मरकुस 13 - खेरलो वचन नोवालो नियम

मोंदिरान ओदेरनेन बाराम जाणाव

¹ जेवी यीशु मोंदिर माय रेन निकेलतालो, तेवी तान चेला माय रेन एक ताह केयो, “एय गुरू! देख, कोहला जुलूम मोटला दिगोड़ एने मोटला आवाल्या हेते!”

² यीशु ताह जापाप आप्यो, “तुमूह ज्या मोटला आवाल्या लागतेह? खेरी ते ज्य हे काय न्या आवाल्यान एक बी दिगोड़ तान जागे नाय रेय; आखा दिगोड़ ओदरी जाती।”

तेकलीत एने दुख

³ जेवी यीशु जेतुन बोयड़ा पोर रेन मोंदिराह देखणे बाजरियेल ईतो, तेवी पतरस, याकुब, योहान, एने अन्द्रियास ज्या कुवालाच जाईन ताह फुशा।

⁴ “आमुह के काय ज्‍यु वातु केवीह एती, एने जेवी ज्‍यु आखी वातु पुऱ्यू एणेन आवरेय ती टेम माय काल्ली निसाणी रेय।”

⁵ तेवी यीशु चेलाह केणे बाज गीयो, “तुमूह कुण बी बोड़कावे नाय केरीन जोगवीन रिवो।

⁶ जुलूम जाणे मार नाव लेन आवीन केती, ‘मी मसी हे!’ एने जुलूम जाणाह बोड़कावती।

⁷ जेवी तुमू लेड़ाय एने लेड़ाय ने बाराम होमेलहो, ते मा बिहो। काहाकाय ज्य एणेन जोरेवरी हे, पुण ज्यान मतलब ज्य नाह सोतो काय सेवल्यो टेम आव लागेल हे।

⁸ देसा हेऱ्या देस लेड़ाती; एने राज ने विरोद राज उठती। जा ता बुकम्प एती, एने काल पोड़ी। जेवी ज्य एय तेवी पिड़ान सुरवात एय जाय।”

⁹ पुण तुमू जोगवीन रिज्यो। काहाकाय माणहे तुमूह देरीन कोरटा माय ली जाईन होप देती। माणहे तुमूह पोंचा माय देती; तुमूह मार हाजाली खोबरीन केरता राजान एने आदिकारीन ओंगाण उबा केरती काय तान केरता पुरावो रेय।

¹⁰ पुण सेवल्यो टेम आवणेन पेल, हाजाली खुबेर आखा देसा माय पारचार केराय जाय।

¹¹ जेवी चोकसी केरनेन केरता तुमूह माणहे देरीन कोरटा माय होपती। तेवी पेलुच चिन्ता मा किरहो काय आमु काय केहु; पुण जो काय तुलबूखे तुमूह केवाय जाय तोच किज्यो। काहाकाय बोलनारे तुमू नाह सोता, पुण चोखालो जीव हे।

¹² बाहख बायाख मार देय, एने आबोख बेटाख हिऱ्यो बी इहीचकेरीन केरी। सोरा आईख आबाख ने विरोद एय जाती एने ताह माराव देती।

¹³ एने तुमू मार पोर बुरहो किरेल हेते, केरीन आखा माणहे तुमू हेऱ्या दुसमोनाय केरती। पुण जो आखरी वोर दिर देरीन मार पोर बुरहो केरी, ताच ने सुटकारो एय।

मोटली पिड़ा

¹⁴ पुण जेवी तुमू ता उजाड़नार खाराब चिजीह जा हाजो नाह ता उबरियेल दिखहो, “वाचणार सोमजी लेय,” ते जा यहुदिया माय एती ता बोयड़ा पोर नाह जाय;

¹⁵ जो गेरा पोर एय तो नेचो उतेरनेन केरता टेम नाय गोमाड़ी;

¹⁶ एने जो खेताम एय, तो तान फाड़का लेणेन केरता पासाण नाय जाय।

¹⁷ ता दिह्या माय जी पेटावाली एने आतल्या सोराह बुजो खावाड़तेय, त्युन केरता हाय, हाय!

