लुका 5 - खेरलो वचन नोवालो नियम

यीशु पेल्ला प्रेरिताह हादणे

¹ एक दिह यीशु गन्नेसरतान देरीयान दिड़े उबरियेल ईतो, तेवी जुलूम माणहे तान कावदेन उबरीन, बोगवानान वचन होमेलनेन केरता एका दिहरा हेऱ्या देखलाताला।

² तेवी यीशु देरीयान मीरे दुय डोंडह्या उबरियेल देख्यो, एने मासऱ्या ता पोर रेन उतरीन जाल दोवणे बाजरियेल एता।

³ ता डोंडह्या माय रेन एक जी शमोनान एती, ती पोर यीशु चेड़ गीयो एने शमोनाह केयो, “डोंडह्याह मेरा माय रेन जारीक ओग्योह ली जा,” उवतो यीशु ता पोर बोहीन हिकाड़ने बाज गीयो।

⁴ जेवी यीशु वातु हिकाड़ दिनो, ओवतो शमोनाह केयो, “डोंडह्याह उंडेह ली चाल, एने मासा देरनेन केरता तारी जाल टाक।”

⁵ शमोन यीशुह केयो, “एय मालीक! आखी रात आमु जुलूम मेहनेत किरेल हेते, एने आमुह एक बी मासो आथ नाह लागो, पुण तु किथे केरीन जाल टाकुह।”

⁶ जेवी ता यीशुन वात होमलीन जाल टाक्या, तेवी जाली माय जुलूम मासा बोराय गीया, एने तान जाल फाटणे बाज गियी।

⁷ तेवी मोदेक ने केरता दिहरा डोंडह्‍याम बोह रियेल तान हातीह हाद्या, तेवी ता आवीन डोंडह्याह ओला बोर देना काय दुय बी डोंडह्या बुड़ने बाज गीया।

⁸ ज्यो देखीन पतरस यीशुन पाया पोड़ीन केयो, “एय मालीक! माहु हिऱ्यो रेन सिटो जातरे, काहाकाय मी पापी माणुह हे।”

⁹ काहाकाय शमोन एने तान हाती ओला मासा देखीन बोंगलाय जायेल एता।

¹⁰ ता शमोनान हाती जब्दीन दुय सोरा याकुब एने योहान बी एता, ता बी बोंगलाय गीया, तेवी यीशु शमोनाह केयो, “बिय मा, मी तुवाह हिकाडुह काय माणहाह बोगवाना फाय किहीक लावणु हे।”

¹¹ जेवी शमोन एने तान हाती डोंडह्याह देरीयान दिड़े लावा, तेवी ता आखो काय सोड़ीन यीशुन पासाण चाल देना।

यीशु कोढवाला माणहाह हुदारने

¹² जेवी यीशु एक गावा माय ईतो, ता एक कोढ वालो माणुह आवो; एने यीशुह देखीन तान पाया पोड़ीन विन्ता केरीन केयो, “एय मालीक, केदी तारी मोरजी एय, ते तु माहु हुदार सिकेह!”

¹³ तेवी यीशु आथ ओंगाण केरीन ताह सापलीन केयो, “मारी मोरजी हे, तु हुदेर जाय,” तेवी चालोच तो हुदेर गीयो।

¹⁴ तेवी यीशु ताह उकुम आप्यो, “जो काय ईयेल हे तो कुणीह मा किहे, पुण तु मोंदिरा माय जाईन चाकऱ्याह तारा सेरीराह देखाड़, एने मुसान नेम ने गेत हुदेर जाणेन चेड़ावो चेड़ाव काय ता पोर गोवाय रेय।”

¹⁵ पुण यीशुन बाराम ती वात जुलूम पोसरी गियी, तेवी जुलूम माणहे यीशुन हाजाली खुबेर होमेलने, एने तान बेमारीह रेन हुदेरनेन केरता टोलवाय गीया।

¹⁶ पुण यीशु ता रेन निकलीन उजाड़ी माय जाईन तान आदेतीन गेत विन्ता केऱ्या केरतालो।

यीशु लोखवान दुखाऱ्या माणहाह हुदारने

¹⁷ एक दिह यीशु हिकाड़ने बाजरियेल ईतो, तेवी थोड़ाक फरिसी एने देरेमगुरू बी ता बोह रियेल एता, जा गेलील यहुदियान आखा गावाम रेन, एने यरूशलेम रेन आयेल एता, एने माणहाह हुदारनेन केरता बोगवानान ताकेत यीशु फाय एती।

¹⁸ तुलबूखे थोड़ाक माणहे एक लोखवान बेमारी वालाह खाटला पोर लोटाड़ीन लावा, पुण जुलूम बिड़ एती, तानकेरीन ताह गेरा माय नाह ली जाय सेक्‍या, ता ताह गेराम ली जाणेन केरता जागो होदणे बाज गीया।

¹⁹ तेवी ता गेरा पोर चेड़ीन साजो उगाड़ीन लोखवान दुखाऱ्याह खाटला बेलुच यीशुन आहने उतार देना।

²⁰ यीशु तान बुरहो देखीन लोखवा वाला दुखाऱ्याह केयो, “एय बेटा तारा पाप माफ एय गीया।”

²¹ तेवी फरिसी एने देरेमगुरू तान तान मोना माय विचार केरने बाज गीया, “ज्यो एदमी कुण हे? ज्यो ते बोगवानान चिहटा किरेह! बोगवानाह सोड़ीन पापान माफी कुण आप सिकेह!”

