1 कुरिंथीयो 2 - खेरलो वचन नोवालो नियम

खुरूसखाम पोर चीड़ेल मसीन बारा माय खुबेर

¹ एय बाय बोणहा, जेवी मी बोगवानान मालमात होमलाव तीन तुमू फाय आवुह, तेवी बोल नाहते इकेल हाजाला हिऱ्यो नाह आवो।

² काहाकाय मी ज्यो ठाण लियेल ईतो, काय तुमरे विच माय यीशु मसी मतलब खुरूसखाम पोर चेड़ायेल मसीह सोड़ीन दिहरी काल्लीस वातीह नाह जाणेत।

³ मी कोमजोर माय बिय हिऱ्यो एने जुलूम कापते कापतेन तुमरी फाय आवो;

⁴ मार वचन एने मार पारचार माय एकेलीन लालचावणेन वातु नाह, पुण बोगवानान जीवान ताकेतीन पुरावो ईतो।

⁵ ज्यानकेरता काय तुमरो बुरहो माणहान इकेल पोर नाह पुण बोगवानान ताकेती पोर टिकीन रेय।

बोगवानान इकेल

⁶ तीबी निट माणहाम आमु इकेल होमलावतेह पुण ज्यी दुनियान एने ज्यी दुनियान खेतेम एणेवाला आदिकारीन इकेल नाह;

⁷ पुण आमु बोगवानान तो लिकायेल इकेल, मालमात ने रिती पोर केतेह, जाह बोगवान केल बाणावणेन पेलुच रेन आमरी बोड़ाय ने केरता निवाड़ेल हे।

⁸ जाह ज्यी दुनियान आदिकारी माय रेन कुणीस नाह जाण्यो, काहाकाय केदी ता जाणता ते बोड़ाय वाला उजालान मालक्याह खुरूसखाम पोर नाय चेड़ावता।

⁹ पुण जीहे लिखेल हे: “जी वातु डोला नाह देख्या एने कान नाह होमल्या, एने जी वातु माणहान मोनाम आवी नाह, त्यु आखो बोगवान आपणा मोंग मेलनारान केरता तियार किरेल हे।”

¹⁰ पुण बोगवान ताह आपणो जीवान द्‍वारे आमु पोर देखाड़ेल हे, काहाकाय जीव सोब वातु मतलब बोगवानान मिठ्यु वातु बी पारखेह।

¹¹ माणहा माय रेन कुण काल्ली माणहान वातु जाणेह, माणहान जीव उलुस जी वातुह जाणेह जो ता माय हे, तिहेस बोगवानान वातु बी कुणीस नाह जाणेत, पुण बोगवानान जीव उलुस।

¹² पुण आपु माय दुनियान जीव नाह, पुण जो जीव जुड़ेल हे तो बोगवानान उगे रेन हे, काय आपु ती वातुह जाणी जी बोगवान आपुह आपेल हे।

¹³ जाह आपु माणहान हिकाड़ेल एकेलीन वातु माय नाह, पुण बोगवानान जीवान हिकाड़ेल वातु जा माय बोगवानान जीव हे ताह आमु आत्मिक वातु होमलावतेह।

¹⁴ पुण जो माणुह बोगवानान जीवान वातु स्वीकार नाह किरेत, काहाकाय तान नेजरी माय फोगवाल्यु वातु हेत्यु, एने तो ताह जाण सिकेह काहाकाय तान पारेख चोखाला जीवान रिती केरीन इती रिथे।

¹⁵ जा माय बोगवानान जीव हे तो आखो काय पारेख लिथे, पुण तो सोता कुणीच पारखाय नाह जात।

¹⁶ जिहकेरीन देरेम पुस्तेक माय लिखेल हे: “काहाकाय मालीकान मोन कुण सोमजेल हे काय ताह हिकाड़ी?” पुण आमु माय मसीन मोन हे।