1 तीमुथीयुस 4 - खेरलो वचन नोवालो नियम

जुठा मास्तेर्‍या

¹ चोखालो जीव साप साप किथे काय ओंगाणल्या काला माय बोटकाड़नार खाराब जीवान हिकवोण पोर मोन लागाड़ीन थोड़ाक माणहे बोरहाम रेन बोटेक जाती।

² ज्यो ता जुठा माणहान कोपेट ने कारेण एय, जान मोन मोर जायेल हे जीहे काय हेलेगताला लोखंडा केरीन डाग दियेल ने गीत हे।

³ ता वाराड़ मा किरो इहकेरीन हिकाड़ते एने खाणान थोड्युक वोस्तु हेऱ्यो रेन सेटा रेणेन हिकवोण आपती, ताह बोगवान ज्यानकेरता बाणायेल काय बुरहो केरनारे एने खेरायीह ओलेखणारे ताह दन्यवाद केरीन खाती।

⁴ काहाकाय बोगवानान द्‍वारा बाणायेल आखी चिज हाजी हे, एने काल्ली बी चिज नाकार केरनेन केरता बाणायेल नाह सोत्यु।

⁵ काहाकाय बोगवानान वचन एने विन्ता केरीन बोगवानाह समर्पित एय जाथे।

मसी यीशुन हाजालो सेवक

⁶ केदी तु बायह्याह ज्यी वातु एर केराव रिहे, ताहार मसी यीशुन हाजालो सेवक ठेराहे; एने बोरहान वातु एने ती खेरली हिकवोणाह जीह तु मानतेन आयेल हे, तारो पोहणो ईती रेय।

⁷ पुण बोगवानाह नाह जाणते त्यु डोकर्‍युन वार्ताह रेन सेटा रिवो; एने बोक्‍तीन मेहनेत केर।

⁸ काहाकाय सेरीरान मेहनेत कोम फायदान हे, पुण बोक्ती केरने आखी वातुन केरता फायदो हे, काहाकाय ताह एवीन एने आवता जीवणान बाराम वायदो जुड़ेल हे।

⁹ ज्यी वात खेरीच एने आखी बातीन पुरो मान्नेन एने बुरहो केरनेन बाराबोर हे।

¹⁰ काहाकाय आमु मेहनेत एने कोसीत ज्यास ने केरता केरतेह काय आमरी आसा ता जीवताला बोगवाना पोर हे, जो आखा माणहाह एने खास केरीन बुरहो केरनारान केरता सुटकारो आपणार हे।

¹¹ ज्‍यु वातुन उकुम आप एने हिकाड़ते रे।

¹² कुण बी तारी जुवानीह खाराब जाणने नाय जुवे; पुण तु वचना माय, एने व्यवहारा माय, एने मोंग माय, एने बोरहा माय एने चोखाला माय आखा बुरहो केरनारान केरता एक हाजो हिक बोण जा।

¹³ जाह वोर मी नाय आवो, ताह वोर चोखाली पुस्तेक वाचीन होमलाड़नेन, एने पारचार किरते एने हिकाड़ने माय खुस रे।

¹⁴ तुवा पोर डावाला माणहे आथ मेलनेन बुखेत जाणकारान द्‍वारा जो वरदान तुवाह आपायेल हे, दिहरी उगे द्यान मा लागाड़े।

¹⁵ ज्यी वातुह सोचते रे एने ज्यास माय तारो द्यान लागाड़ मेल, काहाकाय तार वोड़ती आखा देखाय।

¹⁶ तार उगे एने तारा हिकाड़नेन उगे हास केरीन द्यान मेल, ज्यी वातु पोर मोजबुत रे; काहाकाय केदी तु ओहलो केरती रिहे ताहार तारो एने तार होमेलनारान केरता सुटकारान कारेण बोणहे।