प्रेरितान काम 26 - खेरलो वचन नोवालो नियम

अग्रीपान सामने पौलुस सोताह वोचाड़ेन बासेण केणे

¹ अग्रीपा पौलुसाह केयो, “तुवाह तारा बाराम बोलने उकुम हे।” तेवी पौलुस आथ ओंगाण केरीन जापाप देणे बाज गीयो,

² “एय राजा अग्रीपा! जोल्युक वातुन यहुदि मार पोर दोस लागाड़तेह, आज तार सामने तान जापाप देणे माय मी तुवाह हाजो सोमेजथु,

³ खास केरीन ज्यानकेरता काय तु यहुदिन रिती रिवाज एने बोलचालाह जाणेह।” एने मी तुवाह विन्ता केरथु काय दिर देरीन मारी होमली ले।

⁴ “जोहलो मारो बोलनो चालनो एने जीवाय आत्योच रेन मार माणहान विचीम एने यरूशलेम माय कोहलोक एतो, ज्यो आखा यहुदिह मालुम हे।

⁵ ता माहु जुलूम वेगान जाणतेह, एने केदी ता होद्ती ते ज्यी वातीन पुरावो देय सेकतेह, मी आमरी रितीन आखाह रेन केठीण फरिसी टोलान एक मेहमोर ने रूप माय जीवाय जियेल हे।

⁶ पुण एवी ता वायदा माय आसान कारेण जो बोगवान आमरा डायडाया हिऱ्यो किरेल ईतो, ती आसा देरनेन वोजेसे मारो नियाव एणे बाजरिनोह।

⁷ तास वायदान पुरो एणेन आसा लागाड़ेल, आमरा बारा वोस तान आखो मोन लागाड़ीन रात दिह बोगवानान सेवा किरते आयेल हेते। एय राजा, ज्‍यीस आसान बाराम यहुदि मार पोर दोस लागाड़तेह!

⁸ जेवी बोगवान मुरेलाह जीवतालो किरेह, ज्यो तुमरे माय रेन जुलूम जाणाह बुरहो काहा नाह ईत?”

⁹ “मी जुलूम सुचेल ईतो काय यीशु नासरीन नावा माय जुलूम काय केरू।

¹⁰ एने मी यरूशलेम माय इहीचकेरीन केरीन किरेल बी। एने मुखी चाकऱ्या फाय रेन आदिकार लेएन जुलूम होवटा बोगवानान माणहाह जेली माय कोंड्यो, एने जेवी ता माराय जाताला, तेवी मी बी तान विरोद माय मिलायेल ईतो।

¹¹ एने एकेक यहुदि बोक्ती केरन्या गेरा माय मी ताह जुलूम वार सेजा आप आपीन यीशु पोर ने बोरहाह नाकार केरनेन केरता केतालो। एने तान विरोद जुलूम राग ईतो काय ताह वेला केरावणेन केरता न्या वोर काय मी दिहरा हेयरा माय बी गीयो।”

पौलुसान मोन बोदेलनेन वर्णन

¹² “ज्यास उद्देशाह लेन जेवी मी मुखी चाकऱ्या फाय रेन आदिकार एने उकुम पोत्र मांगीन दमिश्‍क निही जातालो।”

¹³ तेवी एय राजा, वाटे दोपान टेम माय जाणे बुखेत, मी जुगाम रेन मोटली उजेड़ एक उजेड़ मार एने मार हेऱ्या जाणारान कावदेन चोमेकतालो दिख्यो।

¹⁴ तेवी आमु आखा बुई पोर जाय पोड़ना, ते मी इब्रानी बाषा माय एक आवाज होमल्यो, “एय शाऊल, एय शाऊल! तु माहु काहा वेला केरावेह? तु ओहलो केरीन सोता दुख पोचाड़ने बाजरिनोह, जिहकेरीन बुयेल तान लात आरीन दारी पोर लात देणे बाजरिनोह।”

¹⁵ मी केयो, “एय मालीक, तु कुण हे?” एने मालीक जापाप आप्यो, “मी यीशु हे, जाह तु वेला केरावेह।

¹⁶ पुण तु उठ एने तारा पाया केरीन उब रे। काहाकाय मी तुवाह ज्यानकेरता देरसेन आपेल हे काय तुवाह त्यु वातुन बी सेवक एने गोवा ठेरावु, ज्‍यु तु आज दिखेल हे। एने तानकेरता बी जो मी तुवाह बविष्या माय केह।

