Yoane 14 - Nouveau Testament en Ngombe 1961

Sako eMwembo Mosɛnɔke

¹ Yɛni bosanɔngeja a milema minu. Ojimeakani Njambe; jimani koko mbi.

² Ndako eSangwa’mbi edi na bikenge binɛnɛ. Eipeta da boa ka mbi nabwani botɔndɔ no bo nakɛkɛ a bosɛlingoa esika a mojɔ monu?

³ Nakakɛ a bosɛlingoa esika a mojɔ monu, nâhula koko bo nasɛ no ai mbi, bo odaeni oko a esika edi mbi mɛnɛ.

⁴ Ojebakani njea a esika ekɛkɛ mbi.

⁵ Toma abala na nde bo, Kumu, adi so pɛ bojeba esika ekɛkɛ wɛ, bodi bojeba njea na ye?

⁶ Yesu abala na nde bo, Mbi nadi Njea, na Soti, na Bomɔ. Pɛpɛ nongo moto odi bodoa ai Sango; adi bodoa ai Sango oko na mbi.

⁷ Akɔki no jeba mbi, ka ojebini Sangwa’mbi pongono. Edɛye ko omojebakani, na omonini.

⁸ Pilipo abala na nde bo, Kumu, aneja so Sango; mojɔ mopalaka so oko mu.

⁹ Yesu abala na nde bo, Pilipo, mbi nayeyoi na nu ekoka ye, na ojebakini mbi? lyona oni mbi ani Sango pongono. Oko boa, obalaka bo, Aneja so Sango, mojɔ moye?

¹⁰ Otajimaka bo mbi nadi a tei eSango, na Sango a tei embi? Nitabalaka bikenge bibalaka mbi na nu na kpaci embi mɛnɛ. Edi oko Sango yona odi a tei embi yona okɔkɔ bilomu binde.

¹¹ Jimani mbi, bo mbi nadi a tei eSango, na Sango a tei embi, isa jimani mbi oko a mojɔ mobilomu bimina.

¹² Mbi natɔndɔkɔ no na soti bo, yona ojimeaka mbi adi bokɔ bilomu bikɔkɔ mbi. Ee, adi bokɔ bilomu bia binɔi bilomu bi, mojɔ bo mbi nakayane ai Sango.

¹³ Mbi nadi bokɔ mijɔ misusu mingaka no a kombe embi, bo Sango asɛ ekumu na Mwana.

¹⁴ Oka’ngani mokina mojɔ a kombe embi, nâkɔ mojɔ momina.

Mokɔmeja

¹⁵ Isa opalakani mbi, toma sumani mibeko mimbi.

¹⁶ Mbi nadi bonga Sango, na yo âpa no Mokɔmeja otongo, oko Mwembo moSoti, bo ayeyoe na nu oko na bosusu.

¹⁷ Ngondo t’ehɔnɔke bomosɔ, mojɔ bo batamonɛkɛ na batamojebaka. Ino ko omojebakani, mojɔ bo adi na nu, na âda a tei enu.

¹⁸ Mbi nitakina no malike. Nâdoa ai no.

¹⁹ Ngɔngɔ mweka, ngondo êtanɛ mbi koko. Ino ko ônɛni mbi, mojɔ bo mbi nadi mɔ, na ino odani mɔ pongono.

²⁰ Odini bojeba a busa bomina bo mbi nadi a tei eSango, ino a tei embi, na mbi a tei enu.

²¹ Moto akada na mibeko mimbi, na akamisuma, moto omina adi na mbi ngɛnjɔ. Moto akada na mbi ngɛnjɔ, Sangwa’mbi âda na nde ngɛnjɔ pongono. Mbi mɛnɛ nâda na nde ngɛnjɔ pongono, na nasaboloja ai yo.

²² Yuda (te Iskalio) abala na nde bo, Kumu, odi bosaboloja ai so, pɛ ko bosaboloja a ngondo mojɔ moye?

²³ Yesu amosɔmbeja bo, Isa moto adi na mbi ngɛnjɔ, adi bosuma bikenge bimbi. Sangwa’mbi ada na moto omina ngɛnjɔ, na so bôdoa ai yo a boda a tei ende.

²⁴ Isa moto aditi na mbi ngɛnjɔ, atasumaka bikenge bimbi. Na ekenge ekaka no editi ekenge embi mɛnɛ; edi ekenge eSango yona olomani.

²⁵ Nabali na nu ngando jimina, yana adi mbi ya na nu.

²⁶ Sango ko âloma Mokɔmeja a kombe embi oko Mwembo Mosɛnɔke. Iyo âkoja no ngando jisusu, na âlɛjɛ no ngando jisusu jibala mbi na nu.

²⁷ Mbi nakineaka no bowi. Napaka no bowi bombi mɛnɛ, te nongo bowi bopaka ngondo.

²⁸ O’kini mojɔ mobali mbi na nu, bo nadi bodonga, na nâhula koko ai no. Akɔki no pala mbi ka osepeni bo nakɛkɛ ai Sangwa’mbi, mojɔ bo Sangwa’mbi anɔi mbi.

²⁹ Natɔndɔi no mojɔ momina edɛye, adi ehole emina pɛ bopeta mea; oko boa, ekamea, odini bojima.

³⁰ Nitabala na nu koko bou, mojɔ bo kumu ongondo ye akɛkɛ adoe; yo ko aditi na kpaci ai mbi.

³¹ Mbi nakɔkɔ o abekeani Sangwa’mbi, bo ngondo ejebe bo napalaka Sangwa’mbi. Angɔni, so bokɛe!