड़ान गेत एने मुय सिहान गेत एतो। ताह एजगेर सोतान सेक्ती, राजगादि एने मुठलो आदिकार आप दिनो।

³ मी तान मुंडा माय रेन एका पोर ओहलो जेखेम लागेल दिखेल काय तो एवी मोरने पोर हे, पुण तो मार लीय ओहलो जेखेम हुदरी गीयो। एने आखी दुनियान माणहे बोंगलायीन ता जेनवेरान पासाण पासाण चाल देना।

⁴ माणहे एजगेरान आरादना केऱ्या, काहाकाय एजगेर ताह राज केरनेन केरता सोतान आदिकार आप दियेल ईतो, एने ज्यो किन जेनवेरान पुजा केऱ्या, “ज्या जेनवेरान बाराबोर कुण हे? एने ज्यान विरोद कुण लेड़ाय सिकेह?”

⁵ ता जेनवेराह मोठाय केरने एने बोगवानान चिहटान वातु बोलणेन केरता मुय आपेल एतो, एने ताह बेचाड़ीस मोयना वोर राज केरनेन आदिकार आपायेल एतो।

⁶ तेवी जेनवेर बोगवानान चिहटा केरनेन सुरवात केर दिनो, तो बोगवानान नाव, एने जा बोगवान रिथे तो जागो, एने जा हेरगा माय रेतेह तान चिहटा किऱ्यो।

⁷ ताह ज्यो बी हक आपेल एतो काय बोगवानान माणहान विरोद माय लेड़ाय केरी एने ता पोर जिक हासील केरी, एने ताह एकेक गेराणो, माणहे, आलेग आलेग बाषा, एने आखा देस पोर आदिकार आपेल एतो।

⁸ दुनियाह बाणावणेन पेल जान नाव मारायेल मेंड्रान जीवणान पुस्तेक माय लिखेल हेते, ताह सोड़ीन आखी देरती पोर रेणारे माणहे ता जेनवेरान आरादना केरती।

⁹ जान कान एय, ता होमली लेय!

¹⁰ जा जेली माय कोंडाणेन केरता हादायेल हेते ता जेली माय कोंडाय जाती; एने जा तालवारी केरीन मारती ता तालवारी केरीन माराय जाती। केरीन बोगवानान माणहाह दिर एने बुरहो ज्याज माय हे।

¹¹ पुशो मी देरती माय रेन एक उंजु जेनवेराह निकेलतालो दिख्यो। तान मेंड्रान गेत दुय हिंगे एता, पुण तो एजगेरान गेत बोलतालो।

¹² तो ता पेल्ला जेनवेरान आखो आदिकार तान ओंगाण कामा माय लागाड़तालो। एने ता पेल्ला जेनवेराह जाह मार लीय ओहलो जेखेम हुदरी जायेल एतो, तान आरादना आखी दुनियान माणहाह केरावतालो।

¹³ तो दिहरो जेनवेर मोट मोठा चोमेत्कार देखाड़तालो; एने न्या वोर काय माणहान ओंगाण जुगाम रेन देरती पोर आक्‍ठो पाड़ देतालो।

¹⁴ एने जा चोमेत्कार ता जेनवेरान ओंगाण ताह केरनेन होपेल एतो, तो देरती पोर रेणारा माणहाह ठेगतालो। तो ताह केतालो काय ता जेनवेरान मुरती बाणावो जान सेरीर पोर तालवारी केरीन जेखेम लागेल एतो, एने जो पोशो जीवतालो एय जायेल एतो।

¹⁵ ताह जेनवेरान मुरती माय जीव टाकणेन आदिकार आपेल एतो काय मुरती बोलने बाज जाय, एने जोला बी माणहे ता जेनवेरान मुरतीन आरादना नाय केरी, ताह माराव देय।

¹⁶ दुसरो जेनवेर आत्या मोठा, गेरीब मालदार, आजाद एने पावोर आखा माणहाह मोजबुर किऱ्यो काय आप आपणा जेवड्या आथा एने निंडाला पोर तान साप गालाड़ी।

¹⁷ एने जा पोर तो साप मतलब ता जेनवेरान नाव एने तान नावान आकड़ा एय, ताह सोड़ीन दिहरा काल्ला बी माणहे लेन देन नाह केर सेकते।

¹⁸ जा माय इकेल एय तो ता जेनवेरान आकड़ान मतलब काड़ लेय, काहाकाय ज्या आकड़ा एगदा माणहान नावान बाराबोर हेते। तान आकड़ान ईसाब हे सोव होव साहासट।