1 कुरिंथीयो 15 - खेरलो वचन नोवालो नियम

यीशुन मोती माय रेन जीव उठणो

¹ एय बाय बोणहा, एवी मी तुमूह तीच पेल होमलायेल हाजाली खुबेर इर केरावणे होद्थु, जीह तुमू मानील बी एता, एने जा माय तुमू मोजबुत बी हेते।

² ज्यी हाजाली खोबरीन द्‍वारे तुमूह सुटकारो जुड़ेल हे, ताह देरीन रेतेह; नाहते तुमरो बुरहो केरनो काईच काम नाय आवी।

³ ज्यी वात माहु फाय वोर पुचील एती, तीह मी आखा रेन मोहत्वान सोमजीन तुमू माय वोर पोचाड़ दियेल हे, ती ज्यी काय देरेम पुस्तेकान गेत यीशु मसी आपणा पापान केरता मोरनु

⁴ एने ताह बुज दियेल, एने चोखाली पुस्तेकान गेत तीसरे दिह जीव बी उठील,

⁵ एने पेल पतरसाह एने पासाण बारा चेलाह देखानो।

⁶ उवतो यीशु पाच होवाह रेन बी जादा विश्वासी बाय बोणहा एकठोस देखानो, ता माय रेन जुलूम जाणे एवी वोर जीवताला हेते, पुण थोड़ाक मोर गीयाह।

⁷ पुशो तो याकुबाह एने आखा प्रेरिताह देखानो।

⁸ आखान पासाण माहु बी देखानो, ज्यो सुमजो काय पायदा एणेन दिह्यान पेल पायदा इनोह।

⁹ काहाकाय मी आखा चेलाम रेन आत्यो हे, एने प्रेरित केवाणेन लायेक बी नाह सुतो, काहाकाय मी बोगवानान मोंडलीह सेतायेल ईतो

¹⁰ पुण मी जो काय बी हे बोगवानान किव माय हे, तान किव जो मार पोर ईयेल हे, तो उदेड़ नाह ईयेल, पुण मी ता आखाह रेन वादार मेहनेत बी किरेल तीबी ज्यो मार उगे रेन नाह एनो, पुण बोगवानान किव केरीन जी मार पोर एती।

¹¹ तानकेरता मी हे नाहते ता एती, आमु ज्योस पारचार केरतेह, एने ज्यास पोर तुमू बी बुरहो किरेल।

आपणो पोशो जीव उठणो

¹² ज्यानकेरीन जुलबुखे काय मसीन ज्यो पारचार केराय जाथे, काय तो मुरेल माय रेन जीव उठनो, तेवी तुमू माय रेन थोड़ाक माणहे इहकेरीन काहा केतेह काय मुरेल तान पोशो जीव उठणेच नाह सोतो?

¹³ केदी मुरेलान पोशो जीव उठणो सोतोच नाह, ते मसी बी निहे जीव उठनो एय।

¹⁴ एने केदी मसी नाय जीव उठतो, ते आमरो पारचार केरनो बी उदेड़ हे, एने तुमरो बुरहो बी उदेड़ हे।

¹⁵ एने आमु बोगवानान जुठा गोवाह ठेराहो, काहाकाय आमु बोगवानान बारामाय ज्‍यु पुरावो दियेल काय तो मसीह जीवाड़ दियेल हे, एने केदी मुरेल माणहे जीवाड़ाय नाय जाते ते मसी बी जीव नाय उठतो।

¹⁶ एने केदी मुरेल नाय जीव उठता, ते मसी बी नाय जीव उठतो;

¹⁷ पुण केदी मसी नाय जीव उठतो, ते तुमरो बुरहो उदेड़ हे एने तुमू एवी वोर सोतान पापा माय खोवाय रेनाह।

¹⁸ पुण जा मसी पोर बुरहो केरनारे मोर जायेल हेते, ता बी खेतेम ईयेल हेते।

¹⁹ केदी आपु ज्या जीवणा माय ओलास मसी पोर आसा केरतेह, ते आपु सोब माणहाह रेन वादार दुखी माणहे हेते।

