1 थिस्सलुनिक्यो 1 - खेरलो वचन नोवालो नियम1 मी पौलुस सिलवानुस एने तीमुथीयुस हिऱ्यो ज्यो पोत्रो लेखथु, आमरा आबाख बोगवानान एने मालीक यीशु मसीन माणहाह थिस्सलुनिक्योन मोंडली माय हेते, तुमूह गीण एने सान्ती जुड़ती रेय। थिस्सलुनिक्योन माणहान जीवणो एने बुरहो 2 जेवी आमु आमरी विन्ता माय तुमूह इर केरतेह, तेवी कायेम बोगवानान दन्यवाद केरतेह। 3 एने आपणा आबाख बोगवानान ओंगाण तुमरा बोरहा माय किरेल कामे, एने मोंग माय किरेल मेहनेत, एने आपणा मालीक यीशु मसी माय दिराम दिरेल आसाह जाहार ताहार इर केरतेह। 4 एय आमरा बाय बोणहा, आमु जाणतेह काय बोगवान तुमूह मोंग किरेह एने तुमू तान एणेन केरता निवड़ायेल हेते। 5 काहाकाय आमु आमरी हाजाली खुबेर तुमू फाय लावा सोबदान ओलीस नाह, पुण चोखाला जीवान ताकेत माय एने पुरा खेरायीन बोरहा माय तुमू फाय वोर पोचाड़ेल, तेवी आमु तुमू हेऱ्या किहीक वागेल ज्यो तुमूह मालुम हे। एने ज्यो तुमरीन केरता हाजो एतो। 6 तुमू मोटला मुसीबत माय एता तीबी चोखाला जीवान खुसी माय वचनाह स्वीकार लेदा। आमरी एने मालीकान गेत चाल चालने बाज गीयाह। 7 ओहलो केरने माय मकादुनिया एने आखायान हेयरान आखा बुरहो केरनारा माणहान केरता तुमू आदर्श बोण गीयाह। 8 काहाकाय तुमरी न्या रेन मकादुनिया एने आखाया माय ओलोस मालीक ने वचन नाह होमलाय गीयो, पुण तुमरो बुरहो जो बोगवाना पोर हे, तान चेरचा आखी जागी ओहलो पोसरी गीयो काय आमुह ज्यान बारा माय कायच केणेन जोरवुत नाह सोतो। 9 काहाकाय ता माणहे खुद आमरा बाराम केतेह काय जेवी आमु तुमू फाय आवा, तेवी आमरो स्वागत किहीक किरेल ता सोता गोवाह हेते। एने तुमू किहीक मुरती उगे रेन बोगवाना उगे फिरना, ताकाय जीवताला एने खेरला बोगवानान सेवा चाकरी केरी। 10 एने तान बेटाख यीशु मसीह हेरगाम रेन आवणेन वाट जोवती रिवो, जाह तो मुरेल माय रेन जिवाड़ेल, जो आपुह बोगवानान आवणे वाला रागाह रेन वोचाड़ेह। |
The New Testament in Nahali Language © The Word for the World International and Nahali Vishwaseen Mandli, Toranmal, Dhadgaon, Nandurbar, Maharashtra 2020