प्रेरितान काम 28 - खेरलो वचन नोवालो नियममाल्टा माय पौलुस 1 जेवी आमु मेराम हाजेस केरीन वोच निकेलना, ते आमुह मालुम पोड़नो काय ज्यो टापु माल्टान हे। 2 एने तावाला माणहे आमु पोर जुलूम गीण केऱ्या। काहाकाय पाणी पोड़नेन वोजेसे जुलूम ईवालो एतो, तानकेरता ता आक्ठो हेलगाड़ीन आमु आखाह थोबाड्या। 3 तेवी पौलुस लाकड़ान बारो लावीन आक्ठा पोर मिल्यो, ते गेरमास एनी केरीन एक गेयड़ेक बाहेर निकेलनो, एने तान आथा हिऱ्यो विलगी गीयो। 4 जेवी ता माणहे गेड़हाह पौलुसान आथा हिऱ्यो विलगी रियेल देख्या, ते एकमेकाह केया, “खेरीच ज्यो माणुह खुनी हे, ज्यो देरीयाम रेन वोच गीयो, तीबी नियाव ज्याह नाह सोड्यो।” 5 पुण पौलुस गेड़हाह आक्ठा माय जेटकी दिनो, एने ताह काय दुको नाह पोचनो। 6 पुण माणहे वाट जोवताला काय तान सेरीर हुज जाय एने पोड़ीन मोर जाय, पुण जेवी ता जुलूम वार वोर वाट जोवते रेना एने देख्या काय ताह कायच नाह एनो, ते तान विचार बोदलीन केणे बाज गीया, “ज्यो ते एगदो देव हे।” 7 ता जागान आहने पाहने ता बेटान मुखी पुबलीयुसान जागो ईतो, तो आमुह तान गेर ली जाईन तीन दिह वोर दोस्तीदार से स्वागत किऱ्यो। 8 तेवी इहकेरीन एनो काय पुबलीयुसान आबोख हेरी एने बारथी माय दुखाऱ्यो पोड़ रियेल ईतो। ता फाय गेरा माय जाईन पौलुस विन्ता किऱ्यो, एने ता पोर आथ मेलीन ताह हुदाऱ्यो। 9 ज्यी गेटनान बाद ता बेटा माय जा दिहरा माणहे दुखाऱ्या एता, ता बी पौलुस फाय आवा एने हुदरी गीया। 10 ता आमरो जुलूम एने आखी बातीन आदार केऱ्या, एने जेवी आमु ती जागे रेन जाण्या एता, तेवी ता आमरे गेरजीन आखी चिज डोंडह्या माय मेल देना। माल्टा माय रेन रोम माय जाणो 11 तीन मोयना पासाण आमु आलेकजांडरीया रेन एक डोंडह्या माय बोहीन चाल पोड़ना, एने हिवालो काड़नेन केरता जा टापु हेऱ्या रोकाय रियेल एता, ता जागाह जोवल्या देवता केताला। 12 ता ओवता आमु सुरकुस माय पोचना एने तीन दिह थोब रेना। 13 दिहरी दिह दक्शिणान उगे रेन वारो सुटनो, तेवी आमु दुय दिह्यान पासाण रेगुयम गाव लागतास पुतीयुली गावा माय आवा। 14 ताहरी आमुह थोड़ाक विश्वासी बाहख मीलना, ता आमुह हात दिह वोर ता फाय रेणेन केरता विन्ता केऱ्या। इहकेरीन आमु रोम हेयराम आवा। 15 जेवी रोम मायवाला विश्वासी बाहख आमरा बाराम होमेलना, ते अप्पीयुस ने बाजार एने तीन सराय वोर आमुह मिलने आवा, ताह देखीन पौलुस उत्साहित ईनो, एने बोगवानाह दन्यवाद दिनो। रोम माय पौलुस 16 जेवी आमु रोम हेयराम पोचना, ते पौलुसाह एक सिपाया हिऱ्यो जो पौलुसान देखरेत केरतालो, एखालोच रेणेन उकुम जुड़ गीयो। 