1 कुरिंथीयो 5 - खेरलो वचन नोवालो नियममोंडली माय खाराब निती 1 न्या वोर होमेलना माय आवीह काय तुमू माय सिनालो ईथे, मतलब ओहलो सिनालो जो दिहरी जाती माय बी निहे एतेय, काय एक माणुह तान आबाख ने लाडीह राखेह। 2 एने तुमू दुखी बी ते नाह एते ता माय ओहलो काम केरनाराह तुमरे विच माय रेन निकाल देता, पुण मोठवाय केरतेह। 3 मी ते सेरीराह रेन सिटो ईतो, पुण जीवा माय तुमू हिऱ्यो हे। जीहे काय मी रेयीन हाल माय ओहला काम केरनारान बारामाय ज्यो उकुम आप दियेल हे। 4 जेवी तुमू एने मारो जीव, आमरा मालीक यीशुन ताकेत हिऱ्यो टुलो एय ते, ओहलो माणुह आमरा मालीक यीशुन नावा माय। 5 सेरीराह खाराब केरनेन केरता सैतानाह होपाय जाय, काहाकाय तान जीव मालीक यीशुन दिह्या माय सुटकारो लेय लेय। 6 तुमरो मोठवाय केरनो हाजो नाह सोतो, काय तुमूह नाह जाणते थोड़ोक खमीर आखा कुहणेल फिटाह खमीर केर दिथे। 7 जुनालो खमीर काड़ीन आपणे आपाह चोखो किरो काय नोवालो कुहणेल फिट बोण जावो, काहाकाय तुमू बिगेर खमीर ईवो, काहाकाय आमरी बी मेर जो मसी हे बोली ईयेल हे। 8 तानकेरता आवो आपु तिवारा माय खुसी केरता नाहते जुनाला खमीर माय एने नाह गेलेत एने खाराबान खमीरा रेन, पुण हुतरो एने खेराय ने अखमीरी रोटा माय। 9 मी मारी चिट्ठी माय तुमूह लिखेल हे, काय सिनालान मोंडली माय मा रिहो। 10 ज्यो नाय काय तुमू बिलकुर ज्यी दुनियान सिनालो केरनारी नाहते, लालुच नाहते, आदारो केरनारे, नाहते, मुरती पुजणारान सेंगेत मा किरहो; काहाकाय ज्यी हाल माय ते तुमूह दुनियाम रेन निकील जाणेस पोड़ी। 11 पुण मारो ज्यो केणो हे काय केदी कुण बी बाहख केयीन सिनालो केरनार, लालची, मुरती पुजणार, जुलनार, पिणार, आदारो केरनार, एय ते, तान सेंगेत मा किरहे एने ओहला माणहा हेऱ्या रूटो बी मा खाहो। 12 काहाकाय माहु जा बाहेरवालान नियाव केरनेन काय काम? काय तुमू मायवालान नियाव नाह केरती? 13 पुण बाहेरवालान नियाव बोगवान केरने तानकेरता ता खाराब कामे केरनाराह तुमरी विच माय रेन काड़ दिवो। |
The New Testament in Nahali Language © The Word for the World International and Nahali Vishwaseen Mandli, Toranmal, Dhadgaon, Nandurbar, Maharashtra 2020