1 तीमुथीयुस 3 - खेरलो वचन नोवालो नियम

मोंडली माय मुखी

¹ जी वात खेरली हे काय जो कुण मुखी बोणने हुदेह, तो हाजाला कामान आसा किरेह।

² ज्यो जोरवरी हे काय मोंडलीन मुखी निर्दोस रेणे जुवे, एने एकुच बायकुन एदमी, संयमी, सोमेजदार, सम्माननिय, पावणाय केरनार, एने हिकाड़ने माय उशार एणे जुवे।

³ तो दारूड्यो एने राड़कुट केरनार नाय रेणे जुवे, पुण गेरबोड़ो रेणे जुवे, एने लेड़ाणार, एने मालदेनान लोबी नाय रेणे जुवे।

⁴ तान गेरान तो हाजी व्यवस्ता केरनार जुवे, एने तान सोराह इहकेरीन ताबाम मिलेह काय ता तान मान मेलती।

⁵ जाह सोतान गेरान हाजी व्यवस्ता केरनेन नाह ओवड़ेत, ते बोगवानान मोंडलीह किहीक होमाली।

⁶ तो बोरहा माय मोजबुत रेणे जुवे, ओहलो नाय एय काय गोमेंड माय आवीन सैतानान गेत डेंड ने बागी एय जाय।

⁷ मोंडलीन बाहेर ने माणहाम बी तान हाजी गोवाय रेय, ओहलो नाय एय काय बदनाम एन सैतानान फासा माय फोस जाय।

मोंडली माय मोदेक केरनार

⁸ तिहेस केरीन पावोर बी हाजा सोबावान रेणे जुवे, दुय मुंड्यो एने दारूड्यो, एने ठेगीन पोयशा कामावणार नाय रेणे जुवे।

⁹ पुण बोरहान खेरलो चोखो मोनाह होमालीन मेली।

¹⁰ एने ज्या बी पेल पारखाय जाणे जुवे, केदी निर्दोस निकली ते पावोरान ने काम केरी।

¹¹ तिहेस केरीन बायकु बी हास केरीन रेणे जुवे, आरोप लागाड़नार नाय जुवे, पुण हाजा सोबाव वाली एने आखी वातु माय विश्वासयोग्य रेय।

¹² मोंडलीन मोदेक केरनारान एकुस लाडी रेणे जुवे, एने तान सोराह एने गेरबार हास केरीन चालाड़णार जुवे।

¹³ काहाकाय जा पावोरान काम हास केरीन केर सेकतेह, ता तान केरता हाजो पोद एने ता पोर जो मसी यीशु पोर बुरहो हे, पाका बोणती जाय।

मोटलो मालमात

¹⁴ मी ज्यी चिट्ठी लेखथु काय माहु तार फाय उतवाल्योह आवणेन आसा हे।

¹⁵ केदी माहु हे आवणे माय वार एय जाय, ते तु ज्यी चिट्ठीन द्‍वारे जाणहे काय बोगवानान गेराणा माय जी जीवताला बोगवानान मोंडली हे, एने जो खेरायीन खाम्बो एने पायो हे, तारो वेवारो माणहा हेऱ्यो किहीक रेणे जुवे।

¹⁶ ज्या माय संका नाह सोतो काय बोक्‍तीन मालमात ते मोठो हे; तो सेरीर माय एन आवो, चोखाला जीवा माय देरमी ठेरानो, हेरोगदुताह देखानो, एने दिहरा देसा माय तान पारचार एनो, दुनिया माय ता पोर बुरहो केराय गीयो, एने बोड़ाय माय हेरगाम उखलाय गीयो।