²⁰ पुण खेरीच मसी मुरेल माय रेन जीव उठेल हे, एने जा मोर जायेल हेते ता बी जीव उठती ज्यो वातीन पुरावो हे।

²¹ काहाकाय जुलबुखे एक माणहान उगे रेन मोत आवी, ते एक माणहास ने उगे रेन मुरेलान पोशो जीव उठणो बी आवो।

²² जेवी आदम सोबा पोर मोत लायेल, तिहेस मसी जा ता पोर बुरहो केरतेह ता आखाह जीवाय आपी।

²³ पेल मसी जीव उठेल मोती माय रेन एने जेवी तान पोशो आवणेन दिह तान माणहे जीव उठती।

²⁴ ज्यान पासाण सेवेट एय। तुलबूखे तो आखा राज केरनाराह खाराब जीवाह, एने आखा आदिकाराह, एने मसी आखी ताकेत खेतेम केरीन राज बोगवान आबाख ने आथा माय होप देय।

²⁵ काहाकाय मसी ताह वोर राज केरी जाहाक वोर तान दुसमोनाह तान पायान तेलसा बुंदे नाय लियावी।

²⁶ आखाम रेन आखरी दुसमोन जो खेतेम केराय जाय, तो मोत हे।

²⁷ काहाकाय देरेम पुस्तेक किथे, “बोगवान आखो काय मसीन पायान तेलसा बुंदे केर दियेल हे,” पुण जुलबुखे तो किथे, आखो काय तान ताबाम केर दियेल हे तो ओंगाण हे, पुण बोगवान सोता आंगे रियेल।

²⁸ एने जुलबुखे आखो काय तान उगे एय जाय, ते बिटोख सोता बी तान ताबाम एय जाय, जो आखो काय तान ताबाम केर दियेल, काहाकाय आखा माय बोगवानुस सोब वोस्तु एने सोब वातु पोर पुरी रिती माय राज केरी।

²⁹ नाहते जा माणहे मुरेलान केरता बपतीस्मा लेतेह, ता काय केरती? केदी मुरेल जीव उठतेच नाह ते ओवता काहा तान केरता बपतीस्मा लेतेह?

³⁰ एने आपु बी काहा जाहार ताहार तेकलीत माय पोड़ रेतेह?

³¹ एय बाय बोणहा, माहु ती मोठाय जी आपणा मसी यीशु माय मी तुमरा बारामाय केरथु, मी दाड़ीन दिह मोरथु।

³² मी इफिसुस गावा माय जेंगली जेनवेरान गेत माणहे एता ता हिऱ्यो लेड़ाय किरेल, ते माहु काय फायदो ईनो? केदी मुरेल जीवता नाय एय, ते आवो आपु खाता पिता काहाकाय काल ते मोरीस जाहु।

³³ ठेगाहो मा, “खाराब हेंगात हाजाला सोबावाह बिगाड़ दिथे।”

³⁴ हाजो विचार केरने चालु किरो एने पाप केरने सोड़ दिवो, काहाकाय थोड़ाक ओहला हेते जा बोगवानाह नाह जाणते, मी तुमूह लाजवाड़नेन केरता ज्यो केथु।

पोशा जीव उठणारान सेरीरे

³⁵ एवी एगदो ज्यो केय, “मुरेल किहीक जीव उठतेह, एने कोहलाक सेरीरा हेऱ्या आवतेह?”

³⁶ एय बिगेर एकलीवाला जो काय तु पिरीह, जाह वोर तो नाह मुरीत ताहाक वोर जीवतालो नाह एणे।

³⁷ एने जो तु पिरीह, ज्यो तो रोप नाह सोतो जो उगणार हे, पुण निस्तो दाणो हे गोवान नाहते उंजु कायतान बी दाणा एय।

³⁸ पुण बोगवान तान आसान उगे रेन ताह सेरीर आपणे, एने एकेक बिजाह तान खाज सेरीर।

³⁹ सोब सेरीर एक हारको नाह सोतो: माणहान सेरीर आलेग हे, जेनवेरान सेरीर आलेग हे; चीड़ान सेरीर आलेग हे; मासान सेरीर आलेग हे।

