2 योहान 1 - खेरलो वचन नोवालो नियम

नमस्‍कार

¹ मी योहान डायलान उगे रेन ती निवाड़ेल बायकु एने तीन सोरान नाव, जाह मी खेरलो मोंग केरथु, एने मी ओलोस नाह पुण ता आखा बी मोंग केरतेह जा खेरलाह जाणतेह,

² काहाकाय ती खेरायीन वोजेसे जी आपु माय बोणीन रीथे, तो कायेम आपणी हेऱ्यी रेय;

³ तास ने केरता बोगवान आबाख ने सोरो यीशु मसीन उगे रेन किव एने गीण एने सान्ती, खेराय एने मोंगा हेऱ्यो आपणी हेऱ्यो रेय।

खेरलो एने मोंग

⁴ आपुह आबाख फाय रेन उकुम जुड़ेल तान गेत, तार सोरा माय रेन थोड़ाक खेरायी माय चालताला माहु सापड़ेल हेते, ज्याकेरीन माहु जुलूम खुसी जुड़नीह।

⁵ एवी एय बाय, मी तुवाह नोवाली उकुम नाह, पुण जी आपुह सुरवाती रेन आपेल हे, ती लेखीन तुवाह विन्ता केरथु काय आपु एका दिहराह मोंग केरी।

⁶ तो मोंग ज्यो हे काय आपु तान उकुमान गेत चाली। ज्यो तोच उकुम हे जो तुमू सुरवाती माय रेन होमलेल हेते, एने तुमूह ज्यास ने गेत चालने बी जुवे।

⁷ काहाकाय जुलूम होवटा बोटकावणारे माणहे दुनिया माय निकेल आयेल हेते, ता ज्यो मानते नाह काय यीशु मसी सेरीर माय एन आयेल; बोटकावणारे एने मसी विरोदी ज्यास हेते।

⁸ जो काम आमु किरेल हेते ताह तुमू फालतुक जाणे मा दिवो, पुण तान पुरो फोल जुड़ने जुवे केरीन जोगवीन रिवो।

⁹ जो कुण बी मसीन हिकवोण माय बोणीन नाह रेत, एने ओंगाण ओंगाण जाथे ता फाय बोगवान नाह सोतो; एने जो कुण तान हिकवोण माय बोणीन रीथे, ता फाय आबोख एने बिटोख बी हे।

¹⁰ केदी एगदो तुमरी फाय आवी, एने ज्यी हिकवोण नाय आपी, ताहार ताह गेरा माय आवणे मा दिहो, “तुमूह सान्ती जुड़ी,” एने कोहलाक हेते, केरीन तो बी मा फुसहो।

¹¹ काहाकाय जो कुण ओहला माणहान नमस्‍कार किरेह, ताहार तो तान खाराब कामा माय बेलाथे।

सेवल्यो नमस्‍कार

¹² माहु मोकत्युस वातु तुमूह लेखणु हे, पुण कागेद एने साई केरीन लेखणे नाह होदित, पुण आसा हे काय मी तुमू फाय आवुह एने आमने सामने वातु केरहु, ज्यो केरने से आपणी खुसी पुरी एय।

¹³ तार निवाड़ेल बोणीख ने सोरा तुवाह नमस्‍कार केरतेह।