1 कुरिंथीयो 14 - खेरलो वचन नोवालो नियमचोखाला जीवान बारा माय मोकती हिकवोण 1 मोंगान गेत चालनेन केरता तुमरी उखीर रेन पुरी कोसीत किरो, एने आत्मिक वरदानान दुंदी माय बी रिवो खास केरीन ज्यो काय बोगवाना फाय रेन आयेल जाणाव ने केरता। 2 काहाकाय जा एंजाणल्ली बाषा माय वातु केरतेह, ता माणहा हेऱ्यो नाह पुण बोगवाना हेऱ्यो वातु किरेह, ज्यानकेरीन काय तान वातु कुण नाह सोमेजणे, काहाकाय तो चोखाला जीवान ताकेत माय बुलीह। 3 पुण जा बोगवानान उगे रेन जाणाव केरतेह, आत्मिक उन्नती दिलासो एने दिर ने केरता माणहाह संबोदित किरेह। 4 जा एंजाणल्ली बाषा माय वातु किरेह, तो सोतास ने वोदणेन वातु किरेह, पुण जो बोगवाना उगे रेन जाणाव लावीह, तो मोंडलीह वोदणेन किरेह। 5 मारी ज्यी मोरजी हे काय तुमू आखा एंजाणल्ली बाषा माय वातु केरी, पुण ज्याह रेन होवटो ज्यो होदथु काय बोगवाना फाय रेन आयेल जाणाव ने वातु किरो, काहाकाय केदी एंजाणल्ली बाषा बोलनार मोंडलीन वोदणेन केरता अनुवाद नाय केरी, ते बोगवाना फाय रेन आयेल खुबेर आपणार ताह रेन वादार हे। 6 ज्यानकेरीन एय बाय बोणहा, केदी मी तुमरे आहने आवीन एंजाणल्ली बाषा माय वातु केरू, ते माहु रेन तुमूह काय फायदु एय। पुण उजेड़, इकेल, एने बोगवाना फाय रेन आयेल खुबेर, एने पारचारान वातु नाय लेन आवो ते काय फायदु। 7 तिहेस केरीन केदी विण जीव वोस्तु बी जा माय रेन आवाज निकलेह, जीहे पावली, एने रेणथो, तो केदी वाजी नाय ते तान आवाज किहीक ओलखाय? 8 केदी पावली आवाज साप निही, एय ते कुण लेड़ाय ने केरता तियारी केरी? 9 इहीचकेरीन तुमू बी केदी जिबी केरीन साप साप वातु नाय किहो, ते जो काय केवाथे, ताह माणहे किहीक सोमेजती? तुमू ते वारा हेऱ्या वातु केरनारे ठेराहो। 10 दुनिया माय कोलीक बी बातीन बाषा काह निहे एती, पुण ती माय रेन काल्ली बी बिगेर मतलब ने निहे एती। 11 केरीन केदी मी काल्ली बी बाषान मतलब नाय सोमजु, ते बोलणारान नेजरी माय पारदेसा वालो ठेराह, एने बोलणार मारी नेजेर माय पारदेसा वालो ठेराय। 12 तानकेरीन तुमू बी जुलबुखे आत्मिक वरदानान दुंदी माय रिहो, ते ओहली कोसीत किरो काय जीवान ता वरदानान द्वारे मोंडलीन वोड़ती एय। 13 विन्ता केरी काय चोखालो जीव एंजाणल्ली वातुन अनुवाद केर सिके। 14 तानकेरीन केदी मी एंजाणल्ली बाषा माय विन्ता केरू, ते मारो जीव विन्ता किरेह पुण मारी बुद्दी काम नाह देणे। 15 ते माहु केरने काय जुवे? मी जीवा केरीन बी विन्ता केरूह; एने बुद्दी केरीन बी विन्ता केरूह; मी जीवा केरीन बी गावुह, एने बुद्दी केरीन बी गावुह। 16 केदी तु जीवास केरीन उपकार मानहे, ते ओवता बिगेर इकेल वाला तार उपकारा पोर आमेन किहीक केती? काहाकाय ता ते जाणेत नाह काय तु खेरीच काय किथे? 17 तु ते हास केरीन उपकार मानीह, पुण दिहरान वोड़ती नाह एत। 18 मी मार बोगवानान उपकार मानथु, काय मी तुमू सोबाह रेन वादार एंजाणल्ली बाषा माय बोलथु। 19 पुण मोंडली माय एंजाणल्ली बाषा माय पाच वातु केणे, ताह रेन ज्यो माहु हाजो मालुम पुड़ेह, काय दिहराह हिकाड़णेन केरता बुद्दी केरीन पाचुस वातु केव। 20 एय बाय बोणहा, तुमू सोमेज माय सोरा मा बुणो; गेलेत माय सोरान गेत रिवो, पुण सोमेजदारी माय मोठलान गेत बुणो। 