¹⁸ एने बोगवाना फाय विन्ता किरो काय ज्य हियालान दिह्याम नाय रेय।

¹⁹ काहाकाय ता दिह ओहला पिड़ान रेती काय दुनियान सुरवात रेन जो बोगवान बाणायेल हे, एवी वोर नाह ते ईयेल एतो एने नाय उंजु केदी एय।

²⁰ केदी बोगवान ता दिह्याह नाय गेटेवतो, ते काल्लोस जेनवार नाय वोचतो; काहाकाय निवाड़ेल माणहान केरता, तो पिड़ान दिह्याह गेटाड़ेल हे।

²¹ ती टेम माय कुण बी तुमूह केय, दिखो, मसी न्या हे, एने दिखो, ता हे, ते बुरहो मा किरहो;

²² काहाकाय जुठा मसी एने जुठा जाणकार उठीन उबरी जाती, एने निसाणी एने सोमेज ने बाहेर चोमेत्कारान काम देखाड़ती काय केदी एय सेकी ते निवाड़ेल हेते ताह बी बोड़काव देती।

²³ पुण तुमू जोगवीन रिवो; दिखो, मी तुमूह आखी वातु पेलुच रेन केय दियेल हे।

माणहान बिटोख यीशु तान पोशो देरती पोर आवणो

²⁴ ता दिह्या माय ती पिड़ान पासाण दिह आदारलो एय जाय, एने चांद उजालो नाय आपी;

²⁵ एने जुगाम रेन तारा पोड़ने बाज जाती; एने जुगान ताकेत आलाड़ाय जाय।

²⁶ तेवी माणहे माणहान बेटाख मोटली ताकेत एने बोड़ाय हिऱ्यो वादला माय आवतालो देखती।

²⁷ ती टेम तो तान हेरोगदुताह मोकली, एने देरतीन एक कोपरे रेन ते दिहरे कोपरे वोर, कावदेन रेन बोगवानान निवाड़ेल माणहाह एकठा केरी।

अंजीरान जाड़ान किस्सो

²⁸ अंजीरान जाड़ाह देखीन ज्यी वात हिको। जेवी तान डाल हुवाली एय जाथे, एने पाला फुटणे बाज जातेह; ते तुमू जाण जातेह काय उनालो आहनेच हे।

²⁹ तिहेच केरीन जेवी तुमू ज्‍यु वातुह एताल्यु दिखहो, ते जाण जाज्यो काय टेम आहनेच हे।

³⁰ मी तुमूह खेरीच केथु जाह वोर ज्‍यु आख्‍यु वातु पुरी नाय एय जाती, ज्यी पिढी खेतेम नाय एय।

³¹ जुग एने देरती टेल जाय, पुण मार वचन केदी नाय टेली।

जोगवीन रिवो

³² ता दिह्यान एने ती गेड़ीन बाराम कुण नाह जाणेत, नाह हेरगान हेरोगदुत एने नाह बोगवानान बिटोख; पुण आबोख बोगवान ओलोच जाणेह।

³³ दिखो, जागताला एने जोगवीन रिवो, काहाकाय तुमू नाह जाणते काय तो टेम केवीह आवी।

³⁴ ज्य ता माणहान गेत हे जो दिहरा देसाम जाणे बुखेत, तान पावराह गेरान आदिकार आप्यो एने आखाह तान काम केय देन होपीन जागल्याह जागतालो रेणेन उकुम आप्यो।

³⁵ तानकेरता जाकता रिवो, काहाकाय तुमू नाह जाणते काय गेरान मालीक कुलबुखे आवी, हांज पोर नाहते आदि राती, नाहते कुकड़ा वाहणेन टेम, नाहते दिह उगणेन पेल।

³⁶ इहकेरीन नाय एणे जुवे काय तो उचकाहुच आवीन तुमूह हुवताला आत केरी।

³⁷ एने जो मी तुमूह केथु तोच आखाह केथु: जागते रिवो।