इफिसीयो 2 - खेरलो वचन नोवालो नियममोतीम रेन जीवायी वोर 1 एने तो तुमूह बी जिवाड़ेल, जा तुमरा गुनान एने पापान कारेण मुरेल एता। 2 एक टेम एतो जेवी तुमू आत्मिक रूप से उकुम नाह माणनारे एने आत्मिक रूप माय मोर जायेल एता; एने ज्या दुनियान खाराब वाटी पोर चालनारे एता, एने जुगान आदिकारी, ता जीवान गेत जीवताला, जो जीव एवी बी उकुम नाह मान्नारा माय काम केरने बाजरिनोह। 3 ज्या माय आमु बी आखा पेल सेरीरान मोरजी पुरी केरनेन केरता जीवताला, एने सेरीर एने मोनान मोरजी पुरी केरताला, एने दिहरा माणहान गेत वेवारा माय रेन रागान सीकार एता। 4 पुण बोगवान जुलूम गीण केरनार हे, काहाकाय तान महान मोंगा केरीन आमु पोर मोंग किऱ्यो। 5 जेवी आमु उकुम नाह मान्नेन कारेण मुरेल एता, तो आमुह मसी माय जीवाय आप्यो। ज्यो बोगवानान गीण ने द्वारा तुमूह वोचाड़ेल हे। 6 एने आपुह मसी यीशु माय एक एणेन वोजेसे ता हेऱ्यो जीव उठाड्यो, एने हेरगा माय ता हेऱ्यो बोहाड्यो। 7 काय तो आवणे वाला टेम माय तान गीणीन मोठाय मसी यीशु माय आमरे केरता किरेल गीण माय देखाड़ सेकी। 8 काहाकाय बोरहान द्वारे गीण केरीस ने तुमूह सुटकारो जुड़ेल हे, एने ज्यो तुमरी उगे रेन नाह, पुण बोगवानान दान हे; 9 एने नाह कामान कारेण, ओहलो नाय एय काय कुण बी मोठाय केरी। 10 काहाकाय आमु बोगवानान बाणायेल हेते, एने मसी यीशु माय ता हाजा कामान केरता बोणेल हेते, जाह बोगवान पेलुस आमुह केरनेन केरता तियार किरेल हे। मसी माय एक 11 तुमू जा पायदासीस बिगेर यहुदि हेते एने खेतान केरायेल यहुदिन द्वारा केवाय जातेह, जा आपणे आप खेतना केरायेल केवाहतेह तुमरा पोसली जीवायीह एर मीलो। 12 ईर किरो तुमू तुलबूखे दुनियाम मसी रेन आलेग, एने इस्राएलान पोरजान पोदा रेन आंगे केरायेल, एने वायदान वाचान बागी नाह एता, एने बिगेर आसान एने दुनिया माय बिगेर बोगवानान एता। 13 पुण एवी मसी यीशु माय तुमू जा पेल सेटा एता, मसीन लुयी केरीन आहने एय गीयाह। 14 काहाकाय तीस आमरी सान्ती हे, जी यहुदि एने बिगेर यहुदिह एक केर देनी एने आंगे केरनार जो बितड़ो विची माय एतो, तोड़ देनो। 15 एने आपणा सेरीर माय खाराब मतलब तो नेम जान उकुम विदीन रिती पोर एती, मीटाड़ देनो काय दुयूह ता माय एक नोवालो माणुह बाणावीन तान विचीम मीलावे। 16 एने मसीन खुरूसखाम पोर मोतीन कारेण बेदबावाह खेतेम केरीन दुयूह एक सेरीर बाणावीन बोगवाना हेऱ्यो मीलाव दिनो। 17 एने तो आवीन तुमू जा बिगेर यहुदि सेटा एता, एने यहुदि जा आहने एता, दुयूह सान्तीन मीलापान हाजाली खुबेर होमलाव्यो। 18 काहाकाय यीशुन द्वारे आपु दुयून एक जीव एन आबाख फाय पुचीह। 19 तानकेरता तुमू बिगेर यहुदि परदेसी एने एंजाणल्या नाह रेना, पुण बोगवानान माणहा हेऱ्या बोगवानान गेराणान एय गीयाह। 20 ताह बाणावणो प्रेरित एने जाणकारान द्वारे मीलेल पाया पोर, जान आदार खुद मसी यीशु हे। 21 आखी आवाली तान द्वारे जोड़ाय गियी एने मालीक माय चोखाली मोंदिर एणेन केरता वोदेह। 22 मालीक माय एक एणेन वोजेसे तुमू बी जीवान द्वारे बोगवानान रेणेन जागो बोणनेन केरता एकठो बोणती जाथे। |
The New Testament in Nahali Language © The Word for the World International and Nahali Vishwaseen Mandli, Toranmal, Dhadgaon, Nandurbar, Maharashtra 2020