²² तान मोनान विचाराह जाणीन यीशु ताह केयो, “तुमरा मोना माय तुमू काहा ओहलो विचार केरने बाजरेनाह?

²³ होपो काय हे? काय ज्य केणे, ‘तारा पाप माफ एय गीया, नाहते इही केणे काय उठीन चाल फिर?’

²⁴ पुण तुमूह मालुम रेणे जुवे काय माहु माणहान बेटाख ज्यी देरती पोर पाप माफ केरनेन बी आदिकार हे, ज्य किते जाईन लोखवान दुखाऱ्याह केयो, ‘मी तुवाह केथु, उठ एने तारो खाटलो उखलीन गेर जातरे।’”

²⁵ तुलेचबूखे तो माणुह आखान ओंगाण उठीन उबरेय गीयो, एने खाटलो उखलीन बोगवानान बोड़ाय केरतीन तान गेर जात रिनो।

²⁶ तेवी आखा माणहे बोंगलाय गीया, एने बोगवानान बोड़ाय केरने बाज गीया, एने जुलूम बिन केया, “ओलो मोठो काम आमु आजुच दिखेल हेते!”

यीशु लेवीह हादणे

²⁷ उवतो यीशु ता रेन बाहेर गीयो, एने लेवी नावान एक फालो उकालनाराह फालो उकालनेन चोवकी पोर बोह रियेल दिख्यो, एने यीशु ताह केयो, “मार पासाण आव।”

²⁸ तेवी लेवी सोब सोड़ीन यीशुन पासाण चाल देनो।

²⁹ तेवी यीशुन केरता तो तान गेरा माय जुलूम होवटो खाणो तियार किऱ्यो, एने यीशु हेऱ्या फालो उकालनारे दिहरा जुलूम माणहे बी खाणो खाणेन केरता बोह रियेल एता।

³⁰ तेवी फरिसी एने देरेमगुरू ता पोर गुनो लागाड़नेन केरता तान चेलाह फुशा, “तुमू फालो उकालनारे एने पापी माणहा हेऱ्या काहा खाते पितेह?”

³¹ तेवी यीशु ताह जापाप आप्यो, “हाजाला माणहाह वोंसीन जोरेवरी नाह पुड़ेत, पुण दुखाऱ्याह जोरेवरी पुड़ेह।

³² मी देरमीह नाह, पुण पापी माणहाह पापा माय रेन सोड़ेवणेन केरता हादणे आवोह।”

उपासान बाराम सावाल

³³ ओवता ता यीशुह केया, “बपतीस्मा केरनार योहानान चेला उपास देरतेह एने विन्ता केरतेह, एने फरिसीन चेला बी तिहेच केरतेह, पुण तारा चेला उपास नाह देरते, ता काहा खाते एने पितेह?”

³⁴ तेवी यीशु ताह जापाप आप्यो, “वोवड़ा हेऱ्या वाराड्या रेतेह, ता काय उपास देरतेह? केदीच नाह।

³⁵ पुण एक टेम आवी, तेवी वोवड़ो ता हिऱ्यो रेन आंगे एय जाय, तेवी ता उपास देरती।”

³⁶ ओवतो यीशु ताह एक उंजु किस्सो केयो, कुण बी नोवाला फाड़कान ठिगलो जुनाला फाड़काह नाह लागाड़ेत, एने केदी लागाड़ेह ते नोवालो फाड़को हाकड़ो एय जाय एने जुनाला फाड़काह फाड़ देय, एने नोवालो फाड़को जुनाला हिऱ्यो मेल नाय खाय।

³⁷ एने कुण बी नोवाला अंगुरान रूहाह जुनाला चामड़ान थेयली माय नाह बुरेत, केदी ओहलो किरेह ते नोवालो अंगुरान रोह चामड़ान थेयलीह फाड़ीन वोय जाय, एने थेयली बी फाट जाय।

³⁸ तानकेरता नोवाला अंगुरान रूहाह नोवाली चामड़ान थेयली माय बोरने जोरेवरी हे।

³⁹ काल्लो बी माणुह जुनालो अंगुरान रूहाह पियलेन नोवालो नाह हुदेत, काहाकाय तो किथे, “काय जुनालोच हाजो हे।”