¹⁷ एने मी तुवाह तार यहुदि माणहाह एने बिगेर यहुदि रेन बी वोचाड़ते रेह, जा फाय तुवाह मोकेलने बाजरिनोह।

¹⁸ तान डोला उगाड़ने एने ताह आदारा माय रेन उजाला माय लावणे, एने सैतान ने आदिकार माय रेन बोगवानान उगे फिरनेन केरता, तुवाह मोकेलने बाजरिनोह। ताहसे तुवाह होमालीन मेलुह, ज्याह से ता पापान माफी सापड़ावती एने ता माणहान जागो सापड़ावती जो मार माय बोरहान कारेण चोखा ईयेल हेते।”

पौलुस तान कामान बाराम केणे

¹⁹ केरीन एय राजा अग्रीपा, मी ता हेरगावाला देरसेनान उकुमाह नाह टाल्यो,

²⁰ पुण पेल दमिश्‍क माय ओवतो यरूशलेम माय एने यहुदियान आखा देसान रेणाराह एने बिगेर यहुदिह सोमजाड़ते रिनो, पासतावो केरीन पापा माय रेन फिरीन बोगवाना उगे वोलीन आवो, एने मोन बोदेलनेन लायेक काम केरी।

²¹ ज्यास ने वोजेसे यहुदि माहु मोंदिर माय देर लेदा, एने मारनेन कोसीत केरने बाजरियेल एता।

²² पुण बोगवानान मोदेक से मी आज वोर टिक रिनोह, एने आतल्या मोटला आखान सामने न्या उबरीन गोवाय देथु। एने ज्‍यु वातु जाणाव केरनारे एने मुसो कियेल हे काय ज्‍यु एण्यु हेत्यु, त्युह सोड़ीन काय नाह केत।

²³ काय मसीह दुख वेठणे पोड़ी, एने तोस आखान पेल मुरेल माय रेन जीव उठीन, यहुदि एने बिगेर यहुदि माय सुटकारान उजालान खुबेर पोचाड़ी।

²⁴ जेवी पौलुस सोताह वाचाड़नेन बाराम इहकेरीन जापाप आपतालो, तेवी फेस्तुस मोटला सोबदाम केयो, “एय पौलुस! तु गांडो हे। तार जुलूम इकेल तुवाह गांडो बाणाव दियेल हे।”

²⁵ पुण पौलुस केयो, “एय ईकेलवाला फेस्तुस, मी गांडो नाह सोतो, पुण खेरली एने सोमेजणेन वातु केथु।

²⁶ खुद राजा अग्रीपा ज्‍यु वातुह जाणेह, एने मी पुरा ईमोत हिऱ्यो ज्‍यु वातु ताह केणे बाजरिनोह। काहाकाय मी पाको जाणथु काय न्यु माय रेन काल्ली बी ताह मालुम हे ओहलो नाह, मी ज्यानकेरता केणे बाजरिनोह काय ज्यी वात काल्ला कोपरा माय नाह गेटनी।

²⁷ एय राजा अग्रीपा, तु बोगवाना फाय रेन खुबेर लावतेह ता पोर बुरहो किरेह काय? होव, मी जाणथु काय तु बुरहो किरेह!”

²⁸ तेवी अग्रीपा राजा पौलुसाह केयो, “काय तु ज्यो सोचेह काय थोड़ाक टेम माय तु माहु मसी बाणाव सिकेह?”

²⁹ पौलुस जापाप आप्यो, “कोम टेम माय काय जुलूम टेम माय, बोगवाना फाय मारी विन्ता हे काय तु होमलेह तुहलोस एय जाय जोहलो मी हे, पुण सिवाय ज्‍यु आतबेड्युन।”

³⁰ तेवी राजा एने आदिकारी, बिरनीके एने ता हेऱ्या बोहणारे माणहे बी उठीन उबरी गीया;

³¹ एने आलेग जाईन आपसाम केणे बाज गीया, “ज्यो माणुह ते ओहलो कायच नाह किरेत, मोतीन डेंड एने जेली माय कोंडाय जाणेन बाराबोर एय।”

³² तेवी अग्रीपा फेस्तुसाह केयो, “केदी ज्यो माणुह केसरा फाय नियाव नाय मांगतो, ताहार ज्याह सोड़ देताम आवतो।”