लुका 15 - खेरलो वचन नोवालो नियम

टाकायेल मेंड्रान किस्सो

¹ आखा फालो उकालनारे एने पापी यीशु फाय आया केरताला, काय ता यीशुन वातु होमली।

² पुण फरिसी एने देरेमगुरू कुयराएन केया, “ज्यो ते पापी हिऱ्यो बेलाह एने ता हिऱ्यो खाते पिते।”

³ तेवी यीशु ताह ज्यो किस्सो केयो,

⁴ “तुमरे माय रेन कुण हे जान एक होव मेंड्रा एती, एने ताम रेन एक टाकाय जाय, ते नोवह्यान नोव मेंड्राह जेंगलाम सोड़ीन, ता टाकायेल मेंड्राह जाह वोर नाह सापड़ेत ताह वोर होदते नाय रेय?

⁵ एने जेवी ताह सापड़ी जाथे, तेवी तो जुलूम खुसी एन ताह खादा पोर उखली लिथे;

⁶ एने गेर आवीन हातीह एने तान आहने रेणाराह टुलो केरीन किथे, ‘मार हेऱ्या मोंज किरो, काहाकाय मारो टाकायेल मेंड्रो सापड़ी जायेल हे।’

⁷ मी तुमूह केथु इहीचकेरीन पाप सोड़नार पापी माणहान बाराम बी हेरगा माय ओलीच खुसी एय, जोलीक नवह्यान्नव देरमीन बाराम नाह जा पाप केरने सोड़ दियेल हेते, जाह मोन बोदेलनेन गिरेज नाय मीले।

टाकायेल रूपियान किस्सो

⁸ “तिहेच ओहली काल्ली बायकु एय जी फाय दोह रूपिया एती, एने ताम रेन एक रूपियो टाकाय जाय, ते तो दिवो हेलगाड़ीन एने गेर बारीन, जाह वोर नाह सापड़ेत ताह वोर होदते नाय रेय?

⁹ एने जेवी सापड़ी जाथे, ते ती तीन जोड़ीदाराह एने आहने रेणार्‍यु बायकुह टोलवीन किथे, ‘मार हेऱ्यो मोंज किरो, काहाकाय मारो टाकायेल पोयशो सापड़ी जायेल हे।’

¹⁰ मी तुमूह केथु इहीचकेरीन पाप सोड़नार पापीन बाराम बोगवानान हेरोगदुतान सामने मोंज ईथे।”

उजाड्या सोरान किस्सो

¹¹ पुशो यीशु केयो, “एक माणहान दुय सोरा एता।”

¹² ताम रेन आतल्‍यो बिटोख आबाख केयो, “एय आबा, मालदेन माय रेन जो मारो वाटो हे तो माहु आप दे।”

¹³ थोड़ाक दिह्याम आतल्‍यो बिटोख तान आखो मालदेन लेन एकठो केरीन सिटोच मुलखाम जात रिनो, एने ता आखो मालदेन मोज मोचती माय उड़ाव दिनो।

¹⁴ जेवी तो आखो काय खेरची दिनो, तेवी ता देसाम मुठलो काल पुड़नो, एने तो गेरीब एय गीयो।

¹⁵ केरीन तो ता देसाम रेणार एक जाणा फाय काम होदणेन केरता गीयो। एने तो ताह तान खेताम हुवऱ्या चारने मुकल्यो।

¹⁶ पुण जो हुवऱ्या खाताला, ता फोला केरीन तान पेट बोरने होदतालो; काहाकाय ताह कुण खाणे नाह आपतालो

¹⁷ तेवी तो सुद्दी माय आवीन तो सोताह केयो, “मार आबाख फाय ते जुलूम पावराह पेट बोरीन रूटो जुड़ेह, एने मी न्या बुखल्यो मोरने बाजरिनोह।

¹⁸ पुण एवी मी मार आबाख फाय जाह, एने ताह केह काय आबा, मी बोगवानान विरोद माय एने तार नेजरीम पाप किरेल हे।

¹⁹ एवी मी तारो बिटोख केवाणेन सुद नाह रिनो, ते माहु तारो एक पावरान गेत राखले।”

²⁰ तुलबूखे तो उठीन तान आबाख फाय चाल पोड़नो। सिटोच रेन आबोख ताह दिख्यो ते ता पोर जुलूम किव आव गियी, एने दोवड़ीन ताह गेले लागाड्यो, एने ताह गुल्‍या दिनो।

²¹ तेवी बिटोख आबाख केयो, “आबा, मी बोगवानान विरोद माय एने तारी नेजरीम पाप किरेल हे; एवी मी तारो बिटोख केवाणेन सुद नाह रिनो।

²² पुण आबोख तान पावराह केयो, ‘सेटकाह हाजालाह रेन हाजाह फाड़का लावीन ज्याह पेरावो, एने ज्यान आथाम मुंदी एने पाया माय खाहड़ा पेरावो,

²³ उंजु पालेल वासड़ो लावीन मारो आपु खाहु एने मोंज केरहु।

²⁴ काहाकाय मार बिटोख मोर जायेल ईतो, पुण पुशो जीव जायेल हे: टाकाय जायेल ईतो, पुण एवी सापड़ी जायेल हे।’” इहकेरीन ता मोंज केरने बाज गीया।

²⁵ पुण तान डावालो बिटोख खेताम ईतो। जेवी तो आवतालोन गेरान आहने पोचनो, ते तो गीते गावताला एने वाजाड़ताला एने नाचणेन आवाज होमल्यो।

²⁶ तेवी तो एक पावोराह हादिन फुशो, “ज्य काय एणे बाजरिनोह?”

²⁷ पावोर ताह केयो, “तारो आतल्‍यो बाहख आव रिनोह, तो हाजे हुके जुड़नो, केरीन तारो आबोख पालेल वासड़ो मारेल हे।”

²⁸ ओहलो होमलीन ताह राग आव गीयो एने ताह गेराम रिगणेन बी मोन नाह एनो; पुण तान आबोख बाहेर आवो एने ताह विन्ता केरीन पोटाड़ने बाज गीयो।

²⁹ बिटोख ताह केयो, “देख, मी ओला वोरह्या रेन तारी चाकरी केरने बाजरिनोह एने मी केदी बी तारी वात नाह टाल्यो? तीबी तु मार जोड़ीदार हिऱ्यो मोंज केरनेन केरता माहु बोकड़ीन एक गीदल्यो बी नाह आप्यो!

³⁰ पुण तारो ज्यो बिटोख, तारो मालदेन गेलेत कामाम उड़ाव दियेल हे, पुण तो पुशो आव लागोह ते तु पालेल वासड़ो मारायेल हे।

³¹ आबोख ताह केयो, ‘बेटा, तु ते जेलेम मार हिऱ्यो हे जो काय मारो हे तो आखो तारोच हे।

³² ते आपुह जुलूम खुस एन तिवार मानावणे जुवे काहाकाय ज्यो तारो बाहख मोर जायेल ईतो, पुण पुशो जीवतालो एय जायेल हे; टाकाय जायेल ईतो, पुण एवी सापड़ी जायेल हे।’”