मरकुस 3 - खेरलो वचन नोवालो नियम

यीशु आथ पांगला माणहाह हुदारने

¹ एने यीशु पुशो यहुदिन बोक्ती केरन्या गेरा माय गीयो, ता एक माणुह एतो जान आथ पांगलो ईतो।

² थोड़ाक माणहे वाट जोवणे बाजरियेल एता काय यीशु विहेवणेन दिह ता आथ पांगा माणहाह हुदारी; काय ता यीशु पोर गुनो लागाड़ सेकी।

³ यीशु ता आथ पांगा माणहाह केयो, “न्या आखान ओंगाण आवीन उबरी।”

⁴ यीशु माणहाह फुशो, “काय विहेवणेन दिह हाजो केरने कायदान विरोद हे? काय बाकतो केरने, जीवाह वोचाड़ने काय मारने, ज्याम रेन काल्लो हाजो हे?” पुण ता ठावकाच रेय गीया।

⁵ यीशु कावदेन ताह रागा माय बोरायीन दिख्यो, एने तान मोनान वातड़ाय देखीन जुलूम नाराज एय गीयो। ओवतो यीशु ता माणहाह केयो, “तार आथ ओंगाण किर।” तो आथ ओंगाण केऱ्यो, एने तान आथ पेल ने गेत हुदेर गीयो।

⁶ केरीन फरिसी बाहेर निकलीन जात रेना, एने यीशुन विरोद माय हेरोदेस ने टोलीन माणहा हेऱ्या एक वारीन मिलीन वात केरने बाज गीया, काय किहीक यीशुह खेतेम केरहु।

माणहान गेरदी यीशुन पासाण आवणे

⁷ यीशु एने तान चेला बाहेर निकलीन गेलील देरीयान उगे गीया, तेवी गेलील एने यहुदिया गावाम रेन एक होवटाली माणहान गेरदी तान पासाण चाल देनी,

⁸ एने यरूशलेम, एने इदूमिया, एने यरदन नेदीन ती पार सुर एने सेदान देसान आहने पाहने रेन बी माणहान एक होवटाली गेरदी यीशुन चोमेत्कार ने कामान बाराम होमलीन ता फाय आवी।

⁹ यीशु तान चेलाह केयो काय गेरदी जुलूम हे केरीन मार केरता एक डोंडह्यो तियार केर मीलो, काहाकाय माणहे माहु दाब नाय सेकी।

¹⁰ काहाकाय यीशु मोकतास दुखाऱ्या माणहाह हुदारेल ईतो, तानकेरीन जोला बी दुखाऱ्या माणहे एता, तोला ताह सापेलनेन केरता तान आहने आवताला।

¹¹ एने जेवी बुतड़ा लागेल माणहे ताह देखताला, ते तान ओंगाण पोड़ जाताला एने जोरेस आयड़ीन केताला, “तु बोगवानान बिटोख हे!”

¹² यीशु बुतड़ाह उकुम आप्यो काय मार बाराम दिहरा कुणीह नाय केय।

यीशु बारा चेलाह निवाड़ने

¹³ ओवतो यीशु एक बोयड़ा पोर जात रिनो एने जा माणहे ताह पोटना ताह हाद्यो। एने ता यीशु फाय आवा।

¹⁴ एने यीशु ताम रेन बारा जाणाह निवाड्यो, एने तान नाव प्रेरित मिल्यो। तो ताह केयो, “मी तुमूह मार आरही रेणेन केरता निवाड़ेल हे, एने मी तुमूह पारचार केरनेन केरता बी मोकलुह,

¹⁵ एने तुमूह बुतड़ाह काड़नेन आदिकार रेय।”

¹⁶ यीशु जा बारा जाणाह निवाड़ेल तान नावे ज्या हेते: शमोन जान नाव तो पतरस मिल्यो;