21 देरेम पुस्तेक माय लिखेल हे: मालीक किथे, “मी एंजाणल्ली बाषा बोलणारान द्वारे एने पाराया मुखान द्वारे न्या माणहा हिऱ्यो वातु केरूह, तीबी ता मारी नाय होमेलती।” 22 केरीन एंजाणल्ली बाषा बोलनेन वरदान बोरहावालान केरता नाह सोती, पुण विण बोरहावालान केरता निसाणी हे, एने बोगवाना उखीर रेन खुबेर अविश्वासीन केरता नाह सोतो, पुण बोरहावालान केरता चोमेत्कारान निसाणी हे। 23 केदी मोंडली एक जागे एकठी एय, एने आखान आखा एंजाणल्ली बाषा बोली, एने बाहेरवाला एने अविश्वासी माणहा माय आव लागी, ते काय ता तुमूह गांडा नाय केती? 24 पुण केदी सोब बोगवाना उगे रेन आयेल जाणाव केणे बाज जाय, ते विण बोरहावालो एने बाहेरवालो माणहे माय आव लागती, ते ता सोमजी जाती काय आमु पापी हेते, एने जो ता होमलेल हेते तान द्वारे नियाव केराय जाय। 25 एने तान मोनान मालमात देखाय जाय, एने तो मुयान बोरहे पोड़ीन बोगवानाह आथ जोड़ीन बोक्ती किरतेन केय, “खेरीच बोगवान तुमरी विची माय हे।” बोक्ती माय नेम 26 तानकेरता एय बाय बोणहा काय केरने जुवे? जुलबुखे तुमू एकठा एतेह, तुलबूखे एकेकान मोना माय गीत, एने पारचार, एने एंजाणल्ली बाषा, एने उजेड़, एने एंजाणल्ली बाषान मतलब केणेन रेणे आखो काय आत्मिक वोड़तीन केरतास एणे जुवे। 27 केदी एंजाणल्ली बाषा माय वातु केरनो एय, ते दुय नाहते तीन जाणे वारी वारी माय बोली, एने एक माणुह अनुवाद केरनार रेणे जुवे। 28 पुण केदी अनुवाद केरनार निहे एय ताहार एंजाणल्ली बाषा बोलनार मोंडली माय ठावकु रेय, एने सोता हिऱ्यो एने बोगवाना हिऱ्यो वातु केरी। 29 एने दुय नाहते तीन जाणे बोगवानान जाणकारे रेय, एने दिहरा माणहे तान वचनाह पारखे। 30 पुण केदी बोहणारा माय रेन एगदाह बोगवाना उखीर रेन काह खुबेर जुड़ने एय, ते पेल्लो ठावको एय जाय। 31 काहाकाय तुमू आखा एक एक केरीन बोगवाना उखीर रेन आयेल जाणाव ने पारचार केर सेकतेह, काहाकाय आखा हिके एने आखाह दिलासो जुड़ सेकी। 32 एने बोगवाना उखीर रेन जाणाव केरनारान जीवान वरदान तान ताबा माय रिथे। 33 काहाकाय बोगवान कापालीन नाह, पुण सान्तीन बोगवान हे। ओहलोस बोगवानान चोखाला माणहान आखी मोंडल्यु माय एणे जुवे। 34 बायकु मोंडलीन पोंचा माय ठावक्यु रेय, काहाकाय त्युह वातु केरनेन उकुम नाह सुतो, पुण ताबा माय रेणेन उकुम हे, जीह कायदा माय लिखेल बी हे। 35 केदी त्यु काह हिकणे होद्ती एती ते गेरा माय जान तान एदम्याह फुसे, काहाकाय बायकु मोंडली माय वातु केरी ते लाज ने वात हे। 36 काय बोगवानान वचन तुमूस माय रेन निकेलने? काय तुमू फाय ओलोस पुचील हे? 37 केदी एगदो माणुह सोताह बोगवानान उगे रेन आवणेवाली खुबेर जाणकार एने आत्मिक जाण सुमजेह, ताहार ज्यो जाण लेय काय जी वात मी तुमूह लेखथु, तो मालीकान उकुम हे। 38 पुण केदी एगदो ज्याह नाह स्वीकारीत, ते तान उखीर बी द्यान नाय देवाय जाय। 39 एय बाय बोणहा, बोगवानान उगे रेन जाणाव बोलनेन केरता आसा मीलु, एने एंजाणल्ली बाषा बोलनेन केरता ताह मा रूको; 40 पुण आख्यु वातु माय चेतरायेह एने हास केरीन रूपा माय किरो। |
The New Testament in Nahali Language © The Word for the World International and Nahali Vishwaseen Mandli, Toranmal, Dhadgaon, Nandurbar, Maharashtra 2020