Yoane 1 - Nouveau Testament en Ngombe 1961

¹ Ebaeli edaka kanga a bobanga mɛnɛ. Ebaeli edaka na Njambe. Ebaeli edaka Njambe.

² Iyo adaka na Njambe a bobanga mɛnɛ.

³ Iyo akɔ leka losusu boya. Pɛpɛ nongo eka emɔci edi, yena edi yo pɛ bokɔ.

⁴ Bomɔ bodaka a tei ende, na bomɔ bomina bodaka bohu bobato.

⁵ Bohu bohoa a tei emodidi na modidi moigbokeja bohu.

⁶ Njambe aloma moto, kombe ende Yoane.

⁷ Iyo adoa bo adae motati, a bojebeja bato a mojɔ mobohu, bo bato basusu badi bojima oko na nde.

⁸ Iyo mɛnɛ aidaka bohu bomina. Adoa oko bo adae motati obohu.

⁹ Bohu bomina bodaka bohu bosoti, na bodoa a ngondo a bopa bato basusu bohu.

¹⁰ Iyo adaka a ngondo, oko ngondo ekɔ yo; ngondo ko eimojeba.

¹¹ Adoa a ngando ende mɛnɛ; bato bande mɛnɛ ko baimosɔ.

¹² Ibaya ko bamosɔ, oko baya bamojimeaka, yo abapa kpaci bo badae bana baNjambe.

¹³ Ibo baibotama nongo na makia, isa na bolulea bomokuku, isa na bolulea bomoto; babotama oko na Njambe.

¹⁴ Ebaeli ekindoa moto, na yo ayeyoa a tei esu; aluma na monganji na Soti. Iso bonɛ ekumu ende, ekumu eMwana-sɔmi omɔci yona odonga ai Sango.

¹⁵ Yoane adaka motati onde. Iyo abala a mojɔ monde bo, Yana abala mbi bo, Iyona okɛkɛ adoe ngɔngɔ jimbi anɔi mbi, mojɔ bo yo adaka oko mbi napetakini da,—edi oko yo.

¹⁶ Iso basusu bosɔkɔ monganji monde, monganji oko na bonɛtɔ.

¹⁷ Mibeko mibakeama oko na Mose. Yesu Masiya ko adoa na monganji na Soti.

¹⁸ Pɛpɛ nongo moto onɛ Njambe; Mwana-sɔmi omɔci ko yona odi a bupa boSango amobolojai ai so.

Tati eYoane

¹⁹ Tati eYoane edi yeye. BaYuda baYelusalema baloma bakina nganga na BaLewi ai yo na lihɔjɔ bo, Wɛ odi nda?

²⁰ Yoane ajima, pɛ nongo bongana; ajima oko bo aditi Masiya.

²¹ Oko boa, bamohɔjɔ bo, Odi ko nda? Odi Elia? Iyo abala bo, Naditi nongo yo. Bamohɔjɔ koko bo, Odi motɔndɔi yona? Iyo asɔmbeja bo, Pɛpɛ.

²² Oko boa babala na nde bo, Odi nda? Jebeja so a mojɔ mowɛ mɛnɛ, bo botɔndɔe bato baya balomi so.

²³ Yoane abala bo, Mbi nadi, Kɔpi emoto yona obekoaka a esika bo, Tangbojani njea eKumu; O abala motɔndɔi Yisaya.

²⁴ Bakina baya balomama ai yo badaka BaPalusi.

²⁵ Ibo bamohɔjɔ bo, Isa oditi Masiya, na oditi Elia, na oditi motɔndɔi, obatisaka mojɔ moye?

²⁶ Yoane abasɔmbeja bo, Mbi nabatisaka a madiba; okina ko adi a tei enu na otamojebakani.

²⁷ Iyo akɛkɛ adoe ngɔngɔ jimbi, na mbi nabɔngiti bo nacingoe mokɔli mosapata jinde.

²⁸ Mojɔ mu modaka a Betania, a dɔngɔ ditongo diYoladene, a esika ebatisaka Yoane.

²⁹ Yana ahoa busa, Yoane anɛ Yesu akadoe ai yo, na abekoa bo, Anjani Mwana-Bata oNjambe yona odongejaka bobe bongondo!

