प्रेरितान काम 6 - खेरलो वचन नोवालो नियम

हात सेवक

¹ ता दिह्या माय जेवी चेलान गेणती जुलूम वोदणे बाज गियी, तेवी युनानी बाषा बोलनारे यहुदि इब्रानी बाषा बोलनारा यहुदि पोर कुरकुर केरने बाज गीया, काय दाड़ीन दान माय तान रांडायेल बायकुन एर नाह केराय जात।

² तेवी ता बारा प्रेरित विश्वासीन मोंडलीह ता फाय हादिन केया, “ज्यो ठिक नाह सोतो काय आपु बोगवानान वचन सोड़ीन खावाड़ ने पिवाड़नेन सेवा केरी।

³ तानकेरता एय बाय बोणहा, तुमरे माय रेन हात हाजाह एदम्याह जा चोखाला जीवा केरीन एने इकेल माय पुरा हेते, निवाड़ लिवो काय आपु ताह ज्या कामा पोर ठेराव देहु।

⁴ पुण आमु ते विन्ता एने वचनान सेवा माय लागीन रेहु।”

⁵ ज्यी वात आखी मोंडलीह हाजी लागी, एने ता स्तिफनुस नावान एक एदम्याह जो बोरहाम एने चोखाला जीवा माय पुरो ईतो, एने फिलीपुस, प्रुखुरूस, नीकानोर, तीमोन, परमीनास एने अन्‍ताकियान नीकुलाउसाह जो यहुदिन बोरहा माय आव जायेल ईतो, निवाड़ लेदा।

⁶ ता न्याह प्रेरितान सामने लेन आवा, एने ता विन्ता केरीन ता पोर आथ मेल्या।

⁷ बोगवानान वचन पोसेरते गीयो। एने यरूशलेम माय चेलान गेणती जुलूम वोदते गियी, एने चाकर्‍यान एक मोटलो सोमाज ज्या बोरहाह मान्नार बोण गीयो।

स्तिफनुसान देराणो

⁸ स्तिफनुस गीण एने ताकेत माय पुरो एन माणहान विची माय मोट मोटला बोंगलाय ओहला काम एने चोमेत्कार देखाड्या केरतालो।

⁹ तेवी ता बोक्ती केरन्या गेरा माय रेन जो लिबीरतीन केवाताली, एने कुरेनी एने आलेकजांडरीया एने किलीकीया एने आसीयान माणहाम रेन थोड़ाक माणहे उठीन स्तिफनुसा हेऱ्या बोलचाल केरने बाज गीया।

¹⁰ पुण स्तिफनुस ओहली इकेल एने जीवा माय बोलतालो काय ता तान सामनो नाह केर सेक्‍या।

¹¹ तेवी ता थोड़ाक माणहाह ज्यो केणेन केरता ईरेचेड़ाया, “आमु ज्याह मुसान एने बोगवानान विरोद माय चिहटान वातु केरतालो होमलेल हेते!”

¹² एने माणहाह एने डायडायाह एने देरेमगुरूह ईरेचेड़ाया, एने ताह देरीन मोटला पोंचाम लेन आवा।

¹³ एने जुठा गोवाह सामने लावा जा केया, “ज्यो माणुह ज्या चोखाला मोंदिर एने मुसान नेमान विरोद माय तालताल बोलते रीथे।

¹⁴ काहाकाय आमु ज्याह ज्यो कितेन होमलेल हेते काय ज्योच यीशु नासरी ज्या मोंदिराह तोड़ देय, एने ती रितीह बोदेल देय जो मुसो आपुह होपेल हे।”

¹⁵ तेवी आखा माणहे जा मोटला पोंचा माय बोह रियेल एता, स्तिफनुसा पोर हास केरीन नेजेर टाक्या, ते तान मुय हेरोगदुतान गेत देख्या।