⁴⁰ हेरगान सेरीर हे एने देरतीन सेरीर बी हे, पुण हेरगान सेरीर ने चोमेक आलेग हे, एने देरतीन आलेग।

⁴¹ दिह्यान चोमेक आलेग हे, चांदान चोमेक आलेग हे, एने चांदण्यान चोमेक आलेग हे, काहाकाय एक चांदण्याह रेन दिहरा चांदण्या वोर चोमेक माय गालो हे।

⁴² मुरेलान जीव उठणो बी ओहलोस हे, सेरीर खेतेम एणेन हाल माय पेराणे एने खेतेम नाय एय ओहला वेहा माय जीव उठीह।

⁴³ तो बिगेर मान पान हेऱ्यो बुजाय जाथे, एने चोमेक हेऱ्यो जीव उठणे; कोमजोरी हेऱ्यो बुजाय जाथे एने ताकेती हेऱ्यो जीव उठणे।

⁴⁴ सारिरीक सेरीर बुजाय जाथे, एने आत्मिक सेरीर जीव उठणे। ते सारिरीक सेरीर बी हे, एने आत्मिक सेरीर बी हे।

⁴⁵ ओहलोस लिखेल बी हे, “पेल्लो माणुह आदम ताह जीवतालो जेनवार बोणायेल, एने सिवल्यो आदम जीवाय आपणार जीव हे।”

⁴⁶ पुण पेल आत्मिक नाह पुण सारिरीक सेरीर ईतो, ज्यान पासाण आत्मिक ईनो।

⁴⁷ पिल्लो माणुह आदम माटड्यान एतो, दिहरो हेरगान हे।

⁴⁸ जोहलो तो माटड्यान एतो, तोहलास ता बी हेते जा माटड्यान हेते, एने जोहलो तु हेरगान हे तोहलास ता बी हेते जा हेरगान हेते।

⁴⁹ एने जीहे आपु तान सेरीर लियेल जो माटड्यान एतो, तिहेस केरीन ता आपु हेरगान सेरीर बी लेहु।

⁵⁰ एय बाय बोणहा, मी ज्यो केथु, माह एने लुय बोगवानान राज माय हिस्सेदार नाह बोण सेकते, एने खेतेम एणाराह विण खेतेमान ईसो नाय जुड़ सिकेह।

⁵¹ मी तुमूह मालमात ने वात केथु, आपु आखा नाय मोरहु, पुण आखा बोदली जाहु, एने ज्यो एकुस ताल माय पापण्या पाड़तास सेवली पावली फुकतास एय।

⁵² काहाकाय पावली फुकाय जाय एने मुरेल सेरीर बिगेर खेतेम एण्यी हाल माय उठ जाती, एने आपु बोदेल जाहो।

⁵³ काहाकाय जोरवरी हे, ज्यो खेतेम एण्यो सेरीर बिगेर खेतेम एण्याह पेरलेय, एने ज्यो मोरनार सेरीर बिगेर मोरनाराह पेरलेय।

⁵⁴ एने जुलबुखे ज्यो खेतेम एण्यो बिगेर खेतेम एण्याह पेरलेय, एने ज्यो मोरनार बिगेर मोरनाराह पेरलेय, तुलबूखे तो वचन जो लिखेल हे, पुरो एय जाय: “मोत खेतेम एय गियी, एने जीत जुड़नी!”

⁵⁵ एय मोत, तारी जिक का रेनी? एय मोत, तारो टोचणो का रेनो?

⁵⁶ मोत ने टोचणो पाप हे, एने पापान ताकेत मुसान कायदो हे।

⁵⁷ पुण बोगवानान दन्यवाद एय जो आपणा मालीक यीशु मसीन द्‍वारे आपुह जिकाड़ीह।

⁵⁸ तानकेरता एय मार मोंगाल्ला बाय बोणहा, मोजबुत एने वातड़ा रिवो, एने मालीकान कामा माय कायेम वोड़ते जावो, काहाकाय ज्यो जाणतेह काय तुमरी मेहनेत मालीक माय उदेड़ नाह सोती।