¹⁷ जब्दीन बिटोख याकुब एने तान बाहख योहान जान नाव यीशु बुअनरगिस, मतलब “गाजणारान बिटोख मिल्यो।”

¹⁸ अन्द्रियास, फिलीपुस, बरतुल्मे, मत्ती, थोमा, हलफाईन बिटोख याकुब, तद्दे, शमोन कनानी जो रोमी सारकारान विरोदी ईतो।

¹⁹ एने यहुदा इस्‍कोरिती, जो यीशुह दुको देन देराव दियेल ईतो।

यीशु एने बुतड़ान मुखी बालजबुल

²⁰ तेवी यीशु गेर जात रिनो। एने पोशी माणहान ओली होवटाली गेरदी टुलो एय गियी काय यीशु एने तान चेलाह खाणेन केरता बी टेम नाह जुड़नो।

²¹ जेवी यीशुन गेरल्या ज्यान बाराम खुबेर होमल्या, ते ता यीशुह गेर ली जाणेन केरता आवा, काहाकाय माणहान केणो एतो, “तान दिमाक ठिकाणा पोर नाय मीले!”

²² तेवी थोड़ाक देरेमगुरू जा यरूशलेम माय रेन आयेल एता, ता ज्य केताला, “ज्या माय बालजबुल हे, एने ज्यो ता बुतड़ान आदिकारीन मोदेक लेन बुतड़ाह बाहेर काड़ेह।”

²³ केरीन यीशु ताह आहने हाद्यो एने किस्सा माय केयो, “सैतान किहीक सैतानाह काड़ सिकेह?

²⁴ केदी राज ने माणहा माय फुट पोड़ी, ताहार ता राज ने माणहे किहीक एकठा रेय सेकतेह,

²⁵ एने केदी एगदा गेरान माणहा माय फुट पोड़ी, ताहार ता गेरान माणहे किहीक एकठा रेय सेकतेह।

²⁶ तानकेरता केदी सैतान ताच ने राज ने विरोदी एन ताज माय फुट पाड़ी, ताहार तो किहीक बोणीन रेय सिकेह? तो खेतेमुस एय जाथे।

²⁷ “काल्लो बी माणुह एगदा तेगड़ा माणहान गेराम रिगीन तान माल नाह लुट सिकेत, जाह वोर काय तो ता तेगड़ा माणहाह बांद नाह देत; ओवतो तान गेराह लुट सिकेह।”

²⁸ “मी तुमूह खेरीच केथु काय माणहान आखा पाप एने चिहटा जा ता केरतेह माफ एय जाती।

²⁹ पुण जो कुण चोखाला जीवान विरोद माय खाराब चिहटा किरेह, ताह केदी बी माफी नाय जुड़ी, काहाकाय तो माणुह जेलेमक्या पापान गुनेगार हे।”

³⁰ यीशु ज्य ज्यानकेरता कियेल ईतो, काहाकाय थोड़ाक माणहे ज्य केताला, “ज्या माय बुतड़ो हे।”

यीशु एने तान गेरल्या

³¹ तेवी यीशुन आहख एने बाहख आवा। ता गेरान बाहेर उबरियेल एता, एने खुबेर ली मोकल्या काय बाहेर आवी।

³² यीशुन ओंगाण एक मोटली माणहान गेरदी बोह रियेल एती, ता यीशुह केया, “देख, तारी आहख एने तारा बाहख बोणीख बाहेर हेते, एने ता तुवाह बाहेर हादणे बाजरेनाह।”

³³ यीशु ताह जापाप आप्यो, “मार आहख एने मार बाहख कुण हेते?”

³⁴ एने तान आहने जा बोह रियेल एता ता माणहा उगे देखीन केयो, “दिखो! न्या मार आहख एने मार बाहख बोणीख हेते!

³⁵ काहाकाय जो कुण बोगवानान मोरजी पोर चाली, तोस मार बाहख, मार बोणीख एने मार आहख हे।”