मरकुस 8 - खेरलो वचन नोवालो नियम

यीशु चार एजार माणहाह रूटो खावड़ावणे

¹ ता दिह्याम माणहान होवटाली गेरदी यीशुन जागे टोलवाय गियी। एने ता फाय खाणेन केरता कायच नाह एतो, तेवी यीशु तान चेलाह आहने हादिन केयो,

² “माहु न्या माणहा पोर किव आवीह, काहाकाय न्या तीन दिह वोर एक सारका मार हेऱ्या हेते एने न्या फाय खाणेन केरता कायच नाह सोतो।

³ केदी मी न्याह बुखल्योच गेर मोकेल देह, ते न्या वाटेच लेवायीन पोड़ जाती, काहाकाय न्या माय रेन थोड़ाक सीटे रेन आयेल हेते।”

⁴ तान चेला ताह फुशा, “ज्यी उजाड़ी माय ओला होवटा रोटा कुण लावी काय न्या आखा माणहे खाईन आफरी जाती?”

⁵ यीशु तान चेलाह फुशो, “तुमू फाय कोलाक रोटा हेते?” ता जापाप आप्या, “हात।”

⁶ तेवी यीशु माणहाह बुई पोर बोहणेन केरता उकुम आप्यो। उवतो ता हात रोटा मांग लिदो, एने बोगवानाह दन्यवाद केरीन मुड्यो, एने तान चेलाह आपती गीयो काय ता माणहाह वाटती; एने चेला माणहाह वाट देना।

⁷ ता फाय थोड़ाक आतल्या मासा बी एता। यीशु ताह बी बोगवानान दन्यवाद केरीन माणहाम वाटणेन केरता चेलाह आप दिनो।

⁸ एने आखा माणहे खायलीन आफरी गीया, एने चेला उगरेल रोटा हात टोपला बोरीन विशा।

⁹ एने ताहरी चार एजार माणहे एता। उवतो यीशु ताह मोकली दिनो।

¹⁰ तेवी यीशु डोंडह्या माय बुठो एने तान चेला हिऱ्यो देल्मनुता हेयरा माय जात रिनो।

फरिसी यीशुह चोमेत्कार केरने कियेल

¹¹ ओवता फरिसी आवीन यीशु हेऱ्या बोलचाल केरने बाज गीया। ता ज्य पारेखणेन केरता काय यीशु बोगवानान उगे रेन हे काय माणहान उगे रेन, हेरगान निसाणी मांग्‍या।

¹² यीशु तान जीवा माय हाह बोरीन केयो, “ज्यी टेमीन माणहे काहा निसाणी मांगतेह? मी तुमूह खेरीच केथु! काय ज्यी टेमीन माणहाह काल्लीस निसाणी नाय आपाय!”

¹³ उवतो यीशु ताह सोड़ दिनो, एने पुशो डोंडह्या माय बोहीन ती पार जात रिनो।

फरिसी एने हेरोदेसान हिकवोणीन खमीर

¹⁴ चेला रूटो ली जाणे विहरी जायेल एता एने डोंडह्या माय ता फाय एकुस रूटो ईतो।

¹⁵ यीशु चेलाह सोमजाड़ीन केयो, “फरिसीन खमीर एने हेरोदेसान खमीर रेन उशारी माय रिज्यो।”

¹⁶ ज्य होमलीन चेला आपसाम वातु केरने बाज गीया, “तो ज्य ज्यानकेरता किथे, काहाकाय आपु फाय रोटा नाह सोता।”

¹⁷ यीशु ज्य जाणीन ताह केयो, “आपु फाय रोटा नाह सोता इहकेरीन आपसाम बोलचाल काहा केरतेह? काय तुमूह एवी बी सोमेज माय नाह आवीत? काय तुमरो मोन वातड़ो एय जायेल हे?

¹⁸ डोला हेते तीबी तुमूह काय देखात नाह? एने कान हेते तीबी कायच नाह होमेलते? एने तुमूह कायच बी एर नाह सोतो

¹⁹ जेवी मी पाच एजार माणहान केरता पाच रोटा मुड़ेल ईतो, तेवी तुमू उगरेल रोटा कोलाक टोपला बोरीन विसेल एता?” चेला केया, “बारा टोपला।”

²⁰ यीशु ताह फुशो, “जेवी मी चार एजार माणहान केरता हात रोटा मुड़ेल ईतो, तेवी तुमू उगरेल रोटा कोलाक टोपला बोरीन विसेल एता?” चेला ताह जापाप आप्या, “हात टोपला।”

²¹ यीशु चेलाह फुशो, “काय तुमू एवी वोर नाह सोमेजते?”

