मत्ती 9 - खेरलो वचन नोवालो नियम

यीशु लोखवान दुखाऱ्याह हुदारने

¹ ओवतो यीशु डोंडह्या माय बोहीन ती पार गीयो, एने तान हेयरा माय आवो,

² एने दिखो, थोड़ाक माणहे लोखवान बेमारी वालाह खाटला पोर लोटाड़ीन ता फाय लावा। यीशु तान बुरहो देखीन ता लोखवान बेमारी वाला माणहाह केयो, “एय बेटा! दिर खा, तारा पाप माफ एय गीया।”

³ तेवी देरेमगुरू माय रेन थोड़ाक आपसा माय बोलाचाल केरीन केया, “ज्यो ते बोगवानान चिहटा किरेह।”

⁴ यीशु तान मोनान वातु जाणीन केयो, “तुमू तुमरा मोना माय खाराब विचार काहा केरतेह?

⁵ होपो काय हे, ‘ज्य केणे काय तारा पाप माफ एय गीया,’ काय ज्य केणे, ‘उठ एने चाल फिर?’

⁶ पुण तुमू ज्य जाण लिवो, माहु माणहान बेटाख देरती पोर पापाह माफ केरनेन आदिकार हे।” ओवतो यीशु लोखवान बेमारी वाला माणहाह केयो, “उठ, तारो खाटलो विस एने तार गेर जातरे!”

⁷ तो उठीन तान गेर जात रेनो।

⁸ माणहे ज्य देखीन बिय गीया एने बोगवानान बोड़ाय केरने बाज गीया, जो माणहाह ओहलो आदिकार आपेल हे।

यीशु मत्तीह हादणे

⁹ जेवी यीशु ता रेन जाणे बाजरियेल ईतो तेवी तो फालो उकालने जागे एक माणहाह बोह रियेल दिख्यो, तान नाव मत्ती एतो। यीशु ताह केयो, “मार पासाण आव लाग। तेवी तो उठीन तान पासाण चाल दिनो।”

¹⁰ जेवी यीशु लेवीन गेरा माय रूटो खाणेन बोह रियेल ईतो, तेवी जुलूम होवटा फालो उकालनारे एने पापी आवीन ता हेऱ्या बोह रियेल एता।

¹¹ तेवी ज्य देखीन फरिसी यीशुन चेलाह केया, “तुमरो गुरू फालो उकालनारा एने पापी हिऱ्यो काहा खाथे?”

¹² ज्य होमलीन यीशु ताह जापाप आप्यो, “वोंसी हाजालान केरता नाह पुण दुखाऱ्यान केरता जोरवरी हे।

¹³ तानकेरता तुमू जावो एने ज्यान मतलब काय हे तो जाण लिवो, ‘मी बोली नाह, पुण गीण होदथो।’ काहाकाय मी देरमी माणहाह नाह, पुण पापीह हादणेन आयेल हे।”

उपासान बाराम सावाल

¹⁴ तेवी बपतीस्मा केरनार योहानान चेला यीशु फाय आवीन केया, “काय कारेण हे, काय आमु एने फरिसी ते उपास देरतेह, पुण तारा चेला उपास काहा नाह देरते?”

¹⁵ यीशु ताह जापाप आप्यो, “जाह वोर वोवड़ो वाराड्या हिऱ्यो हे काय ता दुख मोणावती? पुण ता दिह आवती जेवी वोवड़ो ता हिऱ्यो रेन आलेग एय जाय, तेवी ता उपास देरती।

¹⁶ “नोवाला फाड़कान ठिगलो जुनाला फाड़का पोर कुण नाह लागाड़ने, काहाकाय तो ठिगलो ता फाड़काह होवटोह फाड़ देय, एने फाड़को जादा कोचलाय जाय।

¹⁷ एने नोवाला अंगुरान रूहाह जुनाला चामड़ान थेयली माय नाह बोरते, काहाकाय ओहलो केरहु ताहार चामड़ान थेयली फाट जाथे, तानकेरता नोवाला अंगुरान रूहाह, नोवाली चामड़ान थेयली माय बोरनु, तेवी रूह एने थेयली दुयू वोचीन रेती।”

यीशु मुरेल सोरीह जीवतो केरने एने दुखारी बायकु हुदारने

¹⁸ यीशु ता हिऱ्यो वातु केरनेच बाजरियेल ईतो, तोलाक माय यहुदि पोंचान एक आदिकारी ता फाय आवो, एने तान पाया पोड़ीन केयो, “मारी सोरी एवीच मोरनीह; पुण तु केदी आवीन ती पोर आथ मिलहे, ते ती जीवताली एय जाय।”

