1 पतरस 5 - खेरलो वचन नोवालो नियमडावालाह एने जुवान्याह हिकवोण 1 तुमरे माय जा डावाला हेते, मी तान गेत डावालो एने मसीन दुखान गोवा हे। एने आवणार बोड़ाय माय बेचकाएन ताह ज्यो सोमजाड़थो, 2 काय बोगवानान ता टोलान जो तुमरी विचीम हे राखवाल किरो; एने ज्यो केरने पुड़ेह केरीन नाह, पुण बोगवानान मोरजीन गेत खुसी माय तान देखरेत किरो, एने कामाय ने केरता नाह, पुण मोन लागाड़ीन किरो। 3 जा माणहे तुमूह होपायेल हेते, ता पोर आदिकार मा चालाड़ो, पुण तुमरा टोलान केरता हाजा बुणो। 4 जेवी मुखी राखवाल्यो आवी, तेवी तुमूह बोड़ायीन ओहलो मुकूट जुड़ी जान होबा केदी गेटणे नाह। 5 तिहेच केरीन एय जुवान्या, तुमू बी डावालान ताबाम रिवो, एने तुमू आखान आखा एकमेकान सेवा केरनेन केरता गेरबोड़ाय से कोमेर बांदिन रिवो, “काहाकाय बोगवान गोमेंड केरनारान विरोद किरेह, पुण गेरब्या पोर गीण किरेह।” 6 तानकेरता बोगवानान ताकेतवाला आथान नेड़ा गेरीब बोणीन रिवो, ज्यानकेरता काय तुमूह ठिख टेम पोर उचो केरी। 7 बोगवाना पोर तुमू तुमरी आखी चिन्ता टाको काहाकाय तो तुमरी कालजी लिथे। 8 चेकचेल्या ईवो, एने जागताला रिवो! काहाकाय तुमरो विरोदी बुतड़ो डाखारनार सिहान गेत कुणीह फाड़ खाव, ज्यो होदते फिरेह। 9 बोरहा माय मोजबुत एन, एने ज्यो सोमजीन तान सामनो किरो काय तुमरा बायबांडला जा दुनियाम हेते ओहलोच दुख वेठणे बाजरेनाह। 10 तुमूह थोड़ीक वार वोर दुख उठावणेन बाद आखा गीणान बोगवान जो तुमूह मसी माय बाणावीन जेलेमक्यो बोड़ाय ने केरता हादेल तो खुद तुमूह पुरो, मोजबुत, थोबाड़ी एने ताकेतवाला केरी। 11 तास ने आदिकार कायेम रेय। आमेन। सेवल्यो नमस्कार 12 मी सिलवानुस ने उगे रेन, जाह मी बोरहावाला सोमेजथु, थोड़ोक माय लेखीन तुमूह सोमजाड़ेल हे, एने ज्यी गोवाय दियेल हे काय बोगवानान खेरलो गीण ज्योस हे, ज्यास माय मोजबुत रिवो। 13 बाबिलोन माय तुमरे गेत निवाड़ेल मोंडली हे, ता एने मारो बिटोख मरकुस तुमूह नमस्कार केतेह। 14 मोंग माय एकमेकाह गेले लागाड़ीन नमस्कार किरो। तुमू आखाह जा मसी माय हेते, सान्ती जुड़ी। |
The New Testament in Nahali Language © The Word for the World International and Nahali Vishwaseen Mandli, Toranmal, Dhadgaon, Nandurbar, Maharashtra 2020