17 तीन दिह्यान पासाण पौलुस यहुदिन मुखी माणहाह हादाड्यो, एने जेवी ता एकठा टोलवाना ते ताह केयो, “एय मारा इस्राएली बाहख, मी आपणा माणहान एने डायडाया फाय रेन जुड़ेल रिती रिवाजान विरोद माय काय बी नाह किऱ्यो, तीबी माहु यरूशलेम माय आरापी बाणावीन रोमी माणहान आथाम होपाय गीयो। 18 ता माहु चोकसी केरीन सोड़ देणे होद्या, काहाकाय मार माय मोतीन डेंड आपणेन काय दोस नाह ईतो। 19 पुण यहुदि ज्यी वातुन विरोद केऱ्या, ते माहु मोजबुरी माय केसरा फाय रेन नियाव मांगणेन विन्ता केरने पोड़नो; ज्यानकेरता नाह काय माहु आपणा माणहा पोर एगदो दोस लागाड़नु एतो। 20 केरीन मी तुमूह विन्ता केरीन हादेल हे काय तुमूह मीलु एने वातु केरू। काहाकाय मी ता माणहान केरता ज्यी हाकली से बांदायेल हे, जान इस्राएली माणहे आसा केरतेह।” 21 ता पौलुसाह केया, “नाह आमु तार बाराम यहुदिया फाय रेन चिट्ठी जुड़नी, एने नाह आमरा माणहा माय रेन एगदो आवीन तार बाराम काह बातनी केया, एने नाह बाकतो केया। 22 पुण तारो विचार काय हे? तोस आमु तुवा फाय रेन होमेलने होदतेह, काहाकाय आमु जाणतेह काय तु जा समुह माय रेन आवीह ता समुहान विरोद आखी जागे केरतेह।” 23 तेवी ता पौलुसान केरता एक दिह ठेराया, एने जुलूम होवटा माणहे पौलुस ने गेर टोलवाना, एने तो बोगवानान राज ने गोवाय देती लेन, एने मुसान नेम एने जाणाव केरनारान पुस्तेक माय रेन यीशुन बाराम सोमजाड़ी सोमजाड़ीन वेगोच रेन हांज पोर वोर वर्णन किरते रिनो। 24 तेवी थोड़ाक माणहे त्यु वातुह मान लेदा, पुण थोड़ाक बुरहो नाह केऱ्या। 25 जेवी तान आपसाम एकमेल नाह एनो, केरीन ता उठीन जाणे बाज गीया। तेवी पौलुस ताह एक वचन केयो, चोखालो जीव यशाया जाणाव केरनारान द्वारा तुमरा डायडायाह। 26 केयो, “ज्या माणहा फाय जाईन के काय तुमू होमोलहो ते खोरा: पुण तुमूह सोमजाय नाय, एने दिखहो ते खोरा, पुण तुमूह देखाय नाय; 27 काहाकाय न्या माणहान मोन वातड़ा एय जायेल हे, एने ता तान कान बोंद किर लियेल हेते, एने ता तान डोला मीच लियेल हेते, इहकेरीन नाय एय काय ता केदी डोला केरीन देखी, एने काना केरीन होमले, एने मोना केरीन सोमजे एने वोली, एने मी ताह हुदारू।” 28 केरीन तुमू जाणे काय बोगवानान ज्यो सुटकारो बिगेर यहुदि फाय मोकलाय जायेल हे, एने ता होमेलती। 29 जेवी पौलुस इहकेरीन केयो ते यहुदि आपसाम जुलूम बोलचाल केरती लेन ता रेन जात रेना। 30 पौलुस तान बाड़ेन गेरा माय पुरा दुय वोरह्या वोर रिनो; एने जा ता फाय आवताला, ता आखा हिऱ्यो मीलते रिनो। 31 एने तो बिना रूकावट से जुलूम निडर एन बोगवानान राज ने पारचार केरतीन, एने मालीक यीशु मसीन बाराम वातु हिकाड़ते रिनो। |
The New Testament in Nahali Language © The Word for the World International and Nahali Vishwaseen Mandli, Toranmal, Dhadgaon, Nandurbar, Maharashtra 2020