¹⁹ तेवी यीशु उठीन, तान चेला हिऱ्यो तान पासाण चाल दिनो।

²⁰ एने ता एक बायकु एती जीह बारा वोरह्या रेन लुय वोयणेन बेमारी एती, ती पासाण रेन आवीन यीशुन फाड़कान सेंडो सापेल लेदी।

²¹ काहाकाय ती तीन मोना माय विचार केरताली, “केदी मी तान फाड़काह ओलीच सापली लेह ते हुदेर जाह।”

²² यीशु फिरीन तीह दिख्यो, एने केयो, “मार बेटी दिर खा! तारो बुरहो तुवाह हुदार दियेल हे।” एने ती चालोच हुदरी गियी।

²³ जेवी यीशु ता आदिकारीन गेर पोचनो। तो पावला वाजाड़नाराह एने गेरदीह आयेड़ तालो दिख्यो,

²⁴ एने यीशु केयो, “तुमू आखा बाहेर जात रिवो, सोरी मोरी नाह, पुण हुवणे बाजरेनीह!” ज्य होमलीन माणहे तान मोजाक उड़ाया।

²⁵ पुण जेवी आखा माणहाह बाहेर निकाल देना, ते यीशु सोरीह मिलेल ती जागे जाईन तीन आथ दिऱ्यो, एने ती जीव उठनी।

²⁶ एने ज्यी वातुन खोबेर आखा देसा माय पोसीर गियी।

यीशु दुय आंदला माणहाह देखतो केरने

²⁷ जेवी यीशु तारेन जाणे बाजरियेल ईतो, ते दुय आंदला तान पासाण चाल देना एने इहकेरीन आयेड़ने बाज गीया, “एय दाऊदान बेटाख, आमु पोर गीण केर!”

²⁸ जेवी यीशु गेरा माय आवो, तेवी यीशु केयो, “तुमूह बुरहो हे काय मी तुमूह हुदार सेकथु?” ता जापाप आप्या, “होव मालीक!”

²⁹ तेवी यीशु तान डोलाह सापलीन केयो, “तुमरा बोरहान गेत, तुमरी केरता एय!”

³⁰ एने तान डोला उगड़ी गीया। ओवतो यीशु ताह सोमजाड़ीन केयो, “उशारिम ज्यी वात कुण बी जाणने नाय जुवे!”

³¹ पुण ता ता रेन जाईन आखा देसाम यीशुन बाराम केय होमलाया।

एक मुकाह बोलतो केरने

³² जेवी यीशु एने तान चेला बाहेर जाणे बाजरियेल एता, तेवी माणहे एक मुकाह जा माय खाराब जीव एतो, ता फाय लावा।

³³ एने जेवी तो खाराब जीवाह निकाल दिनो, ते तो मुको, जो पेल कायच बोल नाह सेकतालो, बोलने बाज गीयो। ज्य देखीन आखा माणहे बोंगलायीन केया, “इस्राएल माय ओहली वात केदीच नाह देख्या।”

³⁴ पुण फरिसी केया, “ज्यो ते बुतड़ान मुखीन मोदेक लेन बुतड़ाह निकालेह।”

यीशुन गीण

³⁵ यीशु यहुदियान बोक्ती केरन्या गेरा माय जाईन हिकाड़तालो, एने बोगवानान राज ने हाजाली खोबरीन पारचार केरतालो, एने माणहान बेमारीह एने सोब बातीन बेमारी एने कोमजोरीह सिटो किरते; ता आखा ईलाका माय गाव गाव एने हियोर हियोर फिरतालो।

³⁶ जेवी तो माणहान गेरदीह दिख्यो, ते ताह माणहा पोर जुलूम किव आवी, काहाकाय माणहे ता मेंड्रान गेत दुखी चिन्ता माय बोरायेल एने नाराज एता जान कुण गोवाल नाह रेणे।

³⁷ तेवी यीशु तान चेलाह केयो, “पाकेल कामाय जुलूम हे, पुण मोंजर्‍या थोड़ाच हेते।

³⁸ तानकेरता कामायीन मालीकाह किवो काय तो तान खेतान कामाय काटणेन केरता मोंजर्‍या मोकली।”