यीशु बेतसेदा गावाम एक आंदला माणहाह हुदारने

²² ता आखा बेतसेदा गावाम आवा, एने थोड़ाक माणहे एक आंदलाह यीशु फाय लेन आवा एने ताह विन्ता केऱ्या काय आंदलाह सापली।

²³ यीशु ता आंदला माणहान आथ देरीन गावान बाहेर ली गीयो। ओवतो तान डोला पोर थुप्यो एने आथ मेलीन ताह फुशो, “काय तुवाह काह देखाह?”

²⁴ तो उपेर नेजेर केरतीन केयो, “होव मी माणहाह देख सेकथु, पुण ता माहु चालताला जाड़ान गेत देखातेह।”

²⁵ यीशु पुशो एक वार तान डोला पोर आथ मिल्यो। एने तो हासकेरीन देख्यो, एने तो हुदरी गीयो, एने साप साप देखणे बाज गीयो।

²⁶ यीशु ताह ज्य केयीन गेर मुकेल दिनो, “ज्या गावा माय पुशो जाहे मा।”

यीशु बोगवानान द्‍वारे निवाड़ेल सोड़वणार हे

²⁷ उवतो यीशु एने तान चेला केसरीया फिलेपीन गावान आहने गीया। तेवी वाटे यीशु तान चेलाह फुशो, “मी कुण हे, ज्यान बाराम माणहे माहु काय केतेह?”

²⁸ चेला जापाप आप्या, “काल्ला केतेह तु योहान बपतीस्मा केरनार हे; पुण थोड़ाक जाणे केतेह तु एलिया हे, एने थोड़ाक केतेह तु जाणकारा माय रेन एक हे।”

²⁹ यीशु तान चेलाह फुशो, “पुण मी कुण हे ज्यान बाराम तुमू काय केतेह?” पतरस यीशुह जापाप आप्यो, “तु मसी हे।”

³⁰ यीशु ताह उकुम आप्यो, “मार बाराम ज्य कुणीह मा किहे।”

यीशु तान मोत एने पोशो जीव उठणेन बाराम जाणाव

³¹ उवतो यीशु तान चेलाह हिकाड़ने बाज गीयो, “माणहान बेटाख ने केरता ज्यो जोरवरी हे काय मी जुलूम दुख वेठु, एने डावाला माणहे एने बोगवानान मुखी चाकऱ्या, एने देरेमगुरून द्‍वारे नेचो गेणाय जाह एने माराय जाह। पुण मी तीन दिह्यान पासाण पुशो जीव उठुह।”

³² यीशु ज्यी वात ताह हुतरी हेट केय दिनो। केरीन ज्य केतास पतरस यीशुह कुवालोच ली जाईन दोपकावणे बाज गीयो।

³³ पुण यीशु तान चेलान उगे देखीन पतरसाह दोपकावीन केयो, “एय सैतान, मार हिऱ्यो रेन सिटो एय जा, काहाकाय तु बोगवानान वाती पोर नाह। पुण माणहान वाती पोर मोन लागाड़ने!”

³⁴ बाद माय यीशु माणहाह एने तान चेला आहने हादिन केयो, “जो कुण मार पासाण आवणे हुदेह, ताहार तो आपणे आपाह नाकारी, एने तान खुरूसखाम उखलीन मार पासाण चाल देय।

³⁵ काहाकाय जो कुण बी तान जीवाह वोचाड़ने हुदेह तो ताह गोमाड़ देय; पुण जो कुण मार केरता एने मार हाजाली खोबरीन केरता जीव गोमाड़ी, तो ताह वोचाड़ लेय।

³⁶ केदी माणुह आखी केलीन चिजीह काबाम केर लेय एने तान जीवाह दुको एय, ताहार ताह काय फायदो एय?

³⁷ दुनियान काल्ली बी चिज केरीन माणुह तान जीवाह लेय नाह सिकेत?

³⁸ एने जो कुण ज्यी सिनाली एने पापी जातीन विचीम मार हेऱ्या एने मारी वातीह रेन लाजवाती, जेवी मी माणहान बिटोख बी मार चोखाला हेरोगदुता हिऱ्यो एने मार आबाख ने बोड़ाय हिऱ्यो आवुह, तेवी ता हिऱ्यो बी लाजवाह।”