³⁰ Yana abalabi mbi bo, Okina moto akɛkɛ adoe ngɔngɔ jimbi yona odi boso bombi, mojɔ bo yo adaka oko mbi nadakini, nabalabi oko a mojo monde.

³¹ Mbi mɛnɛ naimojebaka; endele ko mbi nadoi bo namobolojae ai Yisalaele oko na batisimo a madiba.

³² Na Yoane atɔndɔ koko bo, Mbi nani Mwembo mokadonge oho Diko o ekɔmɛli esungu, na mobakami ai yo.

³³ Mbi naimojebaka mbi mɛnɛ; yona olomani ko bo nabatise a madiba, abala na mbi bo, Okanɛ Mwembo mokatite na mokabakame ai moto, edi oko yo yona abatisaka a Mwembo Mosɛnɔke.

³⁴ Mbi namoni mbi mɛnɛ, na natɔndɔkɔ na soti bo Iyo adi Mwana ’Njambe.

Bacigami Baboso

³⁵ Ahoa koko busa, Yoane adaka ami na bacingami bande babae.

³⁶ Iyo anɛ Yesu akadale, na abala bo, Anjani Mwana-Bata oNjambe!

³⁷ Bacingami ba babae baka bikenge bibala Yoane, na bakimana Yesu.

³⁸ Yesu ahekoa, na anɛ bo bacingi ngɔngɔ jinde. Abala na bu bo, Epalaka no nde? Bamosɔmbeja bo, Labi, (cina emina edi Mokoja) osamaka jɔ?

³⁹ Iyo abala na bu bo, Doani okanjeni. Oko boa bakɛ, na banɛ esika edaka yo; na badika na nde busa bomina, mojɔ bo edaka isa quatre heures na dea.

⁴⁰ Andalea, mwanange ’Simona Pɛtɛlo, adaka okina obu babae baya baka ebaeli eYoane na bakimana Yesu.

⁴¹ Iyo akɛ nduki emwangwa ’nde Simona bokpa, na abala na nde bo, Iso bobolojai Masiya (cina emina edi Klisto).

⁴² Adoa na nde ai Yesu. Yesu amonja, na abala na nde bo, Wɛ odi Simona, mwana oJona. Kombe ewɛ êda Kepa (cina emina edi Pɛtɛlo—Litai).

⁴³ Ahoa koko busa, Yesu adaka na mokano a bokɛ a Galile. Atana Pilipo, na abala na nde bo, Cingama na mbi.

⁴⁴ Pilipo adaka moto oBetesaida, ngando eAndalea na Pɛtɛlo.

⁴⁵ Pilipo aduka Natanaele, na abala na nde bo, Mose asɔnɔ a Mibeko, na batɔndɔi basɔnɔ pongono, a mojɔ mookina moto; iso bomobolojai, oko Yesu oNasaleta, mwana oYosepa.

⁴⁶ Natanaele amosɔmbeja bo, Ekina eka epele edi bomana a Nasaleta? Pilipo abala na nde bo, Doa okanje

⁴⁷ Yesu anɛ Natanaele akadoe ai yo, na abala a mojɔ monde bo, Anjani MoYisalaele osoti! Poloso editi nongo a tei ende.

⁴⁸ Natanaele abala na nde bo, Wɛ ojebi mbi na ye? Yesu amosɔmbeja bo, Mbi nanɛki wɛ yana adaki wɛ a cine elikɔkɔ, yana adaki Pilipo pɛ bopeta bea wɛ.

⁴⁹ Natanaele amosɔmbeja bo, Labi, wɛ odi Mwana oNjambe. Odi Kumu oYisalaele.

⁵⁰ Yesu abala na nde bo, Ojimaka mojɔ bo natɔndɔi wɛ bo nani wɛ a cina elikɔkɔ? Odi bonɛ ngando jia jinɔi jiji.

⁵¹ Abala na nde koko bo, Soti mɛnɛ, mbi natɔndɔkɔ no bo ônɛni Diko bwase, na babwɛnji-baDiko bakawee na bakatite a diko